ഇരിട്ടി : ഇരിട്ടി ബ്ലോക്ക് പഞ്ചായത്തിന്റെ നേതൃത്വത്തിൽ ജനകീയ പങ്കാളിത്തത്തോടെ കീഴ്‌പ്പള്ളി സാമൂഹികാരോഗ്യകേന്ദ്രത്തിൽ ഡയാലിസിസ് സെന്റർ തുടങ്ങാൻ നടപടി തുടങ്ങി. ബ്ലോക്ക് പഞ്ചായത്ത് പരിധിയിൽ നൂറോളം വൃക്കരോഗികൾ ഇപ്പോൾ ഡയാലിസിസിന് വിധേയമാകുന്നുണ്ട്. ഇതിൽ പകുതിയിലധികംപേരും സാമ്പത്തികമായി നിർധന കുടുംബങ്ങളിൽനിന്നുള്ളവരാണ്.

ആദ്യഘട്ടത്തിൽ ഒരുകോടിരൂപ ചെലവുവരുന്ന പദ്ധതിയിലേക്കായി ഇരിട്ടി ബ്ലോക്ക് പഞ്ചായത്ത് പദ്ധതിവിഹിതമായി 60 ലക്ഷംരൂപ വകയിരുത്തി. തുടക്കത്തിൽ നാല് ഡയാലിസിസ് യന്ത്രങ്ങളാണ്‌ സ്ഥാപിക്കുക. പ്രതിദിനം എട്ടുപേർക്ക്‌ ഡയാലിസിസ് നടത്താനാകും. ആഴ്ചയിൽ 20 രോഗികൾക്ക്‌ സേവനം ലഭിക്കും.

നിലവിലുള്ള കെട്ടിടസൗകര്യം ഉപയോഗപ്പെടുത്തിയാണ് നാല് യന്ത്രങ്ങൾ സ്ഥാപിക്കുക. ബ്ലോക്ക് പഞ്ചായത്ത് ഫണ്ടിൽ 27 ലക്ഷം രൂപ മെഡിക്കൽ ഉപകരണങ്ങൾ വാങ്ങാനും കുഴൽക്കിണറും ജലസംഭരണിയും സ്ഥാപിക്കാൻ 15 ലക്ഷവും 80 എച്ച്.പി.യുടെ മോട്ടോർ വാങ്ങാൻ 15 ലക്ഷവും കെട്ടിട അറ്റകുറ്റപ്പണിക്ക് മൂന്നുലക്ഷം രൂപയും വിനിയോഗിക്കും.

ഇരിട്ടി ബ്ലോക്ക് പഞ്ചായത്ത് പരിധിയിലുള്ള രോഗികൾക്ക് മൂന്നുവർഷമായി ഡയാലിസിസ് കിറ്റ് വിതരണം ചെയ്യുന്നുണ്ട്. 15 ലക്ഷം രൂപവീതം ഇതിനായി ചെലവഴിക്കുന്നുണ്ട്. കിറ്റ് ലഭിച്ചാൽപോലും വണ്ടിക്കൂലിയും മറ്റു ചെലവുകളും ചേർക്കുമ്പോൾ ശരാശരി ഒരു രോഗിക്ക്‌ 1000 രൂപവരെ ഒരു ഡയാലിസിസിന്‌ ചെലവാകുന്നുണ്ട്.

നിർധനരായ രോഗികൾക്ക്‌ ഈ ചെലവ് താങ്ങാനാകാത്ത സാഹചര്യത്തിലാണ്‌ ബ്ലോക്ക് പഞ്ചായത്ത് നിയന്ത്രണത്തിലുള്ള കീഴ്പള്ളി സി.എച്ച്‌.സി.യിൽ ഡയാലിസിസ് സെന്റർ തുടങ്ങുന്നതെന്ന്‌ പ്രസിഡന്റ് കെ.വേലായുധൻ പറഞ്ഞു. ഘട്ടംഘട്ടമായി 10 ഡയാലിസിസ് യന്ത്രങ്ങളോടെ ഡയാലിസിസ് സെന്റർ വിപുലപ്പെടുത്തും. പുതിയ കെട്ടിടവും പണിയും. ആറളം പഞ്ചായത്തിൽമാത്രം 17 വൃക്ക രോഗികളുണ്ട്.  നടത്തിപ്പുചെലവുകൾ ബ്ലോക്ക് പഞ്ചായത്തും നാഷണൽ റൂറൾ ഹെൽത്ത് മിഷനും ചേർന്ന്‌ കണ്ടെത്തും.

ജനകീയപങ്കാളിത്തത്തോടെ 40 ലക്ഷം രൂപയും സമാഹരിക്കും. ഇതിനായി ബ്ലോക്ക് പഞ്ചായത്ത് പ്രസിഡന്റ് കെ.വേലായുധൻ ചെയർമാനും സ്ഥിരംസമിതി അധ്യക്ഷൻ കെ.രതീഷ് വൈസ് ചെയർമാനും ആറളം പഞ്ചായത്ത് പ്രസിഡന്റ് കെ.പി.രാജേഷ് കൺവീനറും മെഡിക്കൽ ഓഫിസർ ഡോ. പ്രിയ സദാനന്ദൻ ജോയിന്റ് കൺവീനറുമായി വിപുലമായ ജനകീയകമ്മിറ്റി രൂപവത്കരിച്ചു.