ചേർപ്പ് : പെരിഞ്ചേരി പാറമ്മേൽ സുനിൽകുമാറും കുടുംബവും ഒത്തുചേരുന്നിടമെല്ലാം സ്റ്റുഡിയോ ആയി മാറും. ഫോട്ടോഗ്രാഫിയിലെ തലമുറ സംഗമമാണ് ഇവരുടെ വീട്ടിൽ. സുനിൽ കുമാറും ഭാര്യ രതിയും ചേർന്നാണ് സ്റ്റുഡിയോയുടെ നടത്തിപ്പ്. ഫോട്ടോയും വീഡിയോയും പകർത്തുന്നതുമുതൽ ലൈറ്റ് ബോയിയുടെ ജോലി വരെ രതി ചെയ്യും. ഡ്രോൺ ഉപയോഗിച്ചുള്ള ഫോട്ടോ മുതൽ കാൻഡിഡ് ഫോട്ടോഗ്രാഫി വരെ നീളുന്ന പുതുതലമുറ സങ്കേതങ്ങളിൽ സമർഥരാണു 3 മക്കൾ.

3 പതിറ്റാണ്ട്  മുൻപ് പ്രവാസ ജീവിത കാലത്താണ് സുനിൽകുമാർ സ്റ്റുഡിയോ ആരംഭിക്കുന്നത്. വിവാഹശേഷം സ്റ്റുഡിയോയുടെ നടത്തിപ്പിനായി രതിയെ ഫോട്ടോഗ്രാഫി പഠിപ്പിച്ചു. പ്രവാസ ജീവിതം അവസാനിപ്പിച്ച് സുനിൽകുമാർ നാട്ടിൽ മടങ്ങിയെത്തിയപ്പോൾ ഇരുവരും ചേർന്നായി സ്റ്റുഡിയോ നടത്തിപ്പ്. മക്കളായ മാനവ് മാധവ്, ആകാശ്, സ്വേത എന്നിവരും ചേർന്നപ്പോൾ പടമെടുപ്പ് പുതിയ തലത്തിലായി. ഏഴാം ക്ലാസുകാരിയാണെങ്കിലും സ്വേത വീഡിയോഗ്രാഫിയിലെ പുതിയ പ്രവണതകൾ ഉത്സാഹത്തോടെ പരീക്ഷിക്കുന്നു. മൂത്തമകൻ മാനവ് ഡ്രോൺ ഉപയോഗിച്ചുള്ള ഫോട്ടോഗ്രാഫിയിൽ സമർഥനാണ്. രണ്ടാമത്തെയാൾ ആകാശ് കാൻഡിഡ് ഫോട്ടോഗ്രാഫി വിദ്യയിലാണ് നിപുണൻ. സ്റ്റുഡിയോയ്ക്കു ലഭിക്കുന്ന ഓരോ ജോലിയും ഇവർ ഒന്നിച്ചാണ് ഏറ്റെടുക്കുന്നതും പൂർത്തിയാക്കുന്നതും.