തിരുവനന്തപുരം : സംസ്ഥാനത്താകെ 4500 ൽ ഏറെ ഗുണ്ടകൾ. അതിൽ 1300 പേർ എപ്പോഴും സജീവമാണെന്ന് സംസ്ഥാന ഇന്റലിജൻസ് വിഭാഗത്തിന്റെ പുതിയ കണക്കുകൾ വ്യക്തമാക്കുന്നു. 25 കേസുകളിൽ കൂടുതലുള്ളവരും ഇപ്പോഴും അക്രമപ്രവർത്തനത്തിൽ സജീവമായി ഏർപ്പെടുന്നവരുമാണ് ഈ വിഭാഗത്തിൽ. കൊലക്കേസ്, കൊലപാതക ശ്രമം, അടിപിടി, പിടിച്ചുപറി, ക്വട്ടേഷൻ, ഭീഷണിപ്പെടുത്തി പണം തട്ടൽ, മണൽ–മണ്ണ് മാഫിയ, ലഹരിക്കടത്ത് എന്നിങ്ങനെ പലതരം കേസുകളാണ് ഓരോരുത്തരുടെയും പേരിൽ.

സംസ്ഥാന പൊലീസ് മേധാവി ആവർത്തിച്ച് ഉത്തരവു പുറപ്പെടുവിച്ചിട്ടും ഇവരെ പിടികൂടാൻ പൊലീസ് ഒന്നും ചെയ്യുന്നില്ല. അമിത ജോലി ഭാരത്താൽ വീർപ്പുമുട്ടുമ്പോൾ ഇവരെ എപ്പോൾ പിടിക്കുമെന്നാണ് ലോക്കൽ പൊലീസുകാർ മേലുദ്യോഗസ്ഥരോട് തിരിച്ച് ചോദിക്കുന്നത്. ഗുണ്ടകൾക്കു പ്രാദേശിക ഭരണകക്ഷി നേതാക്കളുമായുള്ള അടുപ്പം കൂടി ആകുമ്പോൾ പൊലീസ് അനങ്ങുന്നില്ല. കാപ്പ നിയമപ്രകാരം അകത്താക്കാൻ ഉന്നത ഉദ്യോഗസ്ഥർ തയാറാകാത്തതും ഇവർക്ക് സൗകര്യമാകുന്നു.  

അതേസമയം, സ്റ്റേറ്റ് ക്രൈം റെക്കോർഡ്സ് ബ്യൂറോയുടെ കണക്കിൽ 850 സജീവ ഗുണ്ടകൾ മാത്രമാണ് കേരളത്തിൽ. 150 ൽ ഏറെ ഗുണ്ടാ സംഘങ്ങളും പ്രവർത്തിക്കുന്നു. ജില്ലാ പൊലീസ് മേധാവികളുടെ കീഴിലെ ജില്ലാ സ്പെഷൽ ബ്രാഞ്ചിന്റെ കയ്യിൽ മറ്റൊരു കണക്കാണുള്ളത്. 

38 കേസുള്ള ഗുണ്ട തിരുവനന്തപുരത്ത്

തിരുവനന്തപുരം റൂറലിലെ കുപ്രസിദ്ധ ഗുണ്ടയാണു കേസുകളുടെ എണ്ണത്തിൽ മുൻപിൽ–38. സജീവ ഗുണ്ടകൾ ജില്ല തിരിച്ച് ഇങ്ങനെ:

തിരുവനന്തപുരം സിറ്റി–100, റൂറൽ–150, കൊല്ലം–50, ആലപ്പുഴ–300, എറണാകുളം റൂറൽ–130, കോട്ടയം–45, പാലക്കാട്–100, കാസർകോട്–60. മറ്റു ജില്ലകളിൽ കുറവാണ്.

എറണാകുളം സിറ്റിയിലെ ഗൂണ്ടാ –ക്വട്ടേഷൻ പ്രവർത്തനം ഏറെയും അയൽ ജില്ലകളിൽ നിന്നുള്ളവരാണ് നടത്തുന്നത്. ഈ വിഭാഗത്തിൽ കൂടുതലും 30 ൽ താഴെ പ്രായമുള്ളവരാണ്. പത്തിൽ താഴെ കേസുകൾ ഉള്ളവരാണ് മറ്റു ഗുണ്ടകളുടെ പട്ടികയിൽ. ആക്രമണത്തിൽ നേരിട്ട് പങ്കെടുക്കാതെ ക്വട്ടേഷൻ ഏറ്റെടുത്ത് സജീവഗുണ്ടകൾക്ക് കൈമാറുന്നവരാണ് ഈ വിഭാഗത്തിലേറെയും.