തലശ്ശേരി : തിരുവങ്ങാട് മുളിയിൽനടയിൽ ജനകീയ കൂട്ടായ്മയിൽ മൈതാനം നിർമിക്കുന്നു. ഇതിനായി 25 സെന്റ് ഭൂമി വിലകൊടുത്ത് വാങ്ങാൻ ജനകീയ കമ്മിറ്റിക്ക് രൂപം നൽകി. ഭൂമി വാങ്ങാൻ 70 ലക്ഷം രൂപയാണ് ചെലവ് പ്രതീക്ഷിക്കുന്നത്. നാട്ടുകാരിൽനിന്ന് തുക സമാഹരണം തുടങ്ങി. മുളിയിൽനട ഇ.എം.എസ്. സ്മാരക ഗ്രന്ഥാലയം മുൻകൈയെടുത്താണ് മൈതാനം നിർമിക്കുന്നത്. ഗ്രന്ഥാലയത്തിന്റെ പരിസരത്തുള്ള വീടുകളിൽനിന്ന്‌ നവമാധ്യമങ്ങളിലൂടെയും ധനസമാഹരണം നടത്താനാണ് തീരുമാനം. സ്ഥലം വാങ്ങിയാൽ ഭാവിയിൽ ഇൻഡോർ സ്റ്റേഡിയമാണ് ലക്ഷ്യമിടുന്നത്. 

മൈതാനത്ത്‌ ഫുട്ബോൾ, വോളിബോൾ എന്നിവയിൽ സൗജന്യ പരിശീലനം നൽകാൻ സൗകര്യമൊരുക്കും. സ്ഥലം ലഭിച്ചാൽ സ്റ്റേഡിയം നിർമാണത്തിന് സർക്കാർ സഹായം ലഭിക്കുമെന്ന പ്രതീക്ഷയിലാണ് ജനകീയ കമ്മിറ്റി. നേരത്തെ ഇവിടെയുണ്ടായിരുന്ന കളിസ്ഥലങ്ങൾ ഇപ്പോൾ ഇല്ലാതായി. പുതിയൊരു കളിസ്ഥലം കണ്ടെത്തി കായികപരിശീലനത്തിന് സൗകര്യമൊരുക്കുകയാണ് ലക്ഷ്യം.

മദ്യം, മയക്കുമരുന്ന് പോലുള്ള ലഹരിവസ്തുക്കളിൽനിന്ന് പുതുതലമുറയെ കായികമേഖലയിലേക്ക് നയിക്കുകയെന്ന ലക്ഷ്യവും മൈതാനം നിർമാണമെന്ന ആശയത്തിനുപിന്നിലുണ്ട്. മലബാർ കാൻസർ സെന്ററിനും താലൂക്ക് ആയുർവേദ ആസ്പത്രിയ്ക്കും സമീപത്തായാണ് ഭൂമി ഏറ്റെടുക്കുന്നത്. സ്ഥലമെടുപ്പിനുള്ള കമ്മിറ്റി രൂപവത്കരണയോഗം കാരായി ചന്ദ്രശേഖരൻ ഉദ്ഘാടനംചെയ്തു. ഡോ. പ്രദീപ്കുമാർ അധ്യക്ഷനായി. സി.എൻ. ജിഥുൻ, കെ.പി. അരുൺകുമാർ, പി.വി. വിജയൻ, ബേബി സുജാത,പി. പ്രമോദ്, എം.എ. സുധീഷ് എന്നിവർ സംസാരിച്ചു.

സംഘാടകസമിതി ഓഫീസ് എ.എൻ.ഷംസീർ എം.എൽ.എ ഉദ്ഘാടനംചെയ്തു. സഹായങ്ങൾ ഐ.ഡി.ബി.ഐ. ബാങ്കിലെ 1154104000137461 അക്കൗണ്ട് നമ്പറിൽ അയക്കാം. ഗൂഗിൾപേ: 7306347177. 

ഭാരവാഹികൾ: ഡോ. പ്രദീപ്കുമാർ (ചെയ.), പി. പ്രമോദ് (കൺവീനർ), സതീന്ദ്രൻ കൂടത്തിൽ (ഖജാ).