കണ്ണൂർ: പ്രകൃതിഭംഗികൊണ്ടും അചാരാനുഷ്ഠാനങ്ങൾകൊണ്ടും രുചിയൂറും ഭക്ഷണംകൊണ്ടും ചരിത്രപരമായ നിർമിതികൾകൊണ്ടുമെല്ലാം ലോകത്തെ മറ്റേതു വിനോദസഞ്ചാര കേന്ദ്രങ്ങളോടും കിടപിടിക്കുന്നന്ന ഇടമാണ് വടക്കേ മലബാർ. എങ്കിലും കേരളത്തിൽ എത്തുന്ന സഞ്ചാരികളിൽ ചെറിയൊരു പങ്ക് മാത്രമേ കണ്ണൂർ, കാസർകോട് ജില്ലകളിൽ എത്തുന്നുള്ളൂ. ഈ കുറവു പരിഹരിക്കാനായി വിനോദസഞ്ചാര ഉത്സവത്തിന് ഒരുങ്ങുകയാണ് നാട്. കണ്ണൂർ വിമാനത്താവളത്തിൽ നിന്നുള്ള ആദ്യ വിമാന യാത്രക്കാരുടെ കൂട്ടായ്മയായ ഹിസ്റ്റോറിക്കൽ ഫ്ലൈറ്റ് ജേണി അംഗങ്ങൾ മുന്നോട്ടുവച്ച ആശയം കണ്ണൂർ ഡവലപ്മെന്റ് ഫോറവും വിനോദസഞ്ചാര വകുപ്പും കിയാലും ഏറ്റെടുത്തതോടെയാണ് രണ്ടു മാസം നീളുന്ന ഉത്സവത്തിന് അരങ്ങൊരുങ്ങിയത്.

ഡെസ്റ്റിനേഷൻ‌ കണ്ണൂർ വിനോദസഞ്ചാര ഉത്സവത്തിന് ജില്ലയിലെ 10 ടൂർ ഓപ്പറേറ്റർമാരെ ഒഫിഷ്യൽ പാർട്ണർമാരായി നിശ്ചയിച്ചതായി ടൂറിസം ഡപ്യൂട്ടി ഡയറക്ടർ പ്രശാന്ത് വാസുദേവ് പറഞ്ഞു. തെയ്യക്കാവുകൾ, തീരങ്ങൾ, മലയോരം, കണ്ണൂരിന്റെ ഭക്ഷണം, പുഴയാത്ര, വിവിധ ആചാര അനുഷ്ഠാനങ്ങൾ, ചരിത്ര സ്മാരകങ്ങൾ എന്നിവ സന്ദർശിക്കാൻ അവസരമൊരുക്കുന്ന തരത്തിൽ 10 പാക്കേജുകൾ തയാറാക്കാൻ ഇവരോടു നിർദേശിച്ചതായും ഡപ്യൂട്ടി ഡയറക്ടർ പറഞ്ഞു. ഈ ദിവസങ്ങളിൽ മികച്ച താമസ സൗകര്യം ലഭ്യമാക്കുന്ന കാര്യം ഉറപ്പുനൽകുന്നതായി കണ്ണൂർ അക്കമഡേഷൻ പ്രൊവൈഡേഴ്സ് അസോസിയേഷൻ (കാപ്പ) ഭാരവാഹികൾ അറിയിച്ചു. മാർച്ച് 15 മുതൽ മേയ് 15 വരെയുള്ള 60 ദിവസങ്ങളാണ് ടൂറിസം ഉത്സവമായി ആഘോഷമാക്കാൻ നിശ്ചയിച്ചിട്ടുള്ളത്. 

കുറഞ്ഞ നിരക്കിൽ മികച്ച സൗകര്യങ്ങൾ നൽകി പരമാവധി വിനോദസഞ്ചാരികളെ കണ്ണൂർ, കാസർകോട് ജില്ലകളിലെ വിനോദസഞ്ചാര കേന്ദ്രങ്ങളിൽ എത്തിക്കാനാണ് ലക്ഷ്യം. ആലോചന യോഗത്തിൽ കണ്ണൂർ ഡവലപ്മെന്റ് ഫോറം കോ–ചെയർമാൻ സി.ജയചന്ദ്രൻ, ജനറൽ കൺവീനർ പ്രശാന്ത്​ പുത്തലത്ത്​, ട്രഷറർ വിനോദ് നാരായണൻ, ടീം ഹിസ്റ്റോറിക്കൽ ഫ്ലൈറ്റ് ജേണി കോഓർഡിനേറ്റർ റഷീദ് കുഞ്ഞിപ്പാറാൽ തുടങ്ങിയവരും ടൂർ ഓപ്പറേറ്റർമാരും ഹോട്ടൽ, റിസോർട്ട് പ്രതിനിധികളും പ​ങ്കെടുത്തു.

ക്രൂസുകളും തയാർ

മലനാട് റിവർ ക്രൂസ് പദ്ധതിയുടെ ഭാഗമായി വിവിധ ടൂറിസം സൊസൈറ്റികളുടെ നേതൃത്വത്തിൽ സജ്ജമാക്കിയ ക്രൂസുകളും ഡെസ്റ്റിനേഷൻ കണ്ണൂർ ആഘോഷത്തിൽ പങ്കാളികളാകും. പറശ്ശിനിക്കടവ് റോയൽ ടൂറിസം സൊസൈറ്റി, ഏഴോം ബാങ്കും കണ്ണൂരിൽ നിന്നുള്ള പ്രവാസികളുടെ കൂട്ടായ്മയായ വേയ്ക്കും ചേർന്ന് നീറ്റിലിറക്കിയ ഏഴിലം ഹൗസ്ബോട്ട് എന്നിവയുടെ പ്രതിനിധികൾ ഡെസ്റ്റിനേഷൻ കണ്ണൂർ പാക്കേജുകളുടെ ഭാഗമാകുമെന്ന് ഉറപ്പു നൽകി.