ഇലക്ട്രിക് വാഹനങ്ങളിലെ ബാറ്ററികൾക്കുണ്ടാവുന്ന തകരാറുകൾ നാലുസെക്കൻഡിനകം കണ്ടെത്താൻ സംവിധാനം. ബെംഗളൂരു സാംസങ് സെമികണ്ടക്ടർ ഇന്ത്യാ റിസർച്ചിലെ (എസ്.എസ്.ഐ.ആർ.) മലയാളിയുടെ നേതൃത്വത്തിലുള്ള ഗവേഷകസംഘമാണ് സംവിധാനം വികസിപ്പിച്ചത്.

ലിഥിയം അയേൺ ബാറ്ററികളാണ് വൈദ്യുതിവാഹനങ്ങളിൽ ഉപയോഗിക്കുന്നത്. ബാറ്ററിത്തകരാറുകൾ കാരണം വാഹനങ്ങൾക്ക് തീപിടിക്കുന്ന സംഭവങ്ങളുണ്ടാവാറുണ്ട്. ഷോർട്ട് സർക്യൂട്ടുകളാണ് അപകടങ്ങൾക്കിടയാക്കുന്നത്. ബാറ്ററിസംവിധാനത്തിലെ ഷോർട്ട് സർക്യൂട്ടുകൾ (ട്യൂമറുകൾ) നേരത്തേ കണ്ടെത്താനായാൽ അപകടമൊഴിവാക്കാം.

ഇതിനായി ഇലക്ട്രൊ കെമിസ്ട്രി സാങ്കേതികവിദ്യ ഉപയോഗപ്പെടുത്തി തീവ്രതയേറിയ വൈദ്യുതി (ഹൈ മാഗ്നിറ്റിയൂഡ് പൾസ് കറന്റ്) കടത്തിവിട്ട് ബാറ്ററിയുടെ ആരോഗ്യം വിലയിരുത്തുന്ന പരിശോധനയാണ് ഗവേഷകർ വികസിപ്പിച്ചത്. പൾസ് കറന്റിനോടുള്ള ബാറ്ററിയുടെ പ്രതികരണം വിലയിരുത്തി തകരാറുകൾ കണ്ടെത്താനാവും.

നാലുസെക്കൻഡിൽ 98 ശതമാനം കൃത്യതയോടെ ബാറ്ററിയിലെ അപാകം വിലയിരുത്താം. അന്താരാഷ്ട്ര പ്രസിദ്ധീകരണമായ ജേണൽ ഓഫ് പവർ സോഴ്സിൽ പഠനം പ്രസിദ്ധീകരിച്ചു. കണ്ടെത്തലിന് പേറ്റന്റ് ലഭിക്കാൻ അപേക്ഷിച്ചിട്ടുണ്ട്. കോഴിക്കോട് സ്വദേശിയായ ഡോ. സാഗർ ഭരത്രാജിന്റെ നേതൃത്വത്തിലാണ് ഗവേഷണം നടന്നത്.