ന്യൂഡൽഹി : നീറ്റ്‌ പി.ജി കൗൺസലിങ് ഉടൻ ആരംഭിക്കണമെന്ന്‌ സുപ്രീംകോടതി. നീറ്റ്‌ പിജി അഖിലേന്ത്യാ ക്വോട്ടയിൽ മുന്നോക്ക വിഭാഗത്തിലെ സാമ്പത്തികമായി പിന്നോക്കം നിൽക്കുന്നവർക്കും (ഇ.ഡബ്ല്യു.എസ്) ഒ.ബി.സി വിഭാഗങ്ങൾക്കും സംവരണം കോടതി അംഗീകരിച്ചു. ഉത്തരവോടെ കോടതി നടപടികളില്‍ കുരുങ്ങിക്കിടന്ന ഈ വര്‍ഷത്തെ പ്രവേശന നടപടികളിലെ അനിശ്ചിതത്വം നീങ്ങുകയാണ്. മുന്നോക്ക സംവരണത്തിനുള്ള വാര്‍ഷിക വരുമാന പരിധിയില്‍ ഈ വര്‍ഷത്തേക്ക് മാറ്റങ്ങള്‍ നടപ്പാക്കാനാകില്ലെന്ന കേന്ദ്ര സര്‍ക്കാര്‍ തീരുമാനത്തില്‍ കഴിഞ്ഞ രണ്ട് ദിവസങ്ങളിലായി കോടതി വാദം കേട്ടിരുന്നു. അതിന് ശേഷമാണ് ഇന്ന് ഉത്തരവിറക്കുന്നത്.

ദേശീയതാൽപര്യം മുൻനിർത്തി കൗൺസലിങ് എത്രയും വേഗം തുടങ്ങണമെന്ന്- ജസ്റ്റിസ്‌ ഡി വൈ ചന്ദ്രചൂഡ്‌ നിരീക്ഷിച്ചു. കൗൺസലിങ്ങുമായി മുന്നോട്ടുപോകാൻ അനുവദിക്കണമെന്ന്‌ കേന്ദ്രസർക്കാർ ആവശ്യപ്പെട്ടിരുന്നു.  നടപടി വൈകുന്നതിൽ യുവ ഡോക്‌ടർമാർ പ്രതിഷേധത്തിലാണ്. ഇ.ഡബ്ല്യു.എസ്‌ സംവരണത്തിന്‌ 8 ലക്ഷം വാർഷികവരുമാന പരിധി നിശ്ചയിച്ചതാണ്‌ കോടതി പ്രധാനമായും പരിശോധിച്ചത്‌. 

എന്നാൽ മുന്നോക്ക വിഭാഗത്തിലെ സാമ്പത്തികമായി പിന്നോക്കം നിൽക്കുന്നവർക്കുള്ള സംവരണത്തിന്റെ ഭരണഘടന സാധുത വിശദമായി പരിശോധിക്കാനാണ് കോടതിയുടെ തീരുമാനം. ഈ കേസ് മാർച്ച് മൂന്നിന് സുപ്രീം കോടതി വിശദമായി വാദം കേൾക്കും.