തിരുവനന്തപുരം : സംസ്ഥാനത്ത് സംഘടിത കുറ്റകൃത്യങ്ങളും ഗുണ്ടാ പ്രവർത്തനങ്ങളും തടയുന്നതിന് ഓരോ ജില്ലയിലും ഡി.വൈ.എസ്.പി. യുടെ നേതൃത്വത്തിൽ സ്പെഷൽ ആക്‌ഷൻ ഗ്രൂപ്പ് രൂപീകരിക്കുന്നു. ഇത്തരം സംഭവങ്ങൾ കൂടുന്ന സാഹചര്യത്തിലാണ് ഇവ നിയന്ത്രിക്കുന്നതിന് പ്രത്യേക സംവിധാനം രൂപീകരിക്കാൻ ഡി.ജി.പി അനിൽ കാന്ത് നിർദേശം നൽകിയത്. ജില്ലാതലത്തിൽ നർകോട്ടിക് സെൽ ഡി.വൈ.എസ്.പി.യുടെ നേതൃത്വത്തിൽ രണ്ട് സബ് ഇൻസ്പെക്ടർമാരും കുറഞ്ഞത് 10 പൊലീസ് ഉദ്യോഗസ്ഥരും അടങ്ങുന്നതായിരിക്കും സ്പെഷൽ ആക്‌ഷൻ ഗ്രൂപ്പ്.

ജില്ലാ പൊലീസ് മേധാവിമാരുടെ നിയന്ത്രണത്തിലുള്ള ഈ സംഘം ഗുണ്ടകളെയും സാമൂഹിക വിരുദ്ധരെയും ലഹരിമരുന്ന്, സ്വർണം, ഹവാല എന്നിവ കടത്തുന്നവരെയും കണ്ടെത്താൻ നടപടി സ്വീകരിക്കും. ക്രിമിനലുകളുടെ വരുമാന സ്രോതസ്സും സമ്പത്തും അന്വേഷിക്കും. ജാമ്യവ്യവസ്ഥകൾ ലംഘിക്കുന്ന ക്രിമിനലുകളുടെ ജാമ്യം റദ്ദാക്കാൻ നടപടിയെടുക്കും. ജില്ലാ പൊലീസ് മേധാവിമാർ എല്ലാ ആഴ്ചയിലും, റേഞ്ച് ഡി.ഐ.ജി.മാർ രണ്ടാഴ്ച കൂടുമ്പോഴും സംഘത്തിന്റെ പ്രവർത്തനം വിലയിരുത്തും.

ഓരോ സ്റ്റേഷനിലും ആന്റി ഓർഗനൈസ്ഡ് ക്രൈം സെൽ

സംസ്ഥാനത്തെ ഓരോ പൊലീസ് സ്റ്റേഷനും കേന്ദ്രീകരിച്ച് ആന്റി ഓർഗനൈസ്ഡ് ക്രൈം സെല്ലുകൾക്ക് രൂപം നൽകും. കുറഞ്ഞത് ഒരു എസ്ഐ യും രണ്ട് പൊലീസ് ഉദ്യോഗസ്ഥരും ഈ സെല്ലിലുണ്ടാകും. സംഘടിത കുറ്റകൃത്യങ്ങ‍ൾ തടയാൻ ജില്ലാ അടിസ്ഥാനത്തിൽ രൂപീകരിക്കുന്ന സ്പെഷൽ ആക്‌ഷൻ ഗ്രൂപ്പ് നിർവഹിക്കുന്ന ചുമതലകൾ തന്നെയാകും പൊലീസ് സ്റ്റേഷൻ തലത്തിൽ ഈ സെല്ലും ചെയ്യുക. സെല്ലിന്റെ നിരീക്ഷണവും ചുമതലയും സ്റ്റേഷൻ ഹൗസ് ഓഫിസർക്കായിരിക്കും. 

നിയമ നടപടികൾക്കായി ‘ഓപ്പറേഷൻ കാവൽ’

ലഹരിമരുന്ന്, മണൽ, കള്ളക്കടത്ത്, സംഘം ചേർന്നുള്ള ആക്രമണം എന്നിവ തടയുന്നതിനും ഇവയ്ക്കു പിന്നിൽ പ്രവർത്തിക്കുന്നവരെ കണ്ടെത്തി നിയമ നടപടികൾക്കും പ്രത്യേക പദ്ധതിക്കും പൊലീസ് രൂപം നൽകി. ‘ഓപ്പറേഷൻ കാവൽ’ എന്ന് പേരിട്ട പദ്ധതിയുടെ മാർഗനിർദേശങ്ങൾ ഡി.ജി.പി അനിൽ കാന്ത് പുറപ്പെടുവിച്ചു. അക്രമ സംഭവങ്ങളിൽ സംസ്ഥാനത്ത് രജിസ്റ്റർ ചെയ്തിട്ടുള്ള കേസുകളിൽ ഉൾപ്പെട്ടവരെയെല്ലാം ഇതിന്റെ ഭാഗമായി ഏതാനും ദിവസങ്ങൾക്കകം അറസ്റ്റ് ചെയ്യും.

∙ വിവിധ കുറ്റകൃത്യങ്ങളിൽ ഏർപ്പെട്ട ശേഷം ഒളിവിൽ കഴിയുന്നവരെ കണ്ടെത്താനായി ജില്ലാ പൊലീസ് മേധാവികൾ പ്രത്യേക സംഘത്തിന് രൂപം നൽകും.

∙ സാമൂഹികവിരുദ്ധ പ്രവർത്തനങ്ങളിൽ ഏർപ്പെടുന്നവരുടെ പട്ടിക തയാറാക്കി സ്പെഷൽ ബ്രാഞ്ച്  ഇവരെ കർശനമായി നിരീക്ഷിക്കും.

∙ ജാമ്യത്തിലിറങ്ങിയവർ വ്യവസ്ഥകൾ ലംഘിക്കുന്നുണ്ടോയെന്ന് പരിശോധിക്കും. ലംഘിച്ചെന്ന് കണ്ടെത്തിയാൽ ജാമ്യം റദ്ദാക്കി റിമാൻഡ് ചെയ്യാൻ നടപടി സ്വീകരിക്കും. ഇതിനായി സ്റ്റേറ്റ് സ്പെഷൽ ബ്രാഞ്ച് രഹസ്യാന്വേഷണം നടത്തും.

∙ ക്രിമിനൽ കേസ് പ്രതികളുടെയും കുറ്റവാളികൾ എന്ന് സംശയിക്കുന്നവരുടെയും സങ്കേതങ്ങളിൽ പരിശോധന നടത്തും.

∙ നേരത്തേ അക്രമ സംഭവങ്ങളിൽ ഉൾപ്പെട്ടിട്ടുള്ളവരുടെ ഡേറ്റ ബേസ് ജില്ലാ അടിസ്ഥാനത്തിൽ തയാറാക്കും. ആവശ്യമെങ്കിൽ കാപ്പ നിയമപ്രകാരം ഇവരെ അറസ്റ്റ് ചെയ്യും.

∙ സ്ഥിരം കുറ്റവാളികളുടെ മുഴുവൻ വിവരങ്ങളും ജില്ലാ പൊലീസ് മേധാവിമാർ തയാറാക്കും.

∙ കുറ്റകൃത്യങ്ങൾക്ക് ഉപയോഗിക്കുന്ന വാഹനങ്ങൾ കണ്ടുകെട്ടും. നടപടികൾ ജില്ലാ പൊലീസ് മേധാവിമാർ മുഖേന സ്പെഷൽ ബ്രാഞ്ച് ഡി.വൈ.എസ്.പി.മാർ എല്ലാ ദിവസവും രാവിലെ ഡി.ജി.പി.ക്ക് ലഭ്യമാക്കാനും നിർദേശമുണ്ട്.