കണ്ണൂർ : കണ്ണൂരിൽ അതിമാരക ലഹരിമരുന്നായ എൽ.എസ്.ഡി സ്റ്റാമ്പുമായി രണ്ട് യുവാക്കൾപിടിയിലായി. ലഹരിമരുന്ന് കടത്താൻ ഉപയോഗിച്ച സ്‌കൂട്ടറും പിടികൂടി. സംഭവത്തിൽ കണ്ണൂർ നീർക്കടവ് സ്വദേശി ചെട്ടിപ്പറമ്പത്ത് വീട്ടിൽ സി.പി പ്രജൂൺ, കണ്ണൂർ കക്കാട് പള്ളിപ്രം സ്വദേശി ഷീബാലയത്തിൽ ടി.യദുൽ എന്നിവരെ അറസ്റ്റ് ചെയ്തു. രഹസ്യവിവരത്തിൽ ദിവസങ്ങളോളം നടത്തിയ രഹസ്യ നിരീക്ഷണത്തിലാണ് ഇവർ പിടിയിലാകുന്നത്. കണ്ണൂർ ടൗൺ, സിറ്റി കേന്ദ്രീകരിച്ച് മയക്കുമരുന്ന് വിൽപ്പന ചെയ്യുന്ന പ്രധാനകണ്ണികളാണ് എക്‌സൈസിന്റെ വലയിലായത്. കണ്ണൂർ ജില്ലയിൽ ഇതുവരെ പിടിച്ചതിൽ ഏറ്റവും വലിയ എൽ.എസ്.ഡി വേട്ടയാണിത്.

നഗരങ്ങളിൽ നടത്തുന്ന ഡി.ജെ പാർട്ടികളിൽ പ്രധാനമായും ഉപയോഗിക്കുന്ന പേപ്പർ, സൂപ്പർമാൻ , ബൂമർ, ലാല, ആലീസ്, എന്നീ കോഡ് ഭാഷകളിലും ചെല്ലപ്പേരിലറിയപ്പെടുന്ന അതിമാരക ലഹരി മരുന്നാണ് എൽ.എസ്.ഡി. വിവിധ വർണ്ണചിത്രങ്ങളിലും, വിവിധ രൂപത്തിലും വളരെ ചെറിയ അളവിലും ലഭിക്കുന്നതിനാൽ ശരീര ഭാഗങ്ങളിലും എവിടെയും ഒളിപ്പിക്കുവാൻ കഴിയുന്നതുമായ ഈ ലഹരിമരുന്ന് കണ്ടുപിടിക്കുന്നത് തന്നെ വളരെ പ്രയാസകരമാണ്.

എക്‌സൈസ് റേഞ്ച് ഇൻസ്‌പെക്ടർ സിനു കൊയില്യത്തിന്റെ നേതൃത്വത്തിലാണ് റെയ്ഡ് നടന്നത്. അസിസ്റ്റന്റ് എക്‌സൈസ് ഇൻസ്‌പെക്ടർ പി.ടി. യേശുദാസൻ, പ്രിവന്റീവ് ഓഫീസർമാരായ ശശി ചേണിച്ചേരി, എം.കെ. സന്തോഷ്, ജോർജ് ഫെർണാണ്ടസ്, കെ.എം. ദീപക്, കെ.വി. ഹരിദാസൻ, എക്‌സൈസ് കമ്മീഷണർ സ്‌ക്വാഡ് അംഗങ്ങളായ പി. രജിരാഗ്, പി. ജലിഷ്, കെ. ബിനീഷ് എന്നിവരടങ്ങിയ സംഘമാണ് ലഹരിമരുന്ന് വിൽപ്പനക്കാരെ പിടികൂടിയത്. പിടികൂടിയ ലഹരിമരുന്നിന് ലക്ഷങ്ങൾ വില വരും.