കുണ്ടുചിറ : വയോജനങ്ങളുടെ ശാരീരിക മാനസിക സംരക്ഷണം ഉറപ്പുവരുത്തുക എന്നത് സർക്കാരിനൊപ്പം തന്നെ നമ്മുടെ ഓരോരുത്തരുടെയും കടമയാണെന്ന് പൊതുമരാമത്ത്, ടൂറിസം വകുപ്പ് മന്ത്രി പി.എ.മുഹമ്മദ്‌ റിയാസ് പറഞ്ഞു. പാനൂർ ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി കതിരൂർ പഞ്ചായത്തിൽ നിർമിച്ച ഇ.കെ. നായനാർ പകൽവിശ്രമകേന്ദ്രം ഉദ്ഘാടനംചെയ്യുകയായിരുന്നു മന്ത്രി. കോവിഡ് കാലത്ത് കരുതലോടെയുള്ള സമീപനമാണ് വയോജനങ്ങളുടെ കാര്യത്തിൽ സർക്കാർ നടത്തികൊണ്ടിരിക്കുന്നതെന്നും വയോജനങ്ങളെ ചേർത്തുനിർത്താൻ എല്ലാവരും പ്രതിജ്ഞാബദ്ധരാണെന്നും അദ്ദേഹം പറഞ്ഞു.

പാനൂർ ബ്ലോക്ക് പഞ്ചായത്ത് പ്ലാൻ ഫണ്ടിൽനിന്ന് അനുവദിച്ച 20 ലക്ഷം രൂപയും ജില്ലാ പഞ്ചായത്ത് ഫണ്ടിൽനിന്ന് അനുവദിച്ച അഞ്ച് ലക്ഷം രൂപയും ഉപയോഗിച്ചാണ് കെട്ടിടം പണിതത്. രണ്ട്‌ ബെഡ് റൂം, ഒരു സെൻട്രൽ ഹാൾ, ഒരു അടുക്കള, ആവശ്യമായ ഫർണിച്ചർ തുടങ്ങിയ സൗകര്യങ്ങളാണ് ഇവിടെ ഒരുക്കിയിരിക്കുന്നത്. കുണ്ടുചിറ ജൂബിലി അങ്കണവാടിക്ക് സമീപം എ.കെ.ജി. സ്മാരക ലൈബ്രറി ആൻഡ് സ്പോർട്സ് ക്ലബ്ബ് സംഭാവനചെയ്ത അഞ്ച് സെൻറ് സ്ഥലത്താണ് വിശ്രമകേന്ദ്രം പണിതത്.

എ.എൻ. ഷംസീർ എം.എൽ.എ. അധ്യക്ഷത വഹിച്ചു. പാനൂർ ബ്ലോക്ക് പഞ്ചായത്ത് പ്രസിഡൻറ് എ. ശൈലജ, കതിരൂർ പഞ്ചായത്ത് പ്രസിഡൻറ് പി.പി. സനിൽ, ബ്ലോക്ക് പഞ്ചായത്ത് വൈസ് പ്രസിഡൻറ് ടി.ടി. റംല, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ കെ.പി. ശശിധരൻ, ജില്ലാ പഞ്ചായത്ത് അംഗം മുഹമ്മദ്‌ അഫ്സൽ, ബ്ലോക്ക് പഞ്ചായത്ത് അംഗം പി.വി. സന്തോഷ്‌, വാർഡ് അംഗം ടി.കെ. ഷാജി, ബ്ലോക്ക് പഞ്ചായത്ത് സെക്രട്ടറി ടി.വി. സുഭാഷ്, ശിശുവികസന പദ്ധതി ഓഫീസർ എ.പി. പ്രസന്ന, അസി. എക്സിക്യുട്ടീവ് എൻജിനീയർ സി.എസ്. ഷിജു, വിവിധ രാഷ്ട്രീയ പാർട്ടി പ്രതിനിധികളായ പൊന്ന്യം കൃഷ്ണൻ, എ.വി. ദാമോദരൻ, പി. പ്രസന്നൻ, എ. വാസു, സുഗീഷ് പൊന്ന്യം എന്നിവർ സംസാരിച്ചു.