ഇരിക്കൂർ : ഭക്തിയുടെയും മതമൈത്രിയുടെയും പ്രതീകമായി അറിയപ്പെടുന്ന ഇരിക്കൂർ നിലാമുറ്റം മഖാം ഉറൂസിലേക്ക് വിശ്വാസികളുടെ പ്രവാഹം. പത്തുനാൾ നീളുന്ന ഉറൂസ് വ്യാഴാഴ്ചയാണ് തുടങ്ങിയത്. കോവിഡ് വ്യാപനത്തെത്തുടർന്ന് കഴിഞ്ഞവർഷം പ്രതീകാത്മകമായി മാത്രമേ ഉറൂസ് നടന്നുള്ളൂ.

കിഴക്കൻ മലയോരത്തെ പ്രധാന ആരാധനാകേന്ദ്രങ്ങളിലൊന്നായ നിലാമുറ്റം ഉറൂസിന് ജാതി-മതഭേദമില്ലാതെ നൂറുകണക്കിനാളുകൾ പങ്കെടുക്കും. ശനിയാഴ്ച മതപ്രഭാഷണങ്ങൾ തുടങ്ങും. ബാഫഖി പുഴക്കര, അറക്കൽ അബ്ദുൾ റസാഖ് ദാരിമി, റഹ്മത്തുള്ള ഖാസിമി മൂത്തേടം, അസീസ് ഫൈസി പേരാമ്പ്ര, സിറാജുദ്ദീൻ അൽഖാസിമി, ശക്കീർ ഹൈത്തമി കീച്ചേരി, അടിവാട് അഹമ്മദ് കബീർ ബാഖവി, നൗഷാദ് ബാഖവി ചിറയിൽകീഴ് എന്നിവർ തുടർദിവസങ്ങളിൽ പ്രഭാഷണം നടത്തും.

മുഖ്യ ആകർഷണം പൗരാണിക ഖബറുകൾ

പുഴയോരത്ത് തണൽവിരിച്ചുനിൽക്കുന്ന വൻമരങ്ങൾക്കും വള്ളിപ്പടർപ്പുകൾക്കും കുറ്റിക്കാടുകൾക്കും ഇടയിൽ കാണുന്ന പൗരാണികമായ ഖബറുകളാണ് ഇവിടത്തെ മുഖ്യ ആകർഷണം.

പോർച്ചുഗീസ്‌ അധിനിവേശത്തിന്റെ നാളുകളോളം പഴക്കമുണ്ട്‌ ഈ ഖബറുകൾക്കെന്നാണ് പറയപ്പെടുന്നത്.

ചെങ്കല്ലുകൾ പ്രത്യേക രീതിയിൽ ചെത്തിമിനുക്കിയെടുത്തതാണ് ഇവ. അതിൽത്തന്നെ വെണ്ണക്കല്ലിൽ തീർത്തവയുമുണ്ട്. അവയുടെ നെറ്റിയിൽ അറബിലിഖിതങ്ങൾ.

പ്രവാചകന്റെ അനുചരരിൽപ്പെട്ട സ്വഹാബിമാർ മതപ്രബോധനവുമായെത്തിയ ദേശമാണ് ഇതെന്നും അവർ നിലാമുറ്റത്തെ ഈ ഖബറുകളിലാണ്‌ അന്ത്യവിശ്രമം കൊള്ളുന്നതെന്നും ഒരു വിഭാഗം വിശ്വസിക്കുന്നു.

1529 മുതൽ പള്ളിയും പള്ളിഭരണവും ആരംഭിച്ചതായി രേഖയുണ്ടെന്ന് ഇരിക്കൂറിന്റെ ചരിത്രകാരനും അധ്യാപകനുമായ കെ.പി. അസീസ് സാക്ഷ്യപ്പെടുത്തുന്നു.