കോട്ടയം: മലിനീകരണ നിയന്ത്രണ ബോർഡിലെ കൈക്കൂലി കേസിൽ അന്വേഷണം വ്യാപിപ്പിച്ച് വിജിലൻസ്. കോട്ടയത്തെ കൈക്കൂലി കേസിൽ രണ്ടാം പ്രതിയായ സിനീയർ എൻവയൺമെന്റ് എഞ്ചിനീയർ ജെ. ജോസ് മോന്റെ കൊല്ലത്തെ വീട്ടിൽ വിജിലൻസ് റെയ്ഡ് നടത്തി. ലക്ഷക്കണക്കിന് വിദേശ കറൻസികൾ, കോടികളുടെ സാമ്പത്തിക ഇടപാടുകൾ നടത്തിയതിന്റെ രേഖകൾ, സ്വർണം തുടങ്ങിയവ വിജിലൻസ് കണ്ടെടുത്തു.

പാലായിലെ ടയർ വ്യവസായിയിൽ നിന്ന് കൈക്കൂലി വാങ്ങിയ കേസിൽ രണ്ടാം പ്രതിയാണ് മലിനീകരണ നിയന്ത്രണ ബോർഡിലെ സീനിയർ എൻവയൺമെന്റ് എഞ്ചിനീയർ ജെ. ജോസ് മോൻ. ഇയാളുടെ കൊട്ടാരക്കരയിലെ വീട്ടിലാണ് വിജിലൻസ് ഇന്നലെ അർധരാത്രിയോടെ റെയ്ഡ് നടത്തിയത്. വീട്ടിൽനിന്ന് ഒന്നര ലക്ഷത്തിലധികം രൂപയും അത്രതന്നെ മൂല്യമുള്ള വിദേശ കറൻസികളും കണ്ടെടുത്തു.

ജോസ് മോന് ബാങ്കിൽ രണ്ട് കോടി രൂപയുടെ സ്ഥിര നിക്ഷേപമുണ്ടെന്നാണ് വിജിലൻസ് വ്യക്തമാക്കുന്നത്. ഇയാളുടെ പേരിൽ വാഗമണ്ണിൽ റിസോർട്ടും കൊട്ടാരക്കര ഏഴുകോണിൽ 3500 ചതുരശ്ര അടിയിൽ ആഡംബര വീടും ഉണ്ട്. ഇതു കൂടാതെ ഏഴുകോണിൽ തന്നെ രണ്ടിടങ്ങളിലായി 17 സെന്റ് ഭൂമിയും ഇതിൽ അഞ്ച് കടമുറികളും രണ്ട് ഫ്ലാറ്റുകളും ഇയാളുടെ പേരിലുള്ളതായി കണ്ടെത്തി. 

സിയാൽ ഉൾപ്പെടെയുള്ള സ്ഥാപനങ്ങളിൽ ഷെയർ, വിവിധ ഇൻഷുറൻസ് പോളിസികളിൽ നിക്ഷേപം എന്നിവ സംബന്ധിച്ച രേഖകളും വിജിലൻസ് പിടിച്ചെടുത്തു. നൂറ് പവനോളം സ്വർണം കൈവശമുണ്ട്. റെയ്ഡ് നടക്കുമ്പോൾ ജോസ് മോൻ വീട്ടിൽ ഉണ്ടായിരുന്നില്ല. വിവരം അറിഞ്ഞതോടെ ഇയാൾ ഒളിവിൽ പോയതായി വിജിലൻസ് അറിയിച്ചു. കഴിഞ്ഞ ദിവസം ജില്ലാ ഓഫീസർ ഹാരിസിന്റെ വീട്ടിലും വിജിലൻസ് റെയ്ഡ് നടത്തിയിരുന്നു. അടുക്കളയിലും അതിലെ അലമാരയിലുമൊക്കെയായിരുന്നു ഇയാൾ പണം ശേഖരിച്ചുവെച്ചിരുന്നത്. ഇത് 17 ലക്ഷം രൂപ വരുമെന്നാണ് വിജിലൻസ് അറിയിച്ചത്.