പാപ്പിനിശ്ശേരി: ദേശീയപാതാ വികസനത്തിന്റെ ഭാഗമായി കണ്ണൂർ ബൈപ്പാസിൽ വളപട്ടണം പുഴയ്ക്ക് കുറുകെ നിർമിക്കുന്ന പുതിയ പാലത്തിന്റെ ട്രയൽ പൈലിങ് തുടങ്ങി. കണ്ണൂർ ബൈപ്പാസിൽ നിർമിക്കുന്ന ഏറ്റവും നീളമുള്ള പാലമാണ് പാപ്പിനിശ്ശേരി-കോട്ടക്കുന്ന് ഭാഗങ്ങളെ ബന്ധിപ്പിച്ച് നിർമിക്കുന്നത്. പാലത്തിന് ഒരു കിലോമീറ്റർ നീളമുണ്ടാകും. സ്ഥലങ്ങൾ ഏറ്റെടുക്കൽ ഭൂരിഭാഗവും പൂർത്തിയായതോടെ ദേശീയപാത വികസനത്തിന്റെ ഭാഗമായുള്ള ചതുപ്പുപ്രദേശങ്ങളിലും മറ്റും മണ്ണിട്ട് നിറയ്ക്കുന്ന പ്രവൃത്തികൾക്ക് വേഗം കൂടി. വളപട്ടണം പുഴയുടെ മറുകരയായ ചിറക്കൽ പഞ്ചായത്തിന്റെ ഭാഗമായ കോട്ടക്കുന്ന്, കാട്ടാമ്പള്ളി ഭാഗങ്ങളിലും പുതിയ പാതയുടെ വഴിയൊരുക്കൽ പ്രവൃത്തികൾക്ക് വേഗം കൂട്ടിക്കഴിഞ്ഞു.

ദേശീയപാത വികസനത്തിന്റെ ഭാഗമായി കണ്ണൂർ ജില്ലയിൽ മൂന്ന് ബൈപ്പാസുകളാണ് നിർമിക്കുന്നത്. പയ്യന്നൂർ-തളിപ്പറമ്പ്, കുറ്റിക്കോൽ-മുഴപ്പിലങ്ങാട് കണ്ണൂർ ബൈപ്പാസ്, മുഴപ്പിലങ്ങാട്-മാഹി ബൈപ്പാസ്. ഇതിൽ മാഹി ബൈപ്പാസിന്റെ പ്രവൃത്തികളാണ് വേഗത്തിൽ പുരോഗമിക്കുന്നത്. മറ്റു രണ്ടു ബൈപ്പാസുകളുടെയും 95 ശതമാനം സ്ഥലങ്ങളും ഏറ്റെടുത്തുകഴിഞ്ഞു. പാത കടന്നുപോകുന്ന സ്ഥലങ്ങളിലെ കെട്ടിടങ്ങളും മരങ്ങളും മാറ്റുന്ന പ്രവൃത്തികളും അന്തിമഘട്ടത്തിലാണ്. കണ്ണൂർ ബൈപ്പാസിൽ 82.87 ഹെക്ടർ സ്ഥലമാണ് ഏറ്റെടുക്കുന്നത്. വ്യക്തമായ രേഖകൾ ഹാജരാക്കാൻ ബാക്കിയുള്ള വളരെ കുറച്ച് പേർക്ക് മാത്രമാണ് ഇനിയും നഷ്ടപരിഹാരം നൽകാൻ ബാക്കിയുള്ളത്.