ക​ണ്ണൂ​ർ: ട്രെ​യി​നി​ൽ ക​മ്പാ​ർ​ട്ട്മെ​ന്‍റ് മാ​റി ക​യ​റി​യ​തി​ന്‍റെ പേ​രി​ൽ യാ​ത്ര​ക്കാ​ര​നെ അടിച്ചു താഴെയിട്ട് ചവിട്ടി വെളിയിൽ തള്ളി പോ​ലീ​സ് ക്രൂ​ര​ത. ഞാ​യ​റാ​ഴ്ച രാ​ത്രി ക​ണ്ണൂ​രി​ൽ മാ​വേ​ലി എ​ക്സ്പ്ര​സി​ലാ​ണ് സം​ഭ​വം. റെ​യി​ൽവേ ഡ്യൂ​ട്ടി​ക്ക് ഡപ്യൂട്ടേഷനിൽ നി​യോ​ഗി​ച്ച കേ​ര​ള പോ​ലീ​സി​ലെ എ.എസ്.ഐ. പ്ര​മോ​ദാ​ണ് യാ​ത്ര​ക്കാ​ര​നെ മു​ഖ​ത്ത​ടി​ച്ച് നി​ല​ത്ത് വീ​ഴി​ക്കു​ക​യും നെ​ഞ്ചി​ൽ ച​വി​ട്ടി വെളിയിൽ തള്ളുകയും ചെയ്തത്.

ജ​ന​റ​ൽ കമ്പാ​ർ​ട്ട്മെ​ന്‍റി​ലെ ടി​ക്ക​റ്റാ​യി​രു​ന്നു യാ​ത്ര​ക്കാ​ര​ന്‍റെ കൈ​വ​ശ​മു​ണ്ടാ​യി​രു​ന്നതെന്ന് കരുതുന്നു. എ​ന്നാ​ൽ, ഇ​യാ​ൾ സ്ലീ​പ്പ​ർ ക്ലാ​സി​ൽ മാ​റി ക​യ​റു​ക​യാ​യി​രു​ന്നു. ഈ ​സ​മ​യം ടി​ക്ക​റ്റ് പ​രി​ശോ​ധ​ന​യ്ക്കെ​ത്തി​യ എ.എസ്.ഐ പ്ര​മോ​ദും സി.പി.​ഒ രാ​ഗേ​ഷും യാ​ത്ര​ക്കാ​ര​നോ​ട് ടി​ക്ക​റ്റ് ആ​വ​ശ്യ​പ്പെ​ട്ടു. ഇ​യാ​ൾ പേ​ഴ്സി​ൽനി​ന്ന് ടി​ക്ക​റ്റ് പരതുന്നതിനിടെ പ്ര​കോ​പി​ത​നാ​യ എ.എസ്.ഐ ഇ​യാ​ളു​ടെ കോ​ള​റി​ൽ പി​ടി​ച്ചു വ​ലി​ക്കു​ക​യും മു​ഖ​ത്ത് അ​ടി​ച്ചു നി​ല​ത്തു​വീ​ഴ്ത്തുകയും ചെ​യ്തു. നി​ല​ത്തു വീ​ണ് കി​ട​ന്ന യാ​ത്ര​ക്കാ​ര​ന്‍റെ നെ​ഞ്ചി​ൽ  പ്ര​മോ​ദ് ഷൂ​സി​ട്ട് ച​വിട്ടി പുറത്തേക്ക് തള്ളുകയും ചെ​യ്തു. തു​ട​ർ​ന്ന് രാ​ത്രി​യി​ൽ ഇ​യാ​ളെ വ​ട​ക​ര റെ​യി​ൽ​വേ സ്റ്റേ​ഷ​നി​ൽ ഇ​റ​ക്കി വി​ടു​ക​യാ​യി​രു​ന്നു.‌

സം​ഭ​വ​ത്തി​ന്‍റെ ദൃ​ശ്യ​ങ്ങ​ൾ പു​റ​ത്തു​വ​ന്നി​ട്ടു​ണ്ട്. മ​റ്റൊ​രു യാ​ത്ര​ക്കാ​ര​നാ​ണ് ഇ​തു പ​ക​ർ​ത്തി​യ​ത്. എ​ന്നാ​ൽ മ​ദ്യ​പി​ച്ചു ട്രെ​യി​നി​ൽ ക​യ​റി​യ ആ​ളെ ഇ​റ​ക്കി​വി​ടു​ക മാ​ത്ര​മാ​ണ് ചെ​യ്ത​തെ​ന്നും മ​ർ​ദി​ച്ചി​ട്ടി​ല്ലെ​ന്നു​മാ​ണ് എ.എസ്.ഐ.യു​ടെ പ്ര​തി​ക​ര​ണം. 

താങ്കൾ യാത്രക്കാരന്‍റെ നെഞ്ചിൽ ചവിട്ടിയോ എന്നു മാധ്യമപ്രവർത്തകൻ ചോദിച്ചപ്പോൾ ഏയ് നമ്മൾ അങ്ങനെയൊക്കെ ചെയ്യുമോ? അപമര്യാദയായി പെരുമാറരുതെന്ന് ഡി.ജി.പി.യുടെ സർക്കുലർ ഉള്ളതല്ലേ. അതുകൊണ്ട് ഞങ്ങൾ അങ്ങനെ ചെയ്യുമോ എന്നതായിരുന്നു പോലീസുകാരന്‍റെ പ്രതികരണം.

യാത്രക്കാരൻ മര്യാദയോടെ ഇരിക്കുന്നതിനിടെയാണ് ടിക്കറ്റ് ചോദിച്ച് പൊലീസ് എത്തിയതെന്ന് ദൃശ്യങ്ങൾ പകർത്തിയ പേരുവെളിപ്പെടുത്താൻ ആഗ്രഹിക്കാത്ത യാത്രക്കാരൻ പറഞ്ഞു. യാതൊരു പ്രകോപനവും ഇല്ലാതെയാണ് ബൂട്ടിട്ട് ചവിട്ടുകയും മർദ്ദിക്കുകയും ചെയ്തത്. ക്രൂരമായ മർദ്ദനം കണ്ടതോടെ ഇടപെട്ടു. എന്നാൽ മറ്റ് യാത്രക്കാരുടെ സുരക്ഷക്ക് വേണ്ടിയാണ് ഇത് ചെയ്യുന്നതെന്നായിരുന്നു പൊലീസുകാരന്റെ വിശദീകരണം. ദൃശ്യങ്ങൾ പകർത്തുന്നത് ശ്രദ്ധയിൽപ്പെട്ടതോടെ പൊലീസുകാരൻ തന്നോട് ടിക്കറ്റ് കാണിക്കാൻ ആവശ്യപ്പെട്ടുവെന്നും എന്നാൽ ടി.ടി.ഇ യെ മാത്രമേ ടിക്കറ്റ് കാണിക്കൂ എന്ന് താൻ പറഞ്ഞുവെന്നും ദൃശ്യങ്ങൾ പകർത്തിയ യാത്രക്കാരൻ പറഞ്ഞു. മർദ്ദനമേറ്റ യാത്രക്കാരൻ മദ്യപിച്ചിട്ടുണ്ടോ എന്ന കാര്യത്തിൽ വ്യക്തതയില്ല. മദ്യപിച്ചിട്ടുണ്ടെങ്കിൽ അതിനുള്ള നിയമനടപടികളെടുക്കുകയാണ് വേണ്ടതെന്നിരിക്കെ ക്രൂരമായി  മർദ്ദിക്കുകയാണ് പൊലീസുകാരൻ ചെയ്തതെന്നും ദൃശ്യങ്ങൾ പകർത്തിയ യാത്രക്കാരൻ പറഞ്ഞു.