പേരാവൂർ: പേരാവൂരിലെ 108 ആമ്പുലൻസ് ഡ്രൈവറെ അകാരണമായി സ്ഥലം മാറ്റിയതിൽ പ്രതിഷേധിച്ച ആമ്പുലൻസ് ജീവനക്കാർ പ്രത്യക്ഷ സമരത്തിലേക്ക്. ഗർഭിണിയായ അമ്മയെയും കുഞ്ഞിനെയും അടിയന്തര സാഹചര്യത്തിൽ രക്ഷപ്പെടുത്തിയ പേരാവൂരിലെ 108 ആമ്പുലൻസ് ഡ്രൈവർ എ. പി. ധനേഷിനെ സ്ഥലം മാറ്റുകയും പിന്നീട് ജോലിയിൽ നിന്നും പിരിച്ച് വിടുകയും ചെയ്ത സാഹചര്യത്തിലാണ് ജീവനക്കാർ സമരം തുടങ്ങിയത്.കണ്ണൂർ പ്രോഗ്രാം മാനേജർ അഭിജിത്തിൻ്റെ അന്യായമായ നടപടിയിൽ പ്രതിഷേധിച്ചാണ് ഇന്നലെ രാവിലെ എട്ട് മുതൽ പേരാവൂരിലെ 108 ആമ്പുലൻസ് ജീവനക്കാർ പണിമുടക്കുന്നത്. സമരത്തെത്തുടർന്ന് മറ്റൊരിടത്ത് നിന്ന് പേരാവൂരിലെത്തിച്ച 108 ആമ്പുലൻസ് പേരാവൂരിലെ ജീവനക്കാർ തടയുകയും ചെയ്തിട്ടുണ്ട്. കഴിഞ്ഞ മാസം അമ്മയെയും കുഞ്ഞിനെയും അടിയന്തര സാഹചര്യത്തിൽ കണ്ണൂരിലെ സ്വകാര്യ ആസ്പത്രിയിൽ ധനേഷ് എത്തിക്കുകയും ഇരുവരുടെയും ജീവൻ രക്ഷിക്കുകയും ചെയ്തിരുന്നു. സ്വകാര്യ ആസ്പത്രി അവരുടെ കച്ചവട താത്പര്യാർത്ഥം 108 ആമ്പുലൻസ് ജീവനക്കാരെ പേരാവൂരിലെ ആസ്പത്രിലെത്തി മെമെന്റോ നല്കി ആദരിക്കുകയും ചെയ്തിരുന്നു. ഇതാണ് ജോലിയിൽ നിന്ന് പിരിച്ചു വിടാൻ കാരണമെന്ന് ധനേഷ് പറയുന്നു. 108 ആമ്പുലൻസ് എംപ്ലോയീസ് യൂണിയൻ സംസ്ഥാന സെക്രട്ടറിയും പേരാവൂർ നാല്പാടി സി. പി. എം ബ്രാഞ്ച് സെക്രട്ടറിയുമാണ് എ.പി .ധനേഷ്. സ്വകാര്യ ആസ്പത്രി പേരാവൂർ താലൂക്കാസ്പത്രിയിൽ സംഘടിപ്പിച്ച ആദരവ് ചടങ്ങിലേക്ക് താലൂക്കാസ്പത്രി ജീവനക്കാരാണ് ക്ഷണിച്ചതെന്ന് ധനേഷ് പറഞ്ഞു. ഇതിന്റെ പേരിലാണ് 108 ആമ്പുലൻസ് നടത്തിപ്പുകാരായ എംറി ഗ്രീൻസ് ആമ്പുലൻസ് സർവീസ് ടീം തന്നെ പിരിച്ചു വിട്ടത്. ഇത് അന്യായമാണ്, ഇക്കാര്യത്തിൽ ന്യായമായ തീരുമാനം ഉണ്ടാകും വരെ യൂണിയൻ സമര രംഗത്തുണ്ടാവുമെന്നും ധനേഷ് പറഞ്ഞു.

കണ്ണൂർ: എ.ഡി.എം നവീൻ ബാബുവിൻ്റെ ദുരൂഹ മരണത്തിനു കാരണക്കാരിയായ ജില്ലാ പഞ്ചായത്ത് പ്രസിഡന്റ് പി.പി ദിവ്യക്കെതിരെ കൊലകുറ്റത്തിന് കേസെടുക്കണമെന്ന് ആവശ്യപ്പെട്ട് കണ്ണൂർ കോർപ്പറേഷൻ പരിധിയിൽ നാളെ രാവിലെ 6 മുതൽ വൈകുന്നേരം 6 വരെ ബി.ജെ.പി ഹർത്താൽ ആചരിക്കും.അവശ്യ സർവീസുകളെയും വാഹനങ്ങളെയും ഹോട്ടലുകളെയും ഹർത്താലിൽ നിന്ന് ഒഴിവാക്കിയിട്ടുണ്ട്. 

കൊട്ടിയൂർ: കണ്ടപ്പനത്തെ ചെറുപ്ലാവിൽ ഷാജു ജോസഫ് (55) ആണ് മരം മുറിക്കുന്നതിനിടെ മരത്തിൻ്റെ ശിഖരം തലയിലിടിച്ചുണ്ടായ അപകടത്തിൽ മരിച്ചത്. ഇന്ന് രാവിലെ 10 മണിയോടെയാണ് അപകടം.