ന്യൂഡൽഹി : കുട്ടികൾക്കു കോവിഡ് വാക്സിൻ നൽകുന്നത് ഉടൻ ആരംഭിക്കുമെന്ന് കേന്ദ്ര ആരോഗ്യമന്ത്രി മൻസുഖ് മാണ്ഡവ്യ. രണ്ട് പുതിയ വാക്സിനുകൾക്കുള്ള അനുമതി പരിഗണനയിലാണ്. രാജ്യത്ത് 137 കോടി ‍ഡോസ് വാക്സിൻ വിതരണം ചെയ്തു. മൂന്നാം തരംഗം മുന്നിൽകണ്ട് ഒരുക്കങ്ങൾ പൂർത്തിയാക്കി. പ്രധാനമന്ത്രി നരേന്ദ്ര മോദിയുടെ നേതൃത്വത്തിലും ആരോഗ്യ പ്രവർത്തകരുടെ കഠിനാധ്വാനത്തിലും രാജ്യത്തെ 88 ശതമാനം പേർക്കും ഒന്നാം ഡോസ് വാക്സിന്‍ നൽകാൻ സാധിച്ചു. ഇതിനകം 58 ശതമാനം പേർക്കും രണ്ടാം ഡോസ് ഉറപ്പാക്കി. ഇന്ത്യയിൽ ഭൂരിഭാഗം പേരും വാക്സിൻ എടുത്തവരാണ്.

എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും ആവശ്യമുള്ളത്ര വാക്സിനുണ്ട്. 17 കോടി ഡോസ് അവരുടെ കൈവശമുണ്ട്. 31 കോടി ഡോസ് വാക്സിൻ ഒരു മാസത്തിൽ ഉൽപാദിപ്പിക്കാനുള്ള ശേഷി ഇന്ത്യയ്ക്കുണ്ടെന്നും മാണ്ഡവ്യ രാജ്യസഭയിൽ അവകാശപ്പെട്ടു. അടുത്ത രണ്ട് മാസത്തിൽ വാക്സിൻ നിർമാണത്തിൽ ഇന്ത്യയുടെ ശേഷി 45 കോടിയിലെത്തും. രാജ്യത്തെ ഒമിക്രോൺ സാഹചര്യം വിദഗ്ധർ നിരീക്ഷിക്കുകയാണ്. ഇനിയൊരു വ്യാപനമുണ്ടായാലും നമുക്ക് അധികം പ്രശ്നങ്ങളുണ്ടാകില്ല. പ്രധാനപ്പെട്ട മരുന്നുകളെല്ലാം ആവശ്യത്തിന് സംഭരിച്ചിട്ടുണ്ടെന്നും കേന്ദ്രമന്ത്രി പറഞ്ഞു. രാജ്യത്ത് ഇതുവരെ 161 ഒമിക്രോൺ കേസുകളാണ് റിപ്പോർട്ട് ചെയ്തിട്ടുള്ളത്.