ഇരിട്ടി: നിർമാണം നിലച്ച പഴശ്ശി സാഗർ മിനി ജലവൈദ്യുതപദ്ധതിയുടെ പ്രധാന തുരങ്കത്തിന് സമീപമുണ്ടായ വൻ മണ്ണിടിച്ചിൽ പഴശ്ശിപദ്ധതിയുടെ സുരക്ഷയെ ബാധിക്കുന്നു. ജലസംഭരണിയിൽനിന്ന്‌ പ്രധാന തുരങ്കത്തിലേക്ക് വെള്ളം ഒഴുക്കിവിടേണ്ട ഭാഗത്താണ് മണ്ണിടിച്ചിലുണ്ടായത്. ഷട്ടർ അടച്ചതോടെയുണ്ടായ സമ്മർദമാണ് മണ്ണിടിച്ചലിന് കാരണമായത്. ഇടിഞ്ഞ ഭാഗത്തുനിന്ന്‌ വെള്ളം തുരങ്കത്തിലേക്ക് വീഴുകയാണ്. ഇത് തുരങ്കത്തെയും സംഭരണിയെയും വേർതിരിക്കുന്ന മൺത്തിട്ടയെ കൂടുതൽ ദുർബലമാക്കുന്നു.

കൂടുതൽ മണ്ണിടിച്ചൽ ഉണ്ടായാൽ സംഭരണയിലെ വെള്ളം പ്രധാന തുരങ്കത്തിലൂടെ ജലവൈദ്യുതപദ്ധതിയുടെ മറ്റ് മൂന്ന് ചെറിയ തുരങ്കം വഴി വളപട്ടണം പുഴയിലേക്ക് ഒഴുകാനുള്ള സാധ്യത ഏറെയാണ്. സംഭരണിക്കും തുരങ്കത്തിനും ഇടയിലെ മൺതിട്ടയിൽ പാറയുടെ പ്രതലം കാണുന്നതുവരെയുള്ള ഭാഗത്തെ മണ്ണ് ശക്തമായ കുത്തൊഴുക്കിൽ പോയാൽ പദ്ധതിയുടെ സംഭരണശേഷിയെ പ്രതികൂലമായി ബാധിക്കുമെന്ന് പറയുന്നു. ഇത് ജില്ലയിലേക്കുള്ള കുടിവെള്ളവിതരണത്തെയും പ്രതിസന്ധിയിലാക്കും.

ജില്ലയിലെ രണ്ടാമത്തെ ജലവൈദ്യുതപദ്ധതിയായ പഴശ്ശിസാഗർ പദ്ധതിയുടെ നിർമാണം പ്രതിസന്ധിയിലാണ്. നാലുമാസമായി ഒരു നിർമാണപ്രവൃത്തിയും നടക്കുന്നില്ല. പ്രവൃത്തിയിൽനിന്ന്‌ ഒഴിവാക്കിത്തരണമെന്ന് കാണിച്ച് നിർമാണം ഏറ്റെടുത്ത തമിഴ്‌നാട് ആസ്ഥാനമായ ആർ.എസ്. ഡെവലപ്പേഴ്‌സ് വൈദ്യുതി ബോർഡിന് കത്തുനൽകി. അടങ്കൽ തുക പുതുക്കണമെന്നും രണ്ട് പ്രളയത്തിലും വെള്ളം കയറിയുണ്ടായ അധികപ്രവൃത്തിക്ക് അനുപാതികമായി നഷ്ടപരിഹാരം അനുവദിക്കണമെന്നുമുള്ള നിർമാണ കമ്പനിയുടെ ആവശ്യം കെ.എസ്.ഇ.ബി. തള്ളിയതോടെയാണ് നിർമാണം നിലച്ചത്. ഈ വർഷം ഡിസംബറിൽ പൂർത്തിയാകേണ്ട തുരങ്കനിർമാണത്തിന്റെ 32 ശതമാനം മാത്രമാണ് രണ്ടുവർഷം കൊണ്ട് പൂർത്തിയായത്. .

കുടിവെള്ളത്തിനായി സംഭരിച്ച ജലം സംഭരണിയിൽനിന്ന്‌ തുരങ്കം വഴി വളപട്ടണം പുഴയിലേക്ക് പ്രവേശിക്കുന്നത് തടയാൻ അടിയന്തരമായി ഇടപെടണമെന്ന് കാണിച്ച് കെ.എസ്.ഇ.ബി.ക്ക് നിർദേശം നൽകിയതായി പഴശ്ശി ജലസേചനവിഭാഗം അസി. എക്സിക്യുട്ടീവ് എൻജിനീയർ അറിയിച്ചു. മൺതിട്ട ബലപ്പെടുത്തണം. ഇത് ഉടൻ ഉണ്ടാകുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. സംഭരണിയുടെ ഷട്ടർ തുറന്ന് വെള്ളം തുറന്നുവിടാൻ കഴിയില്ല. ഇക്കാര്യം ബന്ധപ്പെട്ടവരെ അറിയിച്ചിട്ടുണ്ടെന്നും അദ്ദേഹം പറഞ്ഞു.