കോപ്പന്‍ഹേഗന്‍: അന്തരീക്ഷത്തില്‍ നിന്ന് കാര്‍ബണ്‍ ഡയോക്‌സൈഡ് വലിച്ചെടുത്ത് ഭൂമിക്കടിയില്‍ സൂക്ഷിക്കുന്ന ലോകത്തിലെ ഏറ്റവും വലിയ പ്ലാന്റ് ഐസ്‌ലന്‍ഡില്‍ പ്രവര്‍ത്തനമാരംഭിച്ചു. ഓര്‍ക്ക പ്ലാന്റ് എന്ന് പേരിട്ടിരിക്കുന്ന പ്ലാന്റ് ക്ലിംവര്‍ക്സ് എ.ജി.യും കാര്‍ബ്ഫിക്‌സും ചേർന്നാണ് വികസിപ്പിച്ചിരിക്കുന്നത്.

പ്രതിവര്‍ഷം 4,000 ടണ്‍ കാര്‍ബണ്‍ ഡയോക്‌സൈഡ് അന്തരീക്ഷത്തില്‍ നിന്ന് വലിച്ചെടുക്കാന്‍ പ്ലാന്റിന് കഴിയും. 720 കാറുകളില്‍ നിന്ന് പുറന്തള്ളപ്പെടുന്ന കാര്‍ബണിന്റെ അളവിന് തുല്യമാണിത്. എട്ട് വലിയ കണ്ടെയ്‌നറുകളാണ് പ്ലാന്റിനുള്ളില്‍ സ്ഥാപിച്ചിരിക്കുന്നത്. പ്രത്യേകതരം ഫില്‍റ്ററുകളും ഫാനുകളും ഉപയോഗിച്ചാണ് കാര്‍ബണ്‍ ഡയോക്‌സൈഡ് വലിച്ചെടുക്കുന്നത്.

സമീപത്തെ ഭൗമതാപനിയത്തില്‍ നിന്നുള്ള പുനരുപയോഗ ഊര്‍ജം ഉപയോഗിച്ച് പ്രവര്‍ത്തിക്കുന്ന പ്ലാന്റ് അന്തരീക്ഷത്തില്‍ നിന്ന് വലിച്ചെടുക്കുന്ന കാര്‍ബണ്‍ ഡൈഓക്സൈഡ് വെള്ളവുമായി കലര്‍ത്തുന്നു. സോഡാ മെഷീന് സമാനമായ പ്രവര്‍ത്തനമാണിവിടെ നടക്കുന്നത്. തുടർന്ന് ഇത് ഭൂമിക്കടിയില്‍ സൂക്ഷിക്കുന്നു. ഭൂമിക്കടിയിലുള്ള കാര്‍ബണ്‍ ഡൈ ഓക്സൈഡ് ചോരാനുള്ള സാധ്യതയുണ്ട്. ചോര്‍ച്ച തടയാന്‍ പാറക്കൂട്ടങ്ങള്‍ക്കിടയിലാണ് സൂക്ഷിക്കുന്നത്. ഭൂമിക്കടിയിലെ ചൂട് മൂലം ഇവ ക്രമേണ പാറയുടെ രൂപത്തിലാക്കുന്നു.

ലോകത്താകെ ഇത്തരത്തില്‍ പ്രവര്‍ത്തിക്കുന്ന 15 പ്ലാന്റുകളാണുള്ളത്. ആകെ 9,000 ടണ്‍ കാര്‍ബണ്‍ ഡൈ ഓക്സൈഡാണ്‌​ പ്ലാന്റുകളില്‍ ശേഖരിക്കപ്പെടുന്നത്. കഴിഞ്ഞ വര്‍ഷം ആഗോള കാര്‍ബണ്‍ ഡൈ ഓക്സൈഡ് ബഹിര്‍ഗമനം 31.5 ബില്ല്യണ്‍ കടന്നുവെന്ന് ഇന്റര്‍നാഷണല്‍ എനര്‍ജി ഏജന്‍സി പുറത്തുവിട്ട കണക്കുകള്‍ ചൂണ്ടിക്കാണിക്കുന്നു. അന്തരീക്ഷത്തില്‍ നിന്ന് കാര്‍ബണ്‍ ഡൈ ഓക്സൈഡ് വലിച്ചെടുക്കുന്നതിലൂടെ ആഗോള താപനത്തിന് ഒരു പരിധിവരെ തടയിടാന്‍ കഴിയും. ഇതുവഴി ആഗോളതാപനത്തിന്‍റെ പ്രത്യാഘാതങ്ങളായ കാട്ടുതീ, പ്രളയം, സമുദ്രനിരപ്പ് ഉയരല്‍ തുടങ്ങിയവ കുറയ്ക്കാന്‍ കഴിയുമെന്നാണ് പ്രതീക്ഷിക്കപ്പെടുന്നത്.

നേരിട്ട് അന്തരീക്ഷത്തില്‍ നിന്നുള്ള കാര്‍ബണ്‍ വലിച്ചെടുക്കല്‍ ചെലവേറിയ ഒരു പ്രവര്‍ത്തനമാണ്. എന്നാല്‍ കൂടുതല്‍ കമ്പനികളും ഉപഭോക്താകളും അവരുടെ കാര്‍ബണ്‍ ബഹിര്‍ഗമന തോത് കുറയ്ക്കാന്‍ ഈ മേഖലയില്‍ നിക്ഷേപം നടത്തുമെന്ന് പ്രത്യാശയിലാണ് പ്ലാന്റ് നിർമാതാക്കള്‍.