കണ്ണൂർ : ഗ്രാമ പഞ്ചായത്തുകളുടെ മാലിന്യ സംസ്‌കരണ നയങ്ങൾക്കും നിലപാടുകൾക്കും വിപുലമായ പ്രചരണം നൽകാൻ ലക്ഷ്യമിട്ട് ഹരിത പാഠശാലകളുമായി ഹരിതകേരളം മിഷൻ. പഞ്ചായത്തുകൾ തയ്യാറാക്കുന്ന സമ്പൂർണ ശുചിത്വ മാലിന്യ സംസ്‌കരണ പദ്ധതിയുടെ വിശദാംശങ്ങൾ വായനശാലകൾ, കുടുംബശ്രീ അയൽക്കൂട്ടങ്ങൾ, ക്ലബുകൾ, സ്വയം സഹായ സംഘങ്ങൾ, സന്നദ്ധ സംഘങ്ങൾ, വിവിധ കാർഷിക സംഘടനകൾ, സ്‌കൂളുകൾ, അംഗൻവാടികൾ തുടങ്ങിയവ വഴി പ്രചരിപ്പിക്കാനും സമ്പൂർണ ശുചിത്വ ഗ്രാമം എന്ന ലക്ഷ്യം നേടാനുമാണ് പാഠശാലകൾ സംഘടിപ്പിക്കുന്നത്.

ജില്ലയിലെ ആദ്യ ഹരിത പാഠശാല പെരളശ്ശേരി ഗ്രാമ പഞ്ചായത്തിൽ തലശ്ശേരി സബ് കലക്ടർ അനുകുമാരി ഉദ്ഘാടനം ചെയ്തു. കണ്ണപുരം ഹരിത പാഠശാല ജനവരി മൂന്നിന് കണ്ണപുരം പഞ്ചായത്ത് ഹാളിൽ നടക്കും. പഞ്ചായത്ത് തലത്തിൽ സംഘടിപ്പിക്കുന്ന പാഠശാലകൾക്ക് ശേഷം വായനശാലകൾ, കുടുംബശ്രീ അയൽക്കൂട്ടങ്ങൾ, ക്ലബുകൾ, സ്വയം സഹായ സംഘങൾ, സന്നദ്ധ സംഘങ്ങൾ, വിവിധ കാർഷിക സംഘടനകൾ, സ്‌കൂളുകൾ, അംഗൻവാടികൾ എന്നിവിടങ്ങളിൽ പാഠശാലകൾ സംഘടിപ്പിക്കും. തുടർന്ന് ശുചിത്വ പ്രവർത്തനങ്ങൾ, തരിശ് രഹിത പ്രവർത്തനങ്ങൾ, ജല സംരക്ഷണ പ്രവർത്തനങ്ങൾ എന്നിവ സംഘടിപ്പിച്ച് വാർഡുകളിൽ നിറയെ ഹരിതവീടുകൾ എന്ന ലക്ഷ്യത്തിലെത്തിക്കും. അതു വഴി ഹരിത സമൃദ്ധി വാർഡ് എന്ന പദവി കൈവരിക്കുകയാണ് ഹരിത പാഠശാലകൾ കൊണ്ട് ഉദ്ദേശിക്കുന്നത്. 

പ്ലാസ്റ്റിക്കിന്റെ ഉപയോഗം കുറക്കാനും ബദൽ മാർഗ്ഗങ്ങൾ വികസിപ്പിച്ചെടുക്കാനും ജനങ്ങളെ പ്രേരിപ്പിക്കാനുള്ള പ്രവർത്തനങ്ങൾ കൂടി പാഠശാലകളിൽ ആസൂത്രണം ചെയ്യും. ഹരിത മാംഗല്യം പദ്ധതി, ബദൽ ഉല്പന്ന പ്രദർശനങ്ങൾ, കിണർ റീചാർജ്ജ് ചെയ്യൽ, തോടുകളുടെ ശുചീകരണം, ജലഗുണ പരിശോധന തുടങ്ങിയ വ്യത്യസ്ത പ്രവർത്തനങ്ങളും ഹരിത പാഠശാലകളിൽ ചർച്ചചെയ്യും. ഗ്രാമ പഞ്ചായത്തുകളുടെ സമ്പൂർണ ശുചിത്വ പദ്ധതി രേഖയിലെ പ്രധാന പ്രവർത്തനങ്ങളിലൊന്നാണ് ഹരിത പാഠശാലകൾ സംഘടിപ്പിക്കൽ.