തിരുവനന്തപുരം : ദാരിദ്ര്യരേഖയ്ക്ക് താഴെയുള്ള കുടുംബങ്ങളിൽ (ബി.പി.എൽ) കോവിഡ് മരണം ഉണ്ടായാൽ നൽകുന്ന പ്രതിമാസ ധനസഹായം സംബന്ധിച്ച അപേക്ഷകളിൽ വില്ലേജ് ഓഫിസർമാർ വീണ്ടും പരിശോധന നടത്തും. സഹായം നൽകേണ്ടതിന്റെ മാനദണ്ഡം സർക്കാർ പുതുക്കിയ സാഹചര്യത്തിലാണിത്. മരിച്ച വ്യക്തി 70 വയസ്സിനു മുകളിൽ ഉള്ളവരാണെങ്കിൽ ഭാര്യയ്ക്കോ ഭർത്താവിനോ മാത്രമേ ധനസഹായത്തിന് അർഹതയുണ്ടാകൂ. ഇവർ ജീവിച്ചിരിപ്പില്ലെങ്കിൽ ശാരീരിക, മാനസിക വെല്ലുവിളി നേരിടുന്ന വിഭാഗങ്ങളിൽ പെടുന്ന മക്കളെ മാത്രം പരിഗണിക്കും.

മരിച്ച വ്യക്തി 70 വയസ്സിൽ താഴെയുള്ളവരാണെങ്കിൽ ഭാര്യയോ ഭർത്താവോ ജീവിച്ചിരിപ്പുണ്ടെങ്കിൽ ധനസഹായം നൽകാം. അവരും ജീവിച്ചിരിപ്പില്ലെങ്കിൽ 21 വയസ്സിൽ താഴെയുള്ളവരും വ്യക്തിയെ ആശ്രയിച്ചു കഴിയുന്നവരുമായ മകനോ മകൾക്കോ (മക്കളിൽ മൂത്തയാൾക്ക്) മാത്രമേ ധനസഹായം അനുവദിക്കുകയുള്ളൂ. മരിച്ച വ്യക്തിയുടെ വരുമാനം ഒഴിവാക്കിയാൽ ബി.പി.എൽ പരിധിയിൽ വരുന്ന കുടുംബങ്ങളെയും പരിഗണിക്കും.

മുൻഗണന റേഷൻ കാർഡുകൾക്ക് പകരം തദ്ദേശ സ്ഥാപനങ്ങളുടെ ബി.പി.എൽ പട്ടിക മാത്രം മാത്രമാകും പരിഗണിക്കുക. വരുമാനദായകനായ വ്യക്തി മരിക്കുമ്പോൾ ബുദ്ധിമുട്ടിലാകുന്ന കുടുംബത്തെ സഹായിക്കാനാണ് പദ്ധതി എന്നും അതിനാലാണ് മാനദണ്ഡങ്ങൾ പുതുക്കുന്നതെന്നും സർക്കാർ വ്യക്തമാക്കി. ബി.പി.എൽ കുടുംബങ്ങളിൽ കോവിഡ് മരണം ഉണ്ടായാൽ ആശ്രിതർക്ക് 5000 രൂപ വീതം 36 മാസം ധനസഹായം നൽകുന്നതാണ് പദ്ധതി. ഈ ധനസഹായ വിതരണം ഇനിയും ആരംഭിച്ചിട്ടില്ല. കോവിഡ് ബാധിച്ച് മരിച്ച വ്യക്തികളുടെ ബന്ധുക്കൾക്ക് അടിയന്തര ധനസഹായമായ 50,000 രൂപയുടെ വിതരണമാണ് ഇപ്പോൾ നടക്കുന്നത്.