തിരുവനന്തപുരം : ‘പ്രിയപ്പെട്ട ഉപയോക്താ‍വേ, ബിൽത്തുക അ‍ടയ്ക്കാത്തതിനാൽ ഇന്നു രാത്രി 9.30 ന് നിങ്ങളുടെ വൈദ്യുതി ബന്ധം വിച്ഛേദിക്കും’– ഇലക്ട്രിസിറ്റി ഓഫിസറുടെ പേരിൽ ഇങ്ങനെയൊരു വ്യാജ എസ്എംഎസ് ഏതു സമയത്തും നിങ്ങളുടെ ഫോണിൽ ലഭിക്കാം. കസ്റ്റമർ കെയർ സെന്ററിൽ ബന്ധപ്പെടണമെന്നും തുക ഉടൻ അടയ്ക്കണമെന്നും നിർദേശിച്ച് മൊബൈൽ നമ്പറും നൽകും.

കൺസ്യൂമർ നമ്പറോ മറ്റു വിശദാംശങ്ങളോ ഇല്ലാതെയാണ് എസ്.എം.എസ്‌ എത്തുക. സംശയം തോന്നി ട്രൂകോളറിൽ തിരഞ്ഞാൽ ‘കെ.എസ്.ഇ.ബി ബോർഡ് തിരുവനന്തപുരം’ എന്നാണു തെളിയുക. ഇതോടെ തെറ്റി‍ദ്ധരിക്കപ്പെടുന്ന ഉപയോക്താക്കൾ മൊബൈൽ നമ്പറിലേക്കു വിളിച്ചാൽ കെ.എസ്.ഇ.ബി അക്കൗണ്ട്സ് വിഭാഗം ഉദ്യോഗസ്ഥനാണ് സംസാരിക്കുന്ന‍തെന്ന ഇംഗ്ലിഷി‍ലുള്ള മറുപടിയും കിട്ടും. തട്ടിപ്പിന്റെ വഴികൾ ആരംഭിക്കുന്നത് ഇങ്ങനെയാണ്.

‘ഡൗൺലോഡ് ചെയ്യൂ, കാർഡ് നമ്പർ പറയൂ’

ഒരു ലിങ്ക് അയച്ചു തന്ന് പണം അടയ്ക്കാൻ ആവശ്യപ്പെടും. ഗൂഗിൾ പ്ലേ‍ സ്റ്റോറിൽ നിന്ന് പ്രത്യേക മൊബൈൽ ആപ്പ് ഇൻസ്റ്റാൾ ചെയ്യാനും ചിലപ്പോൾ നിർദേശിക്കും. ബാങ്ക് അക്കൗണ്ട് വിവരങ്ങളും കാർഡ് നമ്പറും ആവശ്യപ്പെടും. ഇതു നൽകുന്നതോടെ അക്കൗണ്ടിലെ മുഴുവൻ പണവും പിൻവലിച്ച് തട്ടിപ്പുകാർ മുങ്ങും.

വ്യാജ സന്ദേശം അയച്ച് ഓൺലൈനിലൂടെ ബാങ്ക് അക്കൗണ്ടിലെ മുഴുവൻ പണവും തട്ടിയെടുക്കുന്ന ഉത്തരേന്ത്യൻ സംഘം കേരളത്തിൽ തട്ടിപ്പിന്റെ വലമുറുക്കു‍‍കയാണ്. 2 മാസത്തിനിടെ 30 പേരാണു പരാതിയുമായി കെ.എസ്.ഇ.ബിയെ സമീപിച്ചത്. കെ.എസ്.ഇ.ബി ചെയർമാൻ ഡോ.ബി.അശോക്, ഡി.ജി.പി അനിൽകാ‍ന്തിന് രണ്ടാഴ്ച മുൻപ് ഇതേക്കുറിച്ചു പരാതി നൽകി.

റിട്ട. ബാങ്ക് മാനേജർക്ക്നഷ്ടപ്പെട്ടത് ഒരു ലക്ഷം

കണ്ണൂരിലെ റിട്ട. ബാങ്ക് മാനേ‍ജരെ കബളിപ്പിച്ചു തട്ടിപ്പു സംഘം 99,108 രൂപ കൈക്കലാക്കിയത് വ്യാഴാഴ്ച. ബിൽ അടച്ചില്ലെന്നുപറഞ്ഞ് ഇദ്ദേഹത്തിന് വൈകിട്ട് 6.45ന് എസ്.എം.എസ്‌ എത്തി. നമ്പറിൽ ബന്ധപ്പെട്ടപ്പോൾ, ഒക്ടോബറിലെ ബിൽത്തുക ഒടുക്കിയില്ലെന്നു മറുപടി. അതേ‍മാസം 28 ന് തുക അടച്ചെന്നു പറഞ്ഞപ്പോൾ 10 രൂപയുടെ കുടിശിക ഉണ്ടെന്നായി. കുടിശിക ഒടുക്കാൻ എ.ടി.എം കാർഡ് നമ്പറും അക്കൗണ്ട് വിശദാംശങ്ങളും ചോദിച്ചു. പ്ലേ സ്റ്റോറിൽനിന്ന് മൊബൈൽ ആപ് ഡൗൺലോഡ് ചെയ്യാനും ആവശ്യപ്പെട്ടു.

തുക അടച്ചതിന് പിന്നാലെ രാത്രി 8.43 ന് 49,500 രൂപയും 8.48 ന് 49,608 രൂപയും അക്കൗണ്ടിൽനിന്ന് പിൻവലിച്ചു. ബാങ്കിലെ സന്ദേശം എത്തിയപ്പോഴാണ് തട്ടിപ്പ് മന‍സ്സിലായത്. അക്കൗണ്ട് ഉടൻ ബ്ലോക്ക് ചെയ്തതിനാൽ ബാക്കി തുക നഷ്ടമായി‍ല്ല.

വിളിക്കാം 1912

കെ.എസ്.ഇ.ബി അയ‍യ്ക്കുന്ന സന്ദേശങ്ങളിൽ ബിൽത്തുക, കൺസ്യൂമർ നമ്പർ, സെക്‌ഷന്റെ പേര്, പണ‍മടയ്ക്കേണ്ട അവസാന തീയതി, വെബ്സൈറ്റ് ലിങ്ക് (wss.kseb.in) തുടങ്ങിയ വിവരങ്ങൾ ഉൾപ്പെടുത്തിയിരി‍ക്കുമെന്നും വ്യാജ സന്ദേശങ്ങ‍ളോടു പ്രതികരിക്ക‍രുതെന്നും കെഎസ്ഇബി അറിയിച്ചു. വ്യാജസന്ദേശങ്ങൾ ലഭിച്ചാൽ കെ.എസ്.ഇ.ബി.യുടെ കസ്റ്റമർ കെയറിൽ (1912) വിളിക്കാം. 9496001912 എന്ന വാട്സാ‍പ് നമ്പറിലും അറിയിക്കാം.