ഇരിട്ടി : ഇരിട്ടി മേഖലയിൽ വാഹനാപകടങ്ങൾ വർധിച്ച സാഹചര്യത്തിൽ മോട്ടോർ വാഹനവകുപ്പ് നടപടി കർശനമാക്കി. അനധികൃത പാർക്കിങ് ഉൾപ്പെടെയുള്ള ഗതാഗതനിയമ ലംഘനങ്ങൾക്കെതിരെ തിങ്കളാഴ്ചമാത്രം 20 കേസുകളെടുത്തു. 5000 രൂപ പിഴയീടാക്കി.

പയഞ്ചേരിമുക്ക്, കീഴൂർ മേഖലകളിൽ ‘നോ പാർക്കിങ്’ ബോർഡുകൾക്കടിയിൽപോലും നിർത്തിയിട്ട വാഹനങ്ങൾക്കെതിരെയാണ്‌ നടപടി. മേഖലയിൽ 10 ദിവസത്തിനുള്ളിൽ നാലുപേരാണ് അപകടത്തിൽ മരിച്ചത്. നിരവധി പേർക്ക് പരിക്കേറ്റു. റോഡുകളുടെ ഇരുവശവും കൈയേറിയുള്ള വാഹനപാർക്കിങ് കഴിഞ്ഞദിവസം ‘മാതൃഭൂമി’ റിപ്പോർട്ട് ചെയ്തിരുന്നു.

ഇത്തരം പാർക്കിങ് അപകടം ക്ഷണിച്ചുവരുത്തുന്നതും കാൽനടയാത്രക്കാർക്കുണ്ടാക്കുന്ന പ്രയാസങ്ങളും ചൂണ്ടിക്കാണിച്ചിരുന്നു. ഇതിനെത്തുടർന്നാണ് നിയമലംഘനങ്ങൾ കണ്ടെത്താൻ ഇരിട്ടി അസി. മോട്ടോർ വെഹിക്കിൾ ഇൻസ്പെക്ടർമാരുടെ നേതൃത്വത്തിൽ പരിശോധന തുടങ്ങിയത്.

വീതികൂട്ടി നവീകരിച്ച തലശ്ശേരി വളവുപാറ റോഡ് സ്ഥിരം അപകടമേഖലയായതോടെയാണ് ശക്തമായ നടപടി സ്വീകരിക്കാൻ തീരുമാനിച്ചത്. കോവിഡ് നിയന്ത്രണങ്ങൾ നീങ്ങിയതോടെ ഗതാഗതം പതിവുപോലെയായി. വളവുപാറ-മട്ടന്നൂർ റൂട്ടിൽ മാത്രം റോഡ് നവീകരിച്ചശേഷം 12 പേർക്കാണ് ജീവൻ നഷ്ടമായത്. അമിതവേഗവും അശ്രദ്ധയുമാണ് അപകടങ്ങൾ ക്ഷണിച്ചുവരുത്തുന്നതെന്നാണ് അധികൃതർ വിലയിരുത്തുന്നത്.

ഈ മാസം ആദ്യംമുതൽ ഇരിട്ടി താലൂക്കിൽ മോട്ടോർ വാഹനവകുപ്പ് പരിശോധന തുടങ്ങിയിരുന്നു. അമിതവേഗം, അനധികൃത പാർക്കിങ്, കാലഹരണപ്പെട്ട രേഖകൾ ഉപയോഗിക്കൽ, ഇരുചക്രവാഹനങ്ങളിലെ പിൻസീറ്റ് യാത്രക്കാർ ഹെൽമെറ്റ് ധരിക്കാത്തത് ഉൾപ്പെടെയുള്ള നിയമലംഘനങ്ങളാണ്‌ പിടികൂടിയത്.

11 ദിവസം കൊണ്ട് മോട്ടോർ വാഹനവകുപ്പ് 170 കേസുകളെടുത്തു. മൂന്നുലക്ഷത്തിലധികം രൂപ പിഴയീടാക്കി. പുതുവത്സരത്തലേന്ന്‌രാത്രി മാത്രം ഹെഡ്‌ലൈറ്റ് ഡിം ചെയ്യാത്തതിന്‌ 30 കേസുകളെടുത്തു.

അസി. മോട്ടോർ വെഹിക്കിൾ ഇൻസ്പെക്ടർമാരായ വി.ആർ.ഷനിൽകുമാർ, ഡി.കെ.ഷീജി എന്നിവരുടെ നേതൃത്വത്തിലായിരുന്നു പരിശോധന. നടപടികൾ ശക്തമായി തുടരും. വഴിയാത്രക്കാർ സീബ്രാവരയിലൂടെ റോഡ് മുറിച്ചുകടക്കുമ്പോൾ സമ്മതിക്കാതെ അമിതവേഗത്തിൽ പോകാൻ ശ്രമിക്കുന്ന ഡ്രൈവർമാർക്കും ഇരിട്ടി പാലത്തിലെയും പയഞ്ചേരിമുക്കിലെയും സിഗ്നൽ സംവിധാനം തെറ്റിക്കുന്നവർക്കെതിരെയും നടപടിയെടുക്കുമെന്ന് ഇരിട്ടി ജോ. ആർ.ടി.ഒ. എ.സി.ഷീബ അറിയിച്ചു.