ഇന്ത്യയിൽ നിന്ന്​ കൂടുതൽ വരിക്കാരെ സ്വന്തമാക്കാനായി നെറ്റ്​ഫ്ലിക്സ്​ കഴിഞ്ഞ ദിവസമായിരുന്നു അവരുടെ സബ്​സ്ക്രിപ്​ഷൻ പ്ലാനുകളിൽ വലിയ കുറവ്​ വരുത്തിയത്​. അതിൽ തന്നെ ഏറ്റവും ജനപ്രീതി നേടിയത്​ 149 രൂപയുടെ പുതിയ മൊബൈൽ ഒൺലി പ്ലാനായിരുന്നു. ആമസോൺ പ്രൈം അവരുടെ പ്ലാനുകളിൽ 50 ശതമാനത്തോളം വർധനവ്​ വരുത്തിയ സമയത്തായിരുന്നു നെറ്റ്​ഫ്ലിക്സിന്‍റെ അപ്രതീക്ഷിത നീക്കം.

എന്നാലിപ്പോൾ, നെറ്റ്​ഫ്ലിക്സിനെ വെല്ലാൻ കിടിലൻ സബ്​സ്ക്രിപ്​ഷൻ പ്ലാനുമായി എത്തിയിരിക്കുകയാണ്​ ഡിസ്നി പ്ലസ്​ ഹോട്​സ്റ്റാർ. 99 രൂപയ്ക്കാണ്​ ഹോട്​സ്റ്റാർ മൊബൈൽ-ഒൺലി പ്ലാൻ നൽകുക. 499 രൂപയുടെ വാർഷിക പ്ലാനിലൂടെ ലഭിക്കുന്ന എല്ലാ സേവനങ്ങളും 99 രൂപയുടെ പ്ലാനിലും ലഭ്യമാകും. കൂടാതെ, ക്രെഡിറ്റ് അല്ലെങ്കിൽ ഡെബിറ്റ് കാർഡുകൾ, പേ-ടിഎം, ഫോൺ പേ അല്ലെങ്കിൽ മറ്റേതെങ്കിലും യു.പി.ഐ ഉപയോഗിച്ച് പണമടയ്ക്കുന്ന ഉപഭോക്താക്കൾക്ക് 50 ശതമാനം കിഴിവും ലഭിക്കും. അതോടെ പുതിയ ഹോട്ട്‌സ്റ്റാർ മൊബൈൽ-ഒൺലി പ്ലാൻ പ്രതിമാസം 49 രൂപ മാത്രമായി കുറയുകയും ചെയ്യും.

ഈ വർഷം ആദ്യം ഉപഭോക്താക്കൾക്കായി മൂന്ന് പുതിയ പ്ലാനുകൾ ചേർത്തു, അതിൽ 899 രൂപയുടെ ഡിസ്‌നി+ ഹോട്ട്‌സ്റ്റാർ സൂപ്പർ പ്ലാൻ, 1,499/ വർഷം ഡിസ്‌നി+ ഹോട്ട്‌സ്റ്റാർ പ്രീമിയം പ്ലാൻ, 499 രൂപ ഡിസ്‌നി+ ഹോട്ട്‌സ്റ്റാർ മൊബൈൽ പ്ലാൻ എന്നിവ ഉൾപ്പെടുന്നു. കമ്പനി അവരുടെ 399 രൂപയുടെ ഹോട്ട്‌സ്റ്റാർ വിഐപി പ്ലാൻ നീക്കം ചെയ്തുകൊണ്ടാണ്​ 499 രൂപയുടെ പുതിയ പ്ലാൻ അവതരിപ്പിച്ചത്​.

ഇന്ത്യയിൽ ഏറ്റവും കൂടുതൽ ആളുകൾ സബ്​സ്​ക്രൈബ്​ ചെയ്ത ഒടിടി പ്ലാറ്റ്​ഫോമുകളിൽ ഒന്നായ ആമസോൺ പ്രൈം അവരുടെ അംഗത്വ സബ്‌സ്‌ക്രിപ്‌ഷൻ പ്ലാനുകളുടെ ചാർജ്​ 50 ശതമാനം വരെയാണ്​ വർദ്ധിപ്പിച്ചത്​. പ്രൈം വാർഷിക മെംബർഷിപ്പിന്​​​ ഇതുവരെ 999 രൂപയായിരുന്നു ചാർജ്​. അത്​ 1499 രൂപയാക്കി. ത്രൈമാസ പ്ലാൻ 329ൽ നിന്ന്​ 459 ആക്കി ഉയർത്തി. പ്രതിമാസ പ്ലാനിന്​ ഇനിമുതൽ 179 രൂപ നൽകേണ്ടി വരും. 129 ആയിരുന്നു ആദ്യത്തെ ചാർജ്​.

പ്രൈമിനേയും ഹോട്​സ്റ്റാറിനെയും അപേക്ഷിച്ച്​ ഇന്ത്യയിൽ വരിക്കാർ കുറഞ്ഞ നെറ്റ്​ഫ്ലിക്സ്​ ഞെട്ടിക്കുന്ന നീക്കമാണ്​ നടത്തിയത്​. മൊബൈല്‍ പ്ലാന്‍ 199ല്‍നിന്ന് 149 ആയും ടെലിവിഷനില്‍ ഉപയോഗിക്കാവുന്ന ബേസിക് പ്ലാന്‍ 499ല്‍നിന്ന് 199 ആയും കുറച്ചു. 649 രൂപയുടെ നെറ്റ്ഫ്ളിക്സ് സ്റ്റാൻഡേർഡ് 499 രൂപയായും കുറഞ്ഞു. ഈ അക്കൗണ്ട് ഒരേസമയം രണ്ട് പേർക്ക് ഉപയോഗിക്കാം. 799 രൂപയുടെ നെറ്റ്ഫ്ളിക്സ് പ്രീമിയം 649 രൂപയായും നിരക്ക് പരിഷ്‌കരിച്ചിട്ടുണ്ട്. ഇതിൽ ഒരേസമയം 4 പേർക്ക് അക്കൗണ്ട് ഉപയോഗിച്ച് പരിപാടികൾ ആസ്വദിക്കാം.