ചെന്നൈ: ‘അമ്മയുടെ ഗർഭപാത്രവും കുഴിമാടവും ഒഴികെ മറ്റൊന്നിനെയും വിശ്വസിക്കരുത്. അവിടെ മാത്രമാണ് സുരക്ഷിതം. അടുത്ത ബന്ധുക്കളെ പോലും കണ്ണടച്ച് വിശ്വസിക്കരുത്’ ചെന്നൈ മാങ്കാട് സ്വദേശിനിയായ പ്ലസ് വൺ വിദ്യാർഥിനിയുടെ ആത്മഹത്യക്കുറിപ്പിലെ വരികളാണിത്. സ്വന്തം ജീവിതം ആരെല്ലാമോ ചേർന്ന് ഇല്ലാതാക്കിയതിന്റെ സങ്കടവും വേദനയും കലർന്ന കുറിപ്പായിരുന്നു വിദ്യാർഥിനിയുടേത്. താൻ ലൈംഗിക അതിക്രമത്തിന് ഇരയായെന്ന സൂചനയും കുറിപ്പിൽ പങ്കുവച്ചു. നിരാശയിലേക്കും ആത്മഹത്യയിലേക്കും തള്ളിവിടാൻ തക്ക ചതിക്കുഴികളാണോ പെൺകുട്ടികൾക്ക് ചുറ്റും? ആധുനിക സാങ്കേതിക വിദ്യകൾ വളരുന്നതിനൊപ്പം ഇത്തരം ചതിക്കുഴികളും വ്യാപിക്കുന്നുണ്ടോ? അതെ എന്നാണ് മിക്ക വിദ്യാർഥിനികളും രക്ഷിതാക്കളും പറയുന്നത്. പെൺകുട്ടികളുടെ സുരക്ഷയെക്കുറിച്ച് ആശങ്കകൾ ഏറെയുണ്ടെന്നും രക്ഷിതാക്കൾ പറയുന്നു.

ഒളിഞ്ഞിരിക്കുന്ന അപകടങ്ങൾ

ആധുനിക സാങ്കേതിക വിദ്യയിൽ ഒളിഞ്ഞിരിക്കുന്ന ചതികളുടെ ഏറ്റവും ഒടുവിലത്തെ ഉദാഹരണമാണ് കഴിഞ്ഞ ദിവസം ജീവനൊടുക്കിയ പ്ലസ് വൺ വിദ്യാർഥിനി. ഓൺലൈൻ ക്ലാസിൽ പങ്കെടുക്കുന്നതിനായി കഴിഞ്ഞ വർഷം പുതിയ മൊബൈൽ ഫോൺ വാങ്ങിയിരുന്നു. തുടർന്ന് സമൂഹ മാധ്യമമായ ഇൻസ്റ്റഗ്രാം വഴി സ്കൂളിൽ നേരത്തേ പഠിച്ചിരുന്ന മുതിർന്ന വിദ്യാർഥിയുമായി സൗഹൃദത്തിലായി. സൗഹൃദം മുതലെടുത്ത ആൺ സുഹൃത്ത് പെൺകുട്ടിയെ പല തവണ ലൈംഗികമായി ചൂഷണം ചെയ്തു. സംഭവം മനസ്സിലാക്കിയ വീട്ടുകാർ എതിർത്തെങ്കിലും പെൺകുട്ടി ബന്ധം തുടർന്നു. എന്നാൽ രണ്ടാഴ്ചയായി ആൺ സുഹൃത്ത് ഫോൺ എടുക്കാത്തതിനെ തുടർന്ന് വിദ്യാർഥിനി മാനസികമായി തളർന്നിരുന്നു. പ്രണയം കാപട്യമായിരുന്നെന്ന് മനസ്സിലാക്കിയ അവൾ അതിനുള്ള പരിഹാരമായി കണ്ടത് സ്വന്തം ജീവൻ അവസാനിപ്പിക്കുക എന്നതായിരുന്നു.

വിദ്യാര്‍ഥിനിയുമായി ബന്ധത്തിലായിരുന്ന 20 വയസ്സുകാരനായ കോളജ് വിദ്യാര്‍ഥിയെ പൊലീസ് അറസ്റ്റ് ചെയ്തു. യുവാവ് കുറ്റസമ്മതം നടത്തിയതായും പൊലീസ് പറഞ്ഞു. ബന്ധുക്കളുടെയും മറ്റു ചിലരുടെയും പേരുകള്‍ കൂടി പറഞ്ഞിരിക്കുന്നതിനാല്‍ അന്വേഷണം പൂര്‍ത്തിയായിട്ടില്ലെന്നും പൊലീസ് കൂട്ടിച്ചേര്‍ത്തു.

വിദ്യാർഥികൾ ഓൺലൈനിൽ, രക്ഷിതാക്കൾ ഓഫ്‌ലൈനിൽ?

കോവിഡ് കാലത്തും വിദ്യാർഥികളെ പഠനവഴിയിൽ നിലനിർത്തുന്നതിന് ഓൺലൈൻ ക്ലാസ് വലിയ പങ്ക് വഹിച്ചിട്ടുണ്ട്. എന്നാൽ, ഇവ സൃഷ്ടിക്കുന്ന പൊല്ലാപ്പുകളും വലുതാണ്. ക്ലാസിന്റെ മറവിൽ പലവിധ ചൂഷണങ്ങൾക്കും വിദ്യാർഥികൾ ഇരയാവുന്നു. അധ്യയനം മാത്രമാവേണ്ട സന്ദേശങ്ങൾ പലപ്പോഴായി അശ്ലീലമായി മാറി. വിദ്യാർഥികൾ മൊബൈലിലും മറ്റും ഓൺലൈൻ ക്ലാസിൽ പങ്കെടുക്കുമ്പോഴും ശ്രദ്ധ വേണമെന്ന് നഗരത്തിലെ മലയാളി രക്ഷിതാക്കൾ പറയുന്നു. ഏറ്റവും സുരക്ഷിതമെന്ന് കരുതുന്ന അധ്യാപകരിൽ തന്നെ ചിലർ അശ്ലീല സന്ദേശങ്ങൾ‌ അയയ്ക്കുന്നത് വലിയ ആശങ്കയാണ് ഉണ്ടാക്കുന്നത്. സ്കൂളിൽ നേരിട്ടുള്ള ക്ലാസുകൾ ആയാലും ഓഫ്‌ലൈൻ ക്ലാസ് ആയാലും എപ്പോഴും  ശ്രദ്ധ ആവശ്യമാണ്.