ചെന്നൈ: തമിഴ്‌നാട്ടിൽ വാഹനാപകടത്തിൽ പരിക്കേൽക്കുന്നവർക്ക് ആദ്യ 48 മണിക്കൂറിൽ സൗജന്യചികിത്സ ലഭ്യമാക്കുന്ന പദ്ധതിയ്ക്ക് തുടക്കം. ‘ഇന്നുയിർ കാപ്പോം-നമ്മെ കാക്കും 48’ എന്ന പദ്ധതി മുഖ്യമന്ത്രി എം.കെ. സ്റ്റാലിൻ ഉദ്ഘാടനം ചെയ്തു. സംസ്ഥാനത്തിനുള്ളിൽ വാഹനാപകടത്തിൽ പരിക്കേൽക്കുന്ന തമിഴ്നാട്ടുകാരെ കൂടാതെ ഇതരസംസ്ഥാനങ്ങളിൽ നിന്നുള്ളവർക്കും വിദേശികൾക്കും പദ്ധതിപ്രകാരം ചികിത്സ ലഭിക്കും. പരാമവധി ഒരു ലക്ഷം രൂപവരെയുള്ള ചികിത്സയാണ് നൽകുന്നത്. 201 സർക്കാർ ആശുപത്രികളും 408 സ്വകാര്യ ആശുപത്രികളുമായി സംസ്ഥാനത്ത് ആകെ 609 ആശുപത്രികളാണ്സൗജന്യ ചികിത്സയ്ക്കായി തിരഞ്ഞെടുത്തിരിക്കുന്നത്.  

ജില്ലാ ആശുപത്രികൾ, മെഡിക്കൽ കോളജുകൾ തുടങ്ങി പ്രധാന സർക്കാർ ആശുപത്രികളും ദേശീയ പാതകൾ അടക്കം സംസ്ഥാനത്തെ മുഖ്യറോഡുകൾക്ക് സമീപമുള്ള സ്വകാര്യആശുപത്രികളും ഇതിൽ ഉൾപ്പെട്ടിരിക്കുന്നു. അപകടത്തിൽപ്പെടുന്നവരെ ആശുപത്രിയിൽ എത്തിച്ച് ജീവൻ രക്ഷിക്കുന്നവർക്ക് 5,000 രൂപ പാരിതോഷികം നൽകുന്ന പദ്ധതിയും നടപ്പാക്കും.