കേന്ദ്ര സർവീസിലെ വിവിധ ഗ്രൂപ്പ് ബി, ഗ്രൂപ്പ് സി തസ്‌തികകളിലെ ഒഴിവുകളിലേക്ക് സ്‌റ്റാഫ് സെലക്‌ഷൻ കമ്മിഷൻ (എസ്.എസ്.സി ) നടത്തുന്ന കംബൈൻഡ് ഗ്രാജ്വേറ്റ് ലെവൽ പരീക്ഷ 2021 ന് അപേക്ഷിക്കാം. 

ബിരുദധാരികൾക്കാണ് അവസരം. കേന്ദ്ര സർക്കാരിന്റെ കീഴിലുള്ള വിവിധ മന്ത്രാലയങ്ങളിലും വകുപ്പുകളിലും ഓഫിസുകളിലുമാണ് നിയമനം. ജനുവരി 23നകം ഓൺലൈനായി അപേക്ഷിക്കണം. ഒന്നാം ഘട്ട പരീക്ഷ ഏപ്രിലിൽ. 

യോഗ്യത

∙അ‌സിസ്റ്റന്റ് ഓഡിറ്റ് ഓഫിസർ/അസിസ്റ്റന്റ് അക്കൗണ്ട്സ് ഓഫിസർ: ബിരുദം. ചാർട്ടേഡ് അക്കൗണ്ടന്റ് അല്ലെങ്കിൽ കമ്പനി സെക്രട്ടറി അല്ലെങ്കിൽ കോസ്റ്റ് ആൻഡ് മാനേജ്മെന്റ് അക്കൗണ്ടന്റ് അല്ലെങ്കിൽ മാസ്റ്റേഴ്സ് ഇൻ കൊമേഴ്സ്/ബിസിനസ് സ്റ്റഡീസ്/ബിസിനസ് അഡ്മിനിസ്ട്രേഷൻ(ഫിനാൻസ്)/ബിസിനസ് ഇക്കണോമിക്സ് അഭിലഷണീയ യോഗ്യതയാണ്. പ്രബേഷൻ കാലയളവിൽ സബോർഡിനേറ്റ് ഓഡിറ്റ്/അക്കൗണ്ട്സ് സർവീസ് പരീക്ഷ പാസാകണം. 

∙ജൂനിയർ സ്‌റ്റാറ്റിസ്‌റ്റിക്കൽ ഓഫിസർ: സ്‌റ്റാറ്റിസ്‌റ്റിക്‌സ് പ്രധാന വിഷയങ്ങളിലൊന്നായി പഠിച്ച ഏതെങ്കിലും ബിരുദം. അല്ലെങ്കിൽ പ്ലസ്‌ ടു തലത്തിൽ മാത്തമാറ്റിക്‌സ് 60% മാർക്കോടെ നേടിയശേഷം ഏതെങ്കിലും വിഷയത്തിൽ ബിരുദം.

∙സ്‌റ്റാറ്റിസ്‌റ്റിക്കൽ ഇൻവെസ്റ്റിഗേറ്റർ ഗ്രേഡ് 2: സ്‌റ്റാറ്റിസ്‌റ്റിക്‌സ് ഒരു വിഷയമായി പഠിച്ച ഏതെങ്കിലും ബിരുദം. ബിരുദപഠനത്തിന്റെ മൂന്നു വർഷവും സ്‌റ്റാറ്റിസ്‌റ്റിക്‌സ് ഒരു വിഷയമായി പഠിച്ചിരിക്കണം. 

∙അസിസ്റ്റന്റ് ഇൻ നാഷനൽ കമ്പനി ലോ അപ്‌ലറ്റ് ട്രൈബ്യൂണൽ: അംഗീകൃത ബിരുദം. നിയമബിരുദം അഭിലഷണീയം

∙റിസർച് അസിസ്റ്റന്റ് ഇൻ നാഷനൽ ഹ്യൂമൻ റൈറ്റ്സ് കമ്മിഷൻ: അംഗീകൃത ബിരുദം, ഒരു വർഷ റിസർച് പരിചയം, നിയമം/ഹ്യൂമൻ റൈറ്റ്സ് ബിരുദം അഭിലഷണീയം

∙മറ്റു തസ്തികകളിൽ ഏതെങ്കിലും അംഗീകൃത സർവകലാശാല ബിരുദം/തത്തുല്യം. 

 അപേക്ഷാഫീസ്: 100 രൂപ. സ്‌റ്റേറ്റ് ബാങ്ക് ഓഫ് ഇന്ത്യ വഴി അടയ്‌ക്കണം. ബാങ്ക് ചെലാൻ മുഖേനയോ നെറ്റ് ബാങ്കിങ്, ക്രെഡിറ്റ്, ഡെബിറ്റ് കാർഡ് മുഖേനയോ ഫീസടയ്‌ക്കാം. ഇതിനുള്ള നിർദേശങ്ങൾ വെബ്‌സൈറ്റിൽ. വനിതകൾക്കും എസ്‌സി, എസ്ടി വിഭാഗക്കാർക്കും ഭിന്നശേഷിക്കാർക്കും വിമുക്തഭടൻമാർക്കും ഫീസില്ല.

∙കേരള, കർണാടക റീജനിലെ (KKR) പരീക്ഷാകേന്ദ്രങ്ങൾ: എറണാകുളം, കണ്ണൂർ, കൊല്ലം, കോട്ടയം,കോഴിക്കോട്, തൃശൂർ, തിരുവനന്തപുരം.

 പരീക്ഷ നാലു ഘട്ടമായി: ഒന്നാം ഘട്ടം–കംപ്യൂട്ടർ അധിഷ്ഠിത പരീക്ഷ (200 മാർക്ക്), രണ്ടാം ഘട്ടം–കംപ്യൂട്ടർ അധിഷ്ഠിത പരീക്ഷ (200 മാർക്ക്), മൂന്നാം ഘട്ടം–എഴുത്തുപരീക്ഷ (ഡിസ്ക്രിപ്റ്റീവ്–100 മാർക്ക്), നാലാം ഘട്ടം–പ്രൊഫിഷ്യൻസി ടെസ്‌റ്റ് അല്ലെങ്കിൽ സ്‌കിൽ ടെസ്‌റ്റ്. 

ശാരീരിക യോഗ്യത, പരീക്ഷകളുടെ വിശദമായ സിലബസ് തുടങ്ങിയവ ഔദ്യോഗിക വെബ്‌സൈറ്റിൽ https://ssc.nic.in