ജനുവരി മൂന്ന് മുതലാണ് 15-17 പ്രായക്കാർക്കുള്ള കോവിഡ് വാക്സിനേഷൻ ആരംഭിച്ചത്. ഭാരത് ബയോടെകിന്റെ കോവാക്സിനാണ് കൗമാരക്കാർക്ക് നൽകുന്നത്. എന്നാൽ, വാക്സിനെടുത്ത ശേഷം കൗമാരക്കാർക്ക് പാരസെറ്റമോൾ നൽകണമോ വേണ്ടയോ എന്ന കാര്യത്തിൽ രാജ്യത്തിന്റെ വിവിധ കോണുകളിൽ നിന്നും സംശയമുയർന്നിരുന്നു. ചില വാക്സിനേഷൻ കേന്ദ്രങ്ങൾ 500 mg യുടെ മൂന്ന് പാരസെറ്റമോൾ നൽകുകയും ചെയ്തു. ഇതോടെയാണ് ഇക്കാര്യത്തിൽ ഒരു വ്യക്തത വരുത്തിക്കൊണ്ട് കോവാക്സിൻ നിർമ്മാണ കമ്പനിയായ ഭാരത് ബയോടെക് ട്വിറ്ററിലൂടെ ഔദ്യോഗിക പ്രതികരണം പുറത്തിറക്കിയിരിക്കുന്നത്.

വാക്സിനെടുത്ത ശേഷം കൗമാരക്കാർക്ക് പാരസെറ്റമോളോ മറ്റ് ഏതെങ്കിലും വേദനസംഹാരികളോ നൽകേണ്ട ആവശ്യമില്ലെന്നാണ് ഭാരത് ബയോടെക്  വ്യക്തമാക്കിയിരിക്കുന്നത്. കോവാക്സിന്റെ ക്ലിനിക്കൽ ട്രയലുകൾ നടത്തിയ 30,000 ആളുകളിൽ ഏകദേശം 10-20 ശതമാനം പേരിൽ മാത്രമാണ് പാർശ്വഫലങ്ങൾ കണ്ടെത്തിയത്. ഇവരിൽ ഭൂരിഭാഗം പേർക്കും വളരെ ചെറിയ ലക്ഷണങ്ങൾ മാത്രമാണ് ഉണ്ടായത്. ഇവ ഒന്നോ രണ്ടോ ദിവസങ്ങൾക്കുള്ളിൽ തന്നെ യാതൊരു മരുന്നുകളുടെയും സഹായമില്ലാതെ തന്നെ മറികടക്കാനാകുമെന്നും എന്തെങ്കിലും ബുദ്ധിമുട്ട് അനുഭവപ്പെട്ടാൽ ഡോക്ടറെ കണ്ട് ഡോക്ടർ നിർദേശിക്കുന്ന മരുന്ന് മാത്രമേ കഴിക്കേണ്ടതുള്ളൂ എന്നും കമ്പനി വ്യക്തമാക്കി. മറ്റ് ചില വാക്സിൻ എടുത്തവർക്ക് പാരസെറ്റമോൾ നിർദേശിക്കുന്നുണ്ടെന്നും എന്നാൽ കോവാക്സിന് അത് ആവശ്യമില്ലെന്നും ഭാരത് ബയോടെക് ട്വീറ്റ് ചെയ്തു.

എന്നാൽ ഹെപ്പാറ്റോടോക്സിസിറ്റി എന്ന അവസ്ഥയ്ക്ക് ഇടയാക്കുമെന്നതിനാൽ കോവിഡ് വാക്സിനേഷന് ശേഷം പാരസെറ്റമോളോ വേദനസംഹാരികളോ കഴിക്കേണ്ടതില്ലെന്ന് ഇന്റേണൽ മെഡിസിൻ വിദഗ്ധൻ ഡോ. കേണൽ വിജയ് ദത്ത പറഞ്ഞു. കൗമാരക്കാർക്ക് കോവിഡ് വാക്സിൻ നൽകിയതിന് ശേഷം പാരസെറ്റമോൾ നൽകണമെന്ന് നിർദേശിക്കുന്നില്ല. കാരണം ഇത് ഹെപ്പാറ്റോടോക്സിസിറ്റി എന്ന അവസ്ഥയ്ക്ക് ഇടയാക്കും. മരുന്ന് മൂലം കരളിനുണ്ടാകുന്ന തകരാറുകളാണ് ഹെപ്പാറ്റോടോക്സിസിറ്റി എന്ന് പറയുന്നത്.

കോവിഡ് വാക്സിൻ സ്വീകരിച്ച കുട്ടികൾക്ക് എന്തെങ്കിലും പനിയോ മറ്റോ ഉണ്ടായാൽ മെഫെനാമിക് ആസിഡ് അല്ലെങ്കിൽ മെഫ്റ്റാൽ സിറപ്പ് ആണ് നൽകേണ്ടത്. 18 വയസ്സിന് മുകളിൽ പ്രായമുള്ളവർ കോവിഡ് വാക്സിനെടുത്ത് പനിയുണ്ടായാൽ പാരസെറ്റമോൾ കഴിക്കുന്നത് സുരക്ഷിതമാണെന്നും ഡോ. ദത്ത പറഞ്ഞു.