കൊല്ലം : സ്വകാര്യ കശുവണ്ടിവ്യവസായ മേഖലയിൽ സർക്കാർ പ്രഖ്യാപിച്ച പുനരുദ്ധാരണ പാക്കേജിന്റെ ഭാഗമായ ഒറ്റത്തവണ തീർപ്പാക്കലിന്റെ മാർഗനിർദേശം തയ്യാറായതായി വ്യവസായ മന്ത്രിയുടെ ഓഫീസിൽനിന്ന് അറിയിച്ചു. ഇതനുസരിച്ച് 10 കോടി രൂപവരെയുള്ള വായ്പയുടെ പലിശ പൂർണമായി എഴുതിത്തള്ളും. ബാങ്കുകളിൽനിന്ന്‌ രണ്ടുകോടി രൂപവരെ വായ്പയെടുത്തവർക്ക്‌ മുതലിന്റെ 50 ശതമാനം തിരിച്ചടച്ച് ബാധ്യത തീർക്കാം. രണ്ടു മുതൽ 10 കോടി രൂപവരെ വായ്പയെടുത്തവർ 60 ശതമാനം തുക തിരിച്ചടയ്‌ക്കണം. ഒത്തുതീർപ്പ് നിർദേശത്തിന്റെ ഭാഗമായി 500 കോടിയോളം രൂപ എഴുതിത്തള്ളേണ്ടിവരുമെന്ന് സംസ്ഥാനതല ബാങ്കേഴ്‌സ്‌ സമിതി അധികൃതർ പറഞ്ഞു.

2020 മാർച്ച് 31 വരെ കിട്ടാക്കടമായി മാറിയ അക്കൗണ്ടുകൾക്കാണ് ഇളവ് ലഭിക്കുക. തിരിച്ചടവ് നിർദേശം സമർപ്പിക്കാൻ ബാങ്കുകൾക്ക് അടുത്തവർഷം ഫെബ്രുവരി 28 വരെ സമയം നൽകും. ഇതിനുള്ളിൽ ആദ്യ ഗഡുവായി 10 ശതമാനം തുക അടയ്‌ക്കണം. നിർദേശം അംഗീകരിച്ചശേഷം ഒരുവർഷം കൊണ്ട് വായ്പ തിരിച്ചടച്ചാൽ മതിയാകും. കശുവണ്ടി ഫാക്ടറിയോടൊപ്പം വ്യാപാരവും നടത്തിയിരുന്നവർക്കും ആനുകൂല്യം ലഭിക്കും.
കടക്കെണിയിലായ സ്വകാര്യ കശുവണ്ടിവ്യവസായ പുനരുദ്ധീകരണ പാക്കേജ് തയ്യാറാക്കാൻ 2019ൽ ആണ്‌ സർക്കാർ നടപടി തുടങ്ങിയത്‌. ഇതിന്റെ ഭാഗമായി 2020 മാർച്ച് രണ്ടിന്‌ മുഖ്യമന്ത്രി പിണറായി വിജയന്റെ അധ്യക്ഷതയിൽ യോഗം ചേർന്നിരുന്നു. ഒറ്റത്തവണ തീർപ്പാക്കൽ പദ്ധതിയിൽ നിർദേശങ്ങൾ രൂപപ്പെടുത്താൻ സംസ്ഥാനതല ബാങ്കേഴ്സ് സമിതി കൺവീനർ, സർക്കാർ പ്രതിനിധി, വ്യവസായികളുടെ പ്രതിനിധി എന്നിവർ ഉൾപ്പെട്ട മൂന്നംഗസമിതിയെ നിയോഗിച്ചിരുന്നു.

രണ്ടാം പിണറായി സർക്കാർ ചുമതലയേറ്റശേഷം മുഖ്യമന്ത്രിയുടെ നിർദേശപ്രകാരം വ്യവസായമന്ത്രി പി. രാജീവിന്റെ സാന്നിധ്യത്തിൽ 6 തവണയും ധനമന്ത്രി കെ.എൻ. ബാലഗോപാലിന്റെ സാന്നിധ്യത്തിൽ ഒരുതവണയും സമിതി യോഗം ചേർന്നു. ബാങ്കുകളും വ്യവസായികളും മുന്നോട്ടുവച്ച നിർദേശങ്ങളിൽ യോജിപ്പിലെത്താനായി പലതരത്തിലുള്ള ശ്രമങ്ങൾ നടത്തി. ഇതിനുശേഷമാണ് അന്തിമ ധാരണയിൽ എത്തിയത്. കടക്കെണിയിലായ സ്വകാര്യ കശുവണ്ടിവ്യവസായ മേഖലയ്‌ക്ക് ആശ്വാസം പകരുന്നതാണ്‌ ഇപ്പോഴത്തെ നിർദേശമെന്ന്‌ വ്യവസായ മന്ത്രി പി. രാജീവ് പറഞ്ഞു.