പേരാവൂർ: മുഴക്കുന്നിലെ സഞ്ചാരികളുടെ കൂട്ടായ്മയായ വണ്ടർലസ്റ്റ് പ്രകൃതിസംരക്ഷണത്തിൽ വ്യത്യസ്തമായൊരു പാതയിലാണ്. സമുദ്രനിരപ്പിൽ നിന്നും 2000 അടി ഉയരത്തിൽ സ്ഥിതി ചെയ്യുന്ന മൈലാടുപാറയിൽ സന്ദർശകർ ഉപേക്ഷിച്ചു പോയ പ്ലാസ്റ്റിക് മാലിന്യങ്ങൾ നീക്കം ചെയ്താണ് വണ്ടർലസ്റ്റ് മറ്റ് കൂട്ടായ്മകളിൽ നിന്ന് വേറിട്ട് നിൽക്കുന്നത്.

ഇടതൂർന്നു കിടക്കുന്ന മുളംകാടിന്റെ തണലേറ്റും ഏതു സമയത്തും വീശിയടിക്കുന്ന കാറ്റേറ്റും വശ്യസുന്ദരമായപ്രകൃതി സൗന്ദര്യം ആസ്വദിക്കുന്നതിനായിസഞ്ചാരികൾ ഏറെ എത്തിച്ചേരുന്ന വ്യൂ പോയിന്റാണ് പേരാവൂരിനു സമീപം മുഴക്കുന്ന്,മാലൂർ പഞ്ചായത്തുകൾ അതിർത്തി പങ്കിടുന്ന മയിലാടുംപാറ.എന്നാൽ ഈ പ്രദേശം മുഴുവൻ പ്ലാസ്റ്റിക് മാലിന്യങ്ങൾ കൊണ്ടു നിറഞ്ഞിരിക്കുകയാണ്.ഈയൊരു സാഹചര്യത്തിലാണ്മയിലാടുംപാറയിലെ മാലിന്യം നീക്കം ചെയ്തു സഞ്ചാരിക്കൂട്ടം പുതുവർഷത്തെ വരവേറ്റത്.പതിനഞ്ചിലധികം ചാക്കുകളിലായാണ് ഇവർ പ്ലാസ്റ്റിക്ക് മാലിന്യം സംഭരിച്ചത്.

ശേഖരിച്ച മാലിന്യങ്ങൾ മുഴക്കുന്ന് ഹരിതകർമസേനക്ക് കൈമാറും.സ്വരൂപ് മുഴക്കുന്ന്,അരുൺ മുഴക്കുന്ന്, അഭിൻ രാജ്,മനീഷ് മുഴക്കുന്ന്,ധനജ്ഞയ്,ഷിമിൽ,ഷാരോൺ,ആദർശ്,സനേഷ് മുടക്കോഴി എന്നിവരാണ് കൂട്ടായ്മയിലെ അംഗങ്ങൾ. ദിവസവും നൂറുകണക്കിനാളുകളാണ്മയിലാടും പാറയിൽ വരുന്നത്.അതുകൊണ്ട് തന്നെ മാലിന്യങ്ങളും കുന്നുകൂടി കൊണ്ടിരിക്കുന്ന അവസ്ഥയാണ്.പൈതൃക ടൂറിസത്തിൽ മൈലാടുംപാറ ഉൾപ്പെടുത്താൻ ചർച്ചകൾ നടക്കുന്നുണ്ട്. പേരാവൂർ-ബംഗ്ലക്കുന്നു-പെരിങ്ങാനം റോഡ് വഴിയും ,ഇരിട്ടി-മുഴക്കുന്ന്-പെരിങ്ങാനം വഴിയും,മട്ടന്നുർ-തില്ലങ്കേരി-പെരിങ്ങാനം വഴിയും മയിലാടും പാറയിൽ എത്തിച്ചേരാം.