കണ്ണൂർ: കഴിഞ്ഞദിവസം മാവേലി എക്സ്‌പ്രസിൽ എ.എസ്.ഐ.യുടെ മർദ്ദനത്തിനിരയായ ആളെ തിരിച്ചറിഞ്ഞു. പീഡനമടക്കം നിരവധി ക്രിമിനൽ കേസുകളിലെ പ്രതിയായ കൂത്തുപറമ്പ് നീര്‍വേലി സ്വദേശി ഷമീര്‍(50) എന്ന ‘പൊന്നന്‍ ഷമീറാ’ണ് അതെന്നാണ് പൊലീസ് തിരിച്ചറിഞ്ഞത്. ഇയാളെ കണ്ടെത്താൻ കഴിഞ്ഞിട്ടില്ല. പൊലീസ് അന്വേഷണം വ്യാപിപ്പിച്ചിട്ടുണ്ട്. മുന്നിലുള്ളത് കൊടുംക്രിമിനലാണെന്ന് അറിയാതെയാണ് എ.എസ്.ഐ ഷമീറിനെ ട്രെയിനിൽ നിന്ന് ഇറക്കിവിട്ടത്. നിരവധി കേസുകളിൽ ശിക്ഷിക്കപ്പെട്ട ഷമീർ ഇപ്പോൾ ഇരിക്കൂറിലാണ് താമസമെന്നാണ് പൊലീസ് പറയുന്നത്. 

കഴിഞ്ഞദിവസമാണ് മദ്യപിച്ച് ലക്കുകെട്ട് ടിക്കറ്റില്ലാതെ ട്രെയിൻ യാത്രചെയ്ത ഷമീറിനെ എ.എസ്.ഐ ബൂട്ടിട്ട് ചവിട്ടുന്ന ദൃശ്യങ്ങൾ പുറത്തുവന്നത്. ഇത് വൻ വിവാദമാവുകയും  എ.എസ്.ഐ. ക്കെതിരെ വകുപ്പുതല നടപടി എടുക്കുകയും ചെയ്തു. തുടർന്നാണ് മർദ്ദനമേറ്റ ആളെ കണ്ടെത്താൻ പൊലീസ് അന്വേഷണം നടത്തിയത്. പുറത്തുവന്ന വീഡിയോ ദൃശ്യങ്ങളും വടകര സ്‌റ്റേഷനിലെ സിസിടിവി ദൃശ്യങ്ങളും പരിശോധിച്ചാണ് ഷമീറിനെ തിരിച്ചറിഞ്ഞത്. ചിത്രങ്ങൾ ഷമീറിന്റെ ബന്ധുക്കളും തിരിച്ചറിഞ്ഞിട്ടുണ്ടെന്നാണ് റിപ്പോർട്ട്.

സ്‌ത്രീപീഡനക്കേസിലും വധശ്രമക്കേസിലും ഇയാൾ പ്രതിയായിരുന്നു. കൂത്തുപറമ്പ്‌ ഗോകുലതെരുവിലെ ക്ഷേത്രത്തിലെ ഭണ്ഡാരം കുത്തിത്തുറന്ന്‌ പണം മോഷ്‌ടിച്ചതും  ഷമീറായിരുന്നു. സ്ഥിരമായി കുറ്റകൃത്യത്തിൽ ഏർപ്പെടുന്നയാളായി പൊലീസിന്റെ പട്ടികയിലുള്ളയാളാണ്‌ ഷമീർ. ബന്ധുവായ പെൺകുട്ടിയെ തട്ടിക്കൊണ്ടുവന്ന കേസിലും ഇയാൾ പ്രതിയായിരുന്നു.