ന്യൂസ്ഹണ്ട് ഡസ്‌ക്‌

പേരാവൂർ: പേരാവൂർ സഹകരണ ഹൗസ് ബിൽഡിങ്ങ് സൊസൈറ്റി ചിട്ടിത്തട്ടിപ്പിൽ ആരോപണ വിധേയരായ സി.പി.എം.നേതാക്കൾക്കെതിരെ ജില്ലാ കമ്മിറ്റിയുടെ അച്ചടക്ക നടപടി.മുൻ പ്രസിഡന്റ് കെ.പ്രിയൻ,നിലവിലെ പ്രസിഡന്റ് ജിജീഷ്,മുൻ ഭരണസമിതിയംഗങ്ങളായ കെ.കരുണൻ,സി.മുരളീധരൻ,നിഷ,കെ.അജിത ,സൊസൈറ്റിയെ നിയന്ത്രിക്കുന്ന സബ് കമ്മിറ്റി കൺവീനർ കെ.സുധാകരൻ,സബ് കമ്മിറ്റി അംഗം കെ.എ.രജീഷ് എന്നിവർക്കെതിരെയാണ് ജില്ലാ കമ്മിറ്റി അച്ചടക്ക നടപടി സ്വീകരിച്ചത്.

സൊസൈറ്റിയുടെ സാമ്പത്തികക്രമക്കേടിൽ വിമർശം നേരിട്ട സി.പി.എം.പേരാവൂർ ഏരിയാ കമ്മിറ്റിക്കെതിരെ അച്ചടക്ക നടപടിയുടെ ഭാഗമായി താക്കീതും നല്കി.

സൊസൈറ്റി മുൻ പ്രസിഡന്റും സി.പി.എം.നിടുമ്പൊയിൽ ലോക്കൽ കമ്മിറ്റി മുൻ സെക്രട്ടറിയുമായിരുന്ന കെ.പ്രിയനെ പാർട്ടിയുടെ ലോക്കൽ കമ്മിറ്റിയംഗത്വത്തിൽ നിന്ന് കറ്റിയാട് ബ്രാഞ്ചിലേക്ക് തരം താഴ്ത്തി.സൊസൈറ്റിയുടെ സബ് കമ്മിറ്റി കൺവീനറും സി.പി.എം.പേരാവൂർ ഏരിയാ കമ്മിറ്റിയംഗവും പേരാവൂർ ബ്ലോക്ക് പഞ്ചായത്ത് പ്രസിഡന്റുമായ കെ.സുധാകരന് താക്കീത് നല്കി.

സബ് കമ്മിറ്റിയംഗവും പാർട്ടി പേരാവൂർ ലോക്കൽ സെക്രട്ടറിയുമായ കെ.എ.രജീഷ്,സൊസൈറ്റിയുടെ നിലവിലെ പ്രസിഡന്റ് ജിജീഷ്,ഭരണസമിതിയംഗങ്ങളായ കെ.കരുണൻ,സി.മുരളീധരൻ,നിഷ, കെ. അജിത എന്നിവർക്കും പാർട്ടി താക്കീത് നല്കി.

അതേസമയം,ജില്ലാ കമ്മിറ്റിയുടെ നടപടി റിപ്പോർട്ട് ചെയ്ത പേരാവൂർ ഏരിയാ കമ്മിറ്റിയുടെ അതേ യോഗത്തിൽ തന്നെ ജില്ലാ കമ്മിറ്റിയുടെ പാർട്ടിഅച്ചടക്ക നടപടിക്ക് വിധേയനായ കെ.സുധാകരനെ പാർട്ടി സെന്ററിലേക്ക് തിരഞ്ഞെടുത്തതും ചർച്ചയായിട്ടുണ്ട്.

ജില്ലാ കമ്മിറ്റിയുടെ അച്ചടക്ക നടപടിയും കെ.സുധാകരനെ പാർട്ടി സെന്ററിലേക്ക് തിരഞ്ഞെടുത്ത പേരാവൂർ ഏരിയാ കമ്മറ്റിയുടെ നടപടിയും റിപ്പോർട്ട് ചെയ്യാൻ വിളിച്ചു ചേർത്ത ലോക്കൽ കമ്മിറ്റികളിൽ ഏരിയാ നേതൃത്വത്തിനെതിരെ രൂക്ഷ വിമർശമുണ്ടായി.ഏരിയാ കമ്മിറ്റിയുടെ നടപടിക്കെതിരെ ബ്രാഞ്ച് കമ്മിറ്റികളിലും പാർട്ടി അണികൾക്കിടയിലും പ്രതിഷേധമുയർന്നിട്ടുണ്ട്.

സൊസൈറ്റി ചിട്ടി തട്ടിപ്പിൽ പേരാവൂർ ഏരിയാ കമ്മിറ്റി ഒന്നടങ്കം ശാസനക്ക് വിധേയമായിട്ടും പേരാവൂർ ഏരിയയിൽ നിന്നുള്ള ജില്ലാ കമ്മിറ്റിയംഗത്തിനെതിരെ പാർട്ടി നടപടി സ്വീകരിക്കാത്തതും ചർച്ചയായിട്ടുണ്ട്.