കേളകം: പരിസ്ഥിതിലോലമേഖലകളെ സംബന്ധിച്ച കസ്തൂരിരംഗൻ റിപ്പോർട്ടിന്റെ അന്തിമവിജ്ഞാപനം ഇറങ്ങാനിരിക്കേ വനാതിർത്തി വില്ലേജുകളിലെ ജനങ്ങൾക്ക് ആശങ്ക. നിലവിൽ പരിസ്ഥിതിലോല (ഇ.എസ്.എ.) മേഖലയാക്കാൻ സംസ്ഥാനം ശുപാർശ ചെയ്ത 92 വില്ലേജുകളിൽ 2014-ലെ കരടുവിജ്ഞാപനത്തേക്കാൾ കൂടുതൽ പ്രദേശങ്ങൾ ഉൾപ്പെടുത്തിയതാണ് ജനങ്ങളുടെ ആശങ്കയ്ക്ക് കാരണം. 

9993 ചതുരശ്ര കിലോമീറ്റർ സ്ഥലം 92 വില്ലേജുകളിലായി പരിസ്ഥിതിലോലമായി പ്രഖ്യാപിക്കണമെന്നാണ് സംസ്ഥാന സർക്കാർ കേന്ദ്ര സർക്കാരിനോടാവശ്യപ്പെട്ടിരിക്കുന്നത്. ഇതിൽ 8656 ചതുരശ്ര കി.മീറ്റർ കോർ ഇ.എസ്.എ.യും 1333 സ്ക്വയർ കി.മി. നോൺ കോർ ഇ.എസ്.എ.യും ആക്കണമെന്നാണ് ആവശ്യം. നേരത്തേ ഉമ്മൻ വി.ഉമ്മൻ റിപ്പോർട്ട് പ്രകാരം 123 വില്ലേജുകളിലായി 9993 ചതുരശ്ര കി.മീറ്റർ ഉണ്ടായിരുന്ന ഇ.എസ്.എ. 31 വില്ലേജുകൾ പൂർണമായി ഒഴിവാക്കിയശേഷവും 9993 ചതുരശ്ര കി.മീ. തന്നെയായി നിലനിർത്തിയിരിക്കുകയാണ്. അതിനർഥം, ബാക്കിയുള്ള 92 വില്ലേജുകളിൽ ഇ.എസ്.എ. കൂട്ടിയിട്ടുണ്ടെന്നാണ്. അങ്ങനെ കൂടിയ സ്ഥലങ്ങൾ ഭൂരിഭാഗവും കൃഷിയിടങ്ങളാണ്. എന്നാൽ, അത്തരം സ്ഥലങ്ങളെ നോൺകോർ ഇസ്.എസ്.എ. ആയാണ് ശുപാർശയിൽ ഉൾപ്പെടുത്തിയിരിക്കുന്നത്. ഇതുപ്രകാരം നേരത്തേയുള്ളതിൽനിന്ന് വ്യത്യസ്തമായി കണിച്ചാർ, കേളകം, കൊട്ടിയൂർ പഞ്ചായത്തുകളിൽ കൂടുതൽ സ്ഥലം ഇ.എസ്.എ.യിൽ ഉൾപ്പെടാൻ സാധ്യതയേറെയാണ്.

2018-ലാണ് കേരള സർക്കാർ ഇ.എസ്.എ. 92 വില്ലേജുകളിലായി ചുരുക്കി (8656 ചതുരശ്ര കി.മീ.) കേന്ദ്രത്തിന്‌ ശുപാർശ നൽകിയത്. 31 വില്ലേജുകളെ പൂർണമായും ഒഴിവാക്കിയ ശുപാർശയാണ് നൽകിയതെങ്കിലും ബാക്കിയുള്ള 92 വില്ലേജുകളിൽ ജനവാസമേഖലയിൽ കൂടുതൽ ജിയോ കോർഡിനേറ്റുകൾ ഉൾപ്പെടുത്തി. പുതുതായി 150 ജിയോ കോർഡിനേറ്റ്സ് കൂടി ഉൾപ്പെടുത്തി. അന്തിമവിജ്ഞാപനം ഇറക്കുന്നതിന് മുൻപ് ജിയോ കോർഡിനേറ്റുകൾ ഗ്രൗണ്ടിൽ മാർക്ക് ചെയ്തു ബോധ്യപ്പെടുത്തണമെന്നാണ്‌ ജനങ്ങളുടെ ആവശ്യം.