തിരുവനന്തപുരം: തൊഴുത്തിലോ, പാടത്തോ, പറമ്പിലോ എവിടെയുമാകട്ടെ, ഇനി ഒറ്റക്ലിക്കിലൂടെ പശു എവിടെയാണെന്നും എത്രലിറ്റർ പാലുകിട്ടുമെന്നുമുള്ള മുഴുവൻ വിവരങ്ങളും മൃഗസംരക്ഷണവകുപ്പിനറിയാം.

നെന്മണിയുടെ വലുപ്പമുള്ള ആർ.എഫ്.ഐ.ഡി. (റേഡിയോ ഫ്രീക്വൻസി ഐഡന്റിഫിക്കേഷൻ) ചിപ്പ് കന്നുകാലികളുടെ (പശു, എരുമ, ആട്) കാതിൽ ഘടിപ്പിച്ചശേഷം അവയെക്കുറിച്ചുള്ള മുഴുവൻ വിവരങ്ങളും ശേഖരിക്കുന്ന അനിമൽ ഐഡന്റിഫിക്കേഷൻ ട്രേസബിലിറ്റി പദ്ധതിയിലൂടെയാണിത്.

മൃഗസംരക്ഷണവകുപ്പും സാങ്കേതികവകുപ്പും ചേർന്ന് നടപ്പാക്കുന്ന പദ്ധതിയുടെ ധാരണാപത്രം മന്ത്രി ചിഞ്ചുറാണിയുടെ സാന്നിധ്യത്തിൽ മൃഗസംരക്ഷണവകുപ്പ് ഡയറക്ടർ കൗശിഗനും സാങ്കേതിക യൂണിവേഴ്‌സിറ്റി വൈസ് ചാൻസിലർ സജി ഗോപിനാഥും കൈമാറി.

റീബിൾഡ് കേരള ഇനീഷ്യേറ്റീവ് പദ്ധതിയിൽ അനുവദിച്ച 7.28 കോടി രൂപ ഉപയോഗിച്ച് പത്തനംതിട്ട ജില്ലയിൽ 75,000 കന്നുകാലികളിലാണ് ആദ്യഘട്ടത്തിൽ പദ്ധതി നടപ്പാക്കുന്നത്. കേരള സാങ്കേതിക സർവകലാശാലയ്ക്കാണ് നടത്തിപ്പുചുമതല. രാജ്യത്ത് ആദ്യമായാണ് ഇത്തരമൊരു പദ്ധതി.

ആർ.എഫ്.ഐ.ഡി. ടാഗ് ഘടിപ്പിച്ച കന്നുകാലിയുടെ 15 അക്ക തിരിച്ചറിയൽ നമ്പർ പോർട്ടബിൾ ആർ.എഫ്.ഐ.ഡി. റീഡറുകൾ ഉപയോഗിച്ച് മൃഗസംരക്ഷണ ഉദ്യോഗസ്ഥർക്കറിയാം. ഇ-ഹെൽത്ത് മാനേജ്‌മെന്റ് സംവിധാനത്തിലൂടെ കന്നുകാലികളുടെ മുഴുവൻ വിവരങ്ങളും ഡോക്ടർമാർക്കും മനസ്സിലാക്കാം. ചികിത്സാരേഖയായ ഇലക്‌ട്രോണിക് വെറ്ററിനറി മെഡിക്കൽ റെക്കോഡിലൂടെ രാത്രികാല അടിയന്തരചികിത്സയ്ക്കും ആശുപത്രിയുടെ ദൈനംദിന പ്രവർത്തനത്തിനും ഉപയോഗിക്കാം. ഇൻഷുറൻസ് കമ്പനികൾക്ക് കൃത്യവിവരങ്ങൾ മനസ്സിലാക്കാനും നഷ്ടപരിഹാരം സമയബന്ധിതമായി തീർപ്പാക്കാനും പദ്ധതി പ്രയോജനകരമാകും.

ആർ.എഫ്.ഐ.ഡി. ടാഗിങ്

ആർ.എഫ്.ഐ.ഡി. ടാഗുകൾ അണുവിമുക്തമാക്കിയ ഡിസ്‌പോസിബിൾ സിറിഞ്ച് ഉപയോഗിച്ച് കന്നുകാലികളുടെ ഇടതുചെവിയുടെ ചർമത്തിനുകീഴിൽ നിക്ഷേപിക്കും. മൈക്രോചിപ്പ് ഒരിക്കൽ ഘടിപ്പിച്ചാൽ ജീവിതാവസാനംവരെ ശരീരത്തിലുണ്ടാവും.

ലക്ഷ്യങ്ങൾ

* ഓരോ കന്നുകാലിയെയും തിരിച്ചറിയൽ.

* ഉടമകളായ ക്ഷീരകർഷകരെ തിരിച്ചറിയൽ.

* കന്നുകാലികളുടെയും കർഷകരുടെയും ഡേറ്റ ബേസ് ഉണ്ടാക്കൽ.

* പ്ലാസ്റ്റിക് ടാഗുകൾക്ക് പകരമുള്ള സംവിധാനം.

* കന്നുകാലികളിലെ രോഗവിവരശേഖരണം.

* മെച്ചപ്പെട്ട പാലുത്‌പാദനശേഷിയുള്ള കന്നുകാലികളെ കണ്ടെത്തൽ.

* തദ്ദേശീയമായ പശുക്കളെ തിരിച്ചറിയൽ.