തിരുവനന്തപുരം: ആർ.ഡി.ഒ. ഓഫീസുകളിലും താലൂക്ക് ഓഫീസുകളിലും എക്‌സിക്യുട്ടീവ് പദവിയിലുള്ള ഉദ്യോഗസ്ഥർ അധികാരപരിധി വിട്ടുപോകുന്നതിനു മുൻപ് കളക്ടർമാരുടെ അനുമതി തേടണം. വടകര താലൂക്ക് ഓഫീസ് തീപ്പിടിത്തത്തിന്റെ പശ്ചാത്തലത്തിലാണ് ലാൻഡ് റവന്യൂ കമ്മിഷണർ കെ. ബിജുവിന്റെ നിർദേശം.

അനുമതി വാങ്ങാതെ മറ്റാവശ്യങ്ങൾക്കായി പോകുന്നതിനാൽ അവരുടെ അധികാരപരിധിയിലുണ്ടാകുന്ന അടിയന്തരസാഹചര്യങ്ങൾ കാര്യക്ഷമമായി കൈകാര്യംചെയ്യുന്നതിന് തടസ്സമുണ്ടാകുന്നതായി കണ്ടെത്തിയിട്ടുണ്ട്. സബ്കളക്ടർ, റവന്യൂ ഡിവിഷനൽ ഓഫീസർ, തഹസിൽദാർ, തഹസിൽദാർ (ഭൂരേഖ) എന്നിവർ അടിയന്തരഘട്ടങ്ങളിൽ കളക്ടറുടെ അനുമതി നിർബന്ധമായും വാങ്ങണം. ആ ഉദ്യോഗസ്ഥന് പകരം ഉദ്യോഗസ്ഥനെ കളക്ടർ ചുമതലപ്പെടുത്തണം. 

ജില്ലകളിൽ പ്രവർത്തിക്കുന്ന എമർജൻസി ഓപ്പറേഷൻ സെന്റർ, താലൂക്ക് തലങ്ങളിൽ പ്രവർത്തിക്കുന്ന എമർജൻസി ഓപ്പറേഷൻ സെന്റർ എന്നിവിടങ്ങളിൽ 24 മണിക്കൂറും ഉദ്യോഗസ്ഥർ ഹാജരായിരിക്കണം. ഈ സംവിധാനങ്ങൾ പൂർണമായും പ്രവർത്തനസജ്ജമായിരിക്കണമെന്നും അത് കളക്ടർമാർ ഉറപ്പുവരുത്തണമെന്നും ലാൻഡ്‌ റവന്യൂ കമ്മിഷണറുടെ ഉത്തരവിൽ പറയുന്നു.