തിരുവനന്തപുരം : പ്രാണ‐ ദേശാഭിമാനി അക്ഷരമുറ്റം ക്വിസ്‌ ഫെസ്‌റ്റിവൽ പത്താം പതിപ്പിന്‌ ജനുവരി 12ന്‌ സ്‌കൂളുകളിൽ തുടക്കമാകും. ക്വിസിൽ പങ്കെടുക്കുന്ന വിദ്യാലയങ്ങൾക്ക്‌ ഡിസംബർ 15മുതൽ www.deshabhimani.com/aksharamuttamquiz എന്ന സൈറ്റിൽ രജിസ്‌റ്റർ ചെയ്യാം.

വിദ്യാർഥി പങ്കാളിത്തംകൊണ്ട് രാജ്യത്തെ ഏറ്റവും വലിയ ക്വിസ് മത്സരങ്ങളിലൊന്നായി യൂണിവേഴ്‌സൽ റെക്കോഡ് ഫോറത്തിന്റെ (യു.ആർ.എഫ്) അംഗീകാരം നേടിയ ദേശാഭിമാനി അക്ഷരമുറ്റം ക്വിസ് ഫെസ്റ്റിവൽ, കോവിഡ്‌ പ്രതിസന്ധിയിൽ കഴിഞ്ഞ വർഷം നടത്താനായില്ല.

മഹാമാരി കുട്ടികളിലുണ്ടാക്കിയ മടുപ്പ്‌ അകറ്റി, അവരിൽ പ്രസരിപ്പുണ്ടാക്കുകയാണ്‌ ഇത്തവണത്തെ മത്സരലക്ഷ്യം. എൽ.പി, യു.പി, സെക്കൻഡറി, ഹയർ സെക്കൻഡറി വിഭാഗങ്ങളിലെ വിദ്യാർഥികൾക്ക്‌ പങ്കെടുക്കാം. ഉപജില്ലയിൽ ഓൺലൈനായും സ്‌കൂൾ, ജില്ലാ, സംസ്ഥാനതലങ്ങളിൽ നേരിട്ടുമാണ്‌ മത്സരം. ഉപജില്ലയിൽ ജനുവരി 19നും ജില്ലയിൽ 29നും സംസ്ഥാനതലത്തിൽ ഫെബ്രുവരി 19നുമാണ്‌ മത്സരം.

കെ.ജി മുതൽ പ്ലസ്ടുവരെയുള്ള വിദ്യാർഥികൾക്ക് ഡിജിറ്റൽ പഠനസംവിധാനം ലഭ്യമാക്കുന്ന ‘പ്രാണ ഇൻസൈറ്റ് ലേണിങ് ആപ്’ ടൈറ്റിൽ സ്‌പോൺസറാണ്‌. രണ്ടുകോടി രൂപയുടെ സമ്മാനങ്ങളാണ് വിജയികളെ കാത്തിരിക്കുന്നത്.  വിജയികൾക്ക് ദേശാഭിമാനി അക്ഷരമുറ്റം നൽകുന്ന ഒരുകോടി രൂപയുടെ ക്യാഷ് അവാർഡിനു പുറമെ മികച്ച പ്രകടനം നടത്തുന്ന 2000 വിദ്യാർഥികൾക്ക്‌ ഒരു കോടിരൂപയുടെ പ്രാണ ലേണിങ് ആപ്പുകൾ സമ്മാനമായി നൽകും.