കണ്ണൂർ : അഴീക്കോട് പഞ്ചായത്തിലെ വലിയ ജലസ്രോതസ്സും ചരിത്രപ്രാധാന്യവുമുള്ള വൻകുളം നവീകരിക്കുന്നതിന് പദ്ധതി തയ്യാറാവുന്നു. ഗ്രാമപ്പ‍‍ഞ്ചായത്തിന്റെയും ബ്ലോക്ക് പഞ്ചായത്തിന്റെയും ഫണ്ടിനൊപ്പം എം.എൽ.എ. ഫണ്ടുകൂടി ഉപയോഗപ്പെടുത്തിയാണ് കുളം നവീകരിക്കുക.

ഗ്രാമപ്പഞ്ചായത്ത് 15 ലക്ഷം രൂപയും ബ്ലോക്ക് പഞ്ചായത്ത് 10 ലക്ഷം രൂപയും ഇതിനായി നീക്കിവെച്ചിട്ടുണ്ട്. ശുചിത്വം, കുടിവെള്ളം എന്നീ ഇനത്തിലാണ് ഗ്രാമപ്പഞ്ചായത്ത് 15 ലക്ഷം രൂപ നീക്കിവെച്ചത്. ചെളി നീക്കംചെയ്യുന്നതിനും പൊട്ടിയ പടവുകൾ നവീകരിക്കുന്നതിനുമാണ് ഈ ഫണ്ട് ഉപയോഗിക്കുക. പദ്ധതിയുടെ അടങ്കൽ തയ്യാറാക്കുന്നുണ്ട്. കുളത്തിലെ ജലനിരപ്പ് താഴ്ന്നശേഷം പ്രവൃത്തികൾ ആരംഭിക്കും. ഇതിനുപുറമെ, കുളത്തിന് ചുറ്റും ലൈറ്റുകൾ സ്ഥാപിക്കുന്നതിനും സൗന്ദര്യവത്കരിക്കാനും പദ്ധതിയുണ്ട്.

ബ്ലോക്ക് പഞ്ചായത്ത്‌ ഫണ്ടും എം.എൽ.എ. ഫണ്ടും ഈ ആവശ്യത്തിനാണ് വിനിയോഗിക്കുക.കുളം നവീകരിക്കുന്നത് സംബന്ധിച്ച ആലോചനായോഗം നേരത്തേ നടന്നുവെന്നും വൈകാതെ പദ്ധതി ആരംഭിക്കാൻ സാധിക്കുമെന്ന് പ്രതീക്ഷിക്കുന്നതായും കെ.വി.സുമേഷ് എം.എൽ.എ. പറഞ്ഞു.

ഒരേക്കറിലധികം വിസ്തൃതിയിൽ, നാലുനൂറ്റാണ്ട് മുമ്പ് നിർമിച്ച കുളം ഇതുവരെ വൃത്തിയാക്കിയിട്ടില്ല. അതിനാൽ കുളത്തിലെ ചെളി നീക്കംചെയ്യുന്നതുതന്നെ. വലിയ ജോലിയാണ്. വളരെമുമ്പ് കാർഷികാവശ്യത്തിന് ഇതിലെ വെള്ളമുപയോഗിച്ചിരുന്നു. പിന്നീട് വയലുകൾ നികത്തി വീടുകളും കടകളും വന്നതോടെ ഈ പ്രദേശത്തെ കൃഷിയില്ലാതായി.കുളം നവീകരിച്ചാൽ ജില്ലയിലെതന്നെ പ്രധാന ശുദ്ധജലസ്രോതസ്സായി മാറ്റാനാകുമെന്നാണ് പ്രതീക്ഷയെന്ന് ഗ്രാമപ്പഞ്ചായത്ത് പ്രസിഡന്റ് കെ.അജീഷ് പറഞ്ഞു.

നാലുനൂറ്റാണ്ടുമുന്പ് ചിറക്കൽ തമ്പുരാന്റെ സേനയുടെ നെടുംതൂണും മാടായിക്കോട്ടയുടെ സംരക്ഷകനുമായിരുന്ന അഴീക്കോട്ടെ മുരിക്കഞ്ചേരി വീട്ടിൽ കേളു നായർ നിർമിച്ചതാണ് ഈ കുളം. സവർണർക്ക് കുളിക്കുന്നതിനാണ് കുളം നിർമിച്ചതെന്നാണ് കരുതപ്പെടുന്നത്. കുളത്തിനുചുറ്റുമുള്ള വയൽപ്രദേശം വൻകുളത്തുവയൽ എന്നപേരിൽ അറിയപ്പെട്ടു.

1967-ലാണ് കുളം പഞ്ചായത്തിന്റെ നിയന്ത്രണത്തിലായത്. പലതവണ നവീകരണത്തിന് ആലോചന നടന്നെങ്കിലും ഫണ്ടിന്റെ അപര്യാപ്തത കാരണം നടന്നില്ല. കുളത്തിലെ വെള്ളം ഇപ്പോൾ കുളിക്കാനോ അലക്കാനോ കഴിയാത്തവിധം മലിനമാണ്.