തിരുവനന്തപുരം: മോട്ടോർവാഹനവകുപ്പ് ഓഫീസുകൾ ഓൺലൈനിലേക്ക് മാറുമ്പോഴും ഇടനിലക്കാർക്ക് ഇടപെടാനുള്ള പഴുതുകളെല്ലാം അതേപടി തുടരുന്നു. പുതിയ വാഹനങ്ങൾക്ക് ഷോറൂമുകളിൽനിന്നും ഓൺലൈനായാണ് രജിസ്‌ട്രേഷൻ അപേക്ഷനൽകേണ്ടത്. ഇത് എപ്പോൾ പരിഗണിക്കണമെന്ന് തീരുമാനിക്കുന്നത് ഉദ്യോഗസ്ഥരാണ്. ചില അപേക്ഷകളിൽ വേഗത്തിൽ രജിസ്‌ട്രേഷൻ അനുവദിക്കപ്പെടുമ്പോൾ മറ്റുള്ളവ കാരണമില്ലാതെ വൈകുന്ന സ്ഥിതിയാണ്.

രജിസ്‌ട്രേഷനുള്ള ഓൺലൈൻ അപേക്ഷകൾ വേഗം തീർപ്പാക്കാൻ ട്രാൻസ്പോർട്ട് കമ്മിഷണർ നിർദേശം നൽകിയിട്ടുണ്ടെങ്കിലും പല ഓഫീസുകളിലും ഇത് നടപ്പാകുന്നില്ല. അപേക്ഷകൾക്ക് മുൻഗണനക്രമം നിശ്ചയിക്കാത്തതാണ് ഇടനിലക്കാർക്കും അവരെ സഹായിക്കുന്ന ഉദ്യോഗസ്ഥർക്കും സഹായമാകുന്നത്. ഇടനിലക്കാർ ശുപാർശചെയ്യുന്ന അപേക്ഷകളിൽ ഉടൻ രജിസ്‌ട്രേഷൻ അനുവദിക്കുന്നതായാണ് പരാതി. അപേക്ഷകൾ മുൻഗണനക്രമത്തിൽ തീർപ്പാക്കുംവിധം സോഫ്റ്റ്‌വേറിൽ മാറ്റംവരുത്തിയാൽ പ്രശ്നം പരിഹരിക്കാം. എന്നാൽ, ഉന്നത ഉദ്യോഗസ്ഥർ ഇതിൽ താത്പര്യം കാണിക്കുന്നില്ല.

തിരിച്ചറിയൽ രേഖയായി ആധാർ നൽകുന്നവർക്ക് ഓൺലൈനിൽ വാഹന ഉടമസ്ഥാവകാശം മാറ്റാനുള്ള സൗകര്യം കഴിഞ്ഞദിവസം നിലവിൽവന്നിരുന്നു. ഇതേ ക്രമീകരണം പുതിയ വാഹനങ്ങളുടെ രജിസ്‌ട്രേഷനിലും ഉൾക്കൊള്ളിച്ചാൽ ക്രമക്കേടുകൾ തടയാനാകും. വാഹന ഉടമകളുടെ മൊബൈൽ നമ്പർ നൽകുന്നതിന് പകരം ഇടനിലക്കാരുടെയും ഷോറൂം ജീവനക്കാരുടെയും മൊബൈൽ നമ്പർ നൽകുന്ന രീതിയുമുണ്ട്. രജിസ്‌ട്രേഷൻ ഫീസും നികുതിയും അടക്കം വാഹനത്തിനുവേണ്ടി അടയ്ക്കുന്ന തുകയുടെ വിശദാംശങ്ങൾ ഉടമയുടെ മൊബൈൽ നമ്പറിലേക്ക് എസ്.എം.എസായി ലഭിക്കും. ഇതൊഴിവാക്കാനും അധികത്തുക വാങ്ങുന്നത് വാഹനയുടമ അറിയാതിരിക്കാനുമാണ് മൊബൈൽ നമ്പർ മാറ്റുന്നത്. ആധാർ തിരിച്ചറിയൽ രേഖയായി ഉൾക്കൊള്ളിച്ചാൽ മൊബൈൽ നമ്പറിൽ ക്രമക്കേട് നടത്താൻ പറ്റില്ല.