ഏലപ്പിടിക : ഏലപ്പീടിക ടൂറിസം പദ്ധതിക്കായി കണിച്ചാർ പഞ്ചായത്തിന്റെ നേതൃത്വത്തിൽ മാസ്റ്റർപ്ലാൻ തയ്യാറാക്കാൻ തീരുമാനം. ഏലപ്പീടിക ടൂറിസം സാധ്യതാപഠനവും നിക്ഷേപക സംഗമവും കണിച്ചാർ ഗ്രാമപ്പഞ്ചായത്തിന്റെ നേതൃത്വത്തിൽ നടത്തി. ബുധനാഴ്ച രാവിലെമുതൽ ഡോ. ശിവദാസൻ എം.പി., പഞ്ചായത്ത് പ്രസിഡൻറ് ആൻറണി സെബാസ്റ്റ്യൻ, ടൂറിസം ഡെപ്യൂട്ടി ഡയറക്ടർ പ്രശാന്ത് വാസുദേവ് തുടങ്ങിയവരുടെ നേതൃത്വത്തിൽ എലപ്പീടികയിലെ ടൂറിസം സാധ്യതാപ്രദേശങ്ങളിൽ സന്ദർശനം നടത്തി.

പുൽമേട്, കുരിശുമല, തമ്പുരാൻമല, 29-ാം മൈൽ വെള്ളച്ചാട്ടം, അരുവിക്കുഴി വെള്ളച്ചാട്ടം തുടങ്ങിയ സ്ഥലങ്ങളിൽ സംഘം സന്ദർശനം നടത്തി. ടൂറിസം സ്പോട്ടുകളോട് സമീപസ്ഥലങ്ങളുള്ള നിക്ഷേപകർ തങ്ങളുടെ സ്ഥലങ്ങളിൽ നടപ്പാക്കുന്ന പദ്ധതികളുടെ റിപ്പോർട്ട് 15 ദിവസത്തിനകം പഞ്ചായത്തിൽ സമർപ്പിക്കാൻ നിർദേശം നൽകി. ഇതിന്റെ അടിസ്ഥാനത്തിലാകും പഞ്ചായത്ത് മാസ്റ്റർപ്ലാൻ തയ്യാറാക്കുക.

പ്രദേശങ്ങളിലെ അടിസ്ഥാനസൗകര്യ വികസനവും ഉൾപ്പെടുത്തിയാകും പദ്ധതി നടപ്പാക്കുക. പ്രദേശത്ത് ടൂറിസം കോംപ്ലക്സ് നിർമ്മിക്കുന്നതടക്കമുള്ള കാര്യങ്ങൾക്കായി ഒരേക്കർ സ്ഥലം ജനകീയ സഹകരണത്തോടെ ഏറ്റെടുക്കും. ടൂറിസം പദ്ധതിയുമായി ബന്ധപെട്ട കാര്യങ്ങൾ സമയബന്ധിതമായി പൂർത്തിയാക്കുന്നതിനായി ഏകജാലക സംവിധാനം നടപ്പാക്കാനും തീരുമാനിച്ചു. ഉത്തരവാദിത്വ ടൂറിസം പദ്ധതിയുടെ ഭാഗമായി പഞ്ചായത്ത് തലത്തിലും ഏലപ്പീടികയിലെ പ്രദേശവാസികൾക്കും ഉത്തരവാദിത്വ ടൂറിസം സാധ്യതകൾ പരിചയപ്പെടുത്തുന്നതിനുമായി ബോധവത്കരണം നടത്തും. പഞ്ചായത്ത് ആക്‌ഷൻ പ്ലാൻ തയ്യാറാക്കുന്നതിനനുസരിച്ചാകും ഡി.ടി.പി.സി. നടപടിക്രമങ്ങൾ ആരംഭിക്കുക.

ടൂറിസം സാധ്യതാപഠനവും നിക്ഷേപക സംഗമവും ഡോ. വി.ശിവദാസൻ എം.പി. ഉദ്ഘാടനംചെയ്തു. പഞ്ചായത്ത് പ്രസിഡൻറ് ആൻറണി സെബാസ്റ്റ്യൻ അധ്യക്ഷതവഹിച്ചു. ടൂറിസം ഡെപ്യൂട്ടി ഡയറക്ടർ പ്രശാന്ത് വാസുദേവ്, ഡി.ടി.പി.സി. സെക്രട്ടറി ജിജേഷ് കരിയാട്, ഉത്തരവാദിത്വ ടൂറിസം മിഷൻ ജില്ലാ കോ ഓർഡിനേറ്റർ സരീഷ് എന്നിവർ ടൂറിസം സാധ്യതകൾ വിശദീകരിച്ചു. ജില്ലാ പഞ്ചായത്ത് അംഗം വി.ഗീത, പഞ്ചായത്ത് വൈസ് പ്രസിഡൻറ്‌ ഷാൻറി തോമസ്, പഞ്ചായത്തംഗങ്ങളായ ജിമ്മി അബ്രാഹം, ഷോജറ്റ് ചന്ദ്രംകുന്നേൽ, ശ്രീകുമാർ എന്നിവർ സംസാരിച്ചു.

സംഗമത്തിൽ പങ്കെടുത്ത ഡോ. ആഷിഖ് മാമു (മരിയ ഗ്രൂപ്പ്), അഷ്‌റഫ് ഹാജി (സെഞ്ചുറി ഗ്രൂപ്പ്), മുഹമ്മദാലി (താജ് ഹോട്ടൽ തലശ്ശേരി), ഷിനോയ് ലാസർ (ഗ്രീൻവാലി ഹോട്ടൽ), ഡി.അലി (അജ്മൽ ടൂർസ് & ട്രാവൽസ് എറണാകുളം), എച്ച്.ഹനീഫ, പി.കെ.അനൂപ്‌കുമാർ (റിട്ട. ഡി.എഫ്.ഒ.), ലോഷിൻ (വിൻഡ് വാലി ഹിൽ റിസോർട്ട്) എന്നിവർ അവരവരുടെ പ്രോജക്ടുകൾ വിശദീകരിച്ചു.