തിരുവനന്തപുരം : ഒരു കിലോ വെണ്ട‍യ്ക്ക് തമിഴ്നാട്ടിലെ വില 32 രൂപ. കേരളത്തിലെ പൊതുവിപണിയിലെത്തുമ്പോൾ അത് 50 രൂപയാകും. തമിഴ്നാട്ടിൽ 50 രൂപയ്ക്കു കിട്ടുന്ന കത്തിരിക്കയുടെ കേരളത്തിലെ വില 110 രൂപ. വലിയ മുളകിന്(തൊണ്ടൻ മുളക്) അവിടെ 110 രൂപ‍യെങ്കിൽ ഇവിടെ 270 രൂപ.

കിലോയ്ക്ക് 50 രൂപയുള്ള കറിവേപ്പില കേരളത്തിൽ കിട്ടണമെങ്കിൽ ഇരട്ടിവില നൽകണം. അമര, കത്തിരി, വഴുതന, വെളുത്തുള്ളി തുടങ്ങിയവയെല്ലാം അവിടെ നിന്നു കേരളത്തിലെത്തുമ്പോൾ വില ഇരട്ടിയാകുന്നു. മറ്റു ചിലത് അതിലേറെയും. തമിഴ്നാട്ടിൽ 45 രൂപ വിലയുള്ള(കിലോയ്ക്ക്) മല്ലിയില സംസ്ഥാനത്തെ പൊതുവിപണിയിൽ 140 രൂപയ്ക്കാണ് വിൽക്കുന്നത്.

കേരളത്തിലെ പച്ചക്കറി വിപണിയിലെ കടുത്ത ക്ഷാമം മുതലെടുത്ത് തമിഴ്നാട്ടിലെ ഇടനിലക്കാർ ഉൾപ്പെടുന്ന ലോബി വ്യാപാരികളെയും ജനങ്ങളെയും ഫലത്തിൽ കൊള്ളയടി‍ക്കുകയാണ്. കോടികളുടെ വരുമാനമാണ് ഇതിലൂടെ അവർ കൊയ്യുന്നത്. തമിഴ്നാട്ടിലെ വിപണിയിൽ കൃത്രിമ ക്ഷാ‍മമുണ്ടാക്കി കേരളത്തിലേക്കുള്ള പച്ചക്കറിക്ക് വില‍കൂട്ടുന്ന തന്ത്രമാണ് പ്രധാനമായും അവർ പയറ്റുന്നത്. 

കഴിഞ്ഞ മാസം മുതലാണ് കേരളത്തിലേ‍ക്ക് അയയ്ക്കുന്ന പച്ചക്കറി വില തമിഴ്നാട്ടിലെ ഇടനിലക്കാർ കുത്തനെ കൂട്ടിയത്. ഇടനിലക്കാരെ ഒഴിവാക്കി സംസ്ഥാന കൃഷി വകുപ്പ് നേരിട്ട് ഹോർട്ടികോർ‍പ് വഴി പച്ചക്കറി സംഭരിക്കാൻ ശ്രമിച്ചെങ്കിലും തമിഴ്നാട് ലോബി ഇടങ്കോലി‍ട്ടതോടെ അതും ഫലം കണ്ടില്ല. കർഷകർ ഉൽപാദിപ്പിക്കുന്ന പച്ചക്കറികൾ മുഴുവൻ ഇടനിലക്കാർ മൊത്ത വിലയ്ക്ക് വാങ്ങിയ ശേഷം ഇരട്ടി വിലയ്ക്ക് കേരളത്തിലെ വ്യാപാരികൾക്ക് വിൽക്കുകയാണ്.

തമിഴ്നാട്ടിലെ തെങ്കാശി, ഒട്ടം‍ഛത്രം, തേനി, കമ്പം തുടങ്ങിയ സ്ഥലങ്ങളിൽ നിന്നാണ് കേരളത്തിൽ പച്ചക്കറികൾ എത്തുന്നത്. അവിടെയെല്ലാം ഇടനിലക്കാർ പിടിമുറുക്കി. കേരളത്തിലെ പൊതുവിപണിയിൽ ഒന്നര മാസമായി പച്ചക്കറി വില ഉയർന്നുതന്നെ നിൽക്കുകയാണ്. 

വെള്ളിയാഴ്ചത്തെ പച്ചക്കറിവില: ഇനം, തമിഴ്നാട് തേനി/തെങ്കാശി, കേരള പൊതുവിപണി (ഹോർട്ടികോർപ്)

അമര – 30/44, 60 (49)

കത്തിരി – 50/70, 110 (458)

വഴുതന – 43/46, 100 (61)

വെണ്ട – 32/44, 100 (58)

പയർ – 90, 110 (72)

തടിയൻ – 5/17, 45 (23)

മത്തൻ – 20/27, 32 (20)

ചെറിയ‍മുളക് – 50/86, 85 (55)

വലിയമുളക് (തൊണ്ടൻ മുളക്) – 110, 270 (130)

പടവലം – 40, 45/58 (43)

കാരറ്റ് (ഊട്ടി) – 77, 105 (60)

ബീൻസ് – 58, 90 (69)

വെള്ളരി – 50, 55 (40)

തക്കാളി – 43, 65 (48)

കാബേജ് – 56, 70 (38)

ബീറ്റ്റൂട്ട് – 44, 65 (39)

ഇഞ്ചി – 25, 40 (48)

സവാള – 32, 46 (40)

ചെറിയ ഉള്ളി – 40, 75 (56)

ഉരുളൻകിഴങ്ങ് – 42, 44 (33)

കോവയ്ക്ക – 45, 95 (56)

ചേന – 21, 35 (25).

വെളുത്തുള്ളി – 40, 130 (82)

കറിവേപ്പില – 50, 100 (32)

മല്ലിയില – 45, 140 (70)