കണ്ണൂർ : കണ്ണൂർ സ്‌പെഷ്യൽ സബ്‌ജയിലിൽ ഉൽപാദിപ്പിച്ച അത്യുൽപാദനശേഷിയുള്ള മാവിൻതൈകൾ മോചിതർക്ക്‌ സമ്മാനമായി നൽകുമെന്ന്‌ തദ്ദേശമന്ത്രി എം.വി ഗോവിന്ദൻ. ഭീകരരെ സംരക്ഷിക്കുന്ന കേന്ദ്രങ്ങളാണ്‌ ജയിലുകളെന്ന പൊതുബോധമാണ്‌ സമൂഹത്തിന്‌. എന്നാൽ, കേരളത്തിലെ ജയിലുകളിൽ മാറ്റമുണ്ടായി. കുറ്റവാളികളെ നല്ല മനുഷ്യരാക്കുന്ന പ്രവർത്തനങ്ങളാണ്‌ ഇവിടങ്ങളിൽ നടക്കുന്നതെന്നും മന്ത്രി പറഞ്ഞു. സ്‌പെഷ്യൽ സബ്‌ജയിലിൽ സ്‌നേഹോത്സവം ഉദ്‌ഘാടനം ചെയ്യുകയായിരുന്നു എം.വി. ഗോവിന്ദൻ.

തിങ്കളാഴ്‌ച ജയിൽമോചിതനായ അനുഗ്രഹിന്‌ ‘നന്മമരം’ പദ്ധതി പ്രകാരം മന്ത്രി മാവിൻതൈ നൽകി. ജയിൽ ക്ഷേമ ദിനാഘോഷ സമാപനം, നന്മമരം പദ്ധതി, മുഴുവൻ സെല്ലുകളിലും ടെലിവിഷൻ, മത്സ്യകൃഷി, സോളാർ പദ്ധതി എന്നിവയും ഉദ്‌ഘാടനം ചെയ്‌തു. ഇ.കെ. സോമശേഖരൻ, എം.വി. മൊയ്‌തു, കളത്തിൽ ബഷീർ എന്നിവരെ മന്ത്രി ആദരിച്ചു. കെ.വി. സുമേഷ്‌ എം.എൽ.എ അധ്യക്ഷനായി. ഗായകൻ കണ്ണൂർ ഷെരീഫ്‌ മുഖ്യാതിഥിയായി. കോർപ്പറേഷൻ സ്ഥിരം സമിതി അധ്യക്ഷ പി. ഇന്ദിര, ഹരിത കേരള മിഷൻ ജില്ലാ കോ-ഓർഡിനേറ്റർ ഇ.കെ. സോമശേഖരൻ, സെൻട്രൽ ജയിൽ സൂപ്രണ്ട്‌ റോമിയോ ജോൺ, റീജണൽ വെൽഫെയർ ഓഫീസർ കെ.വി. മുകേഷ്‌, ജില്ലാ ജയിൽ സൂപ്രണ്ട്‌ കെ. വിനോദൻ, സബ്‌ജയിൽ സൂപ്രണ്ട്‌ ഐ.വി. ഒതേനൻ, കെ.ജെ.ഇ.ഒ.എ. സംസ്ഥാന സെക്രട്ടറി പി.ടി. സന്തോഷ്‌, കെ.ജി.എസ്‌.ഒ.എ. സംസ്ഥാനകമ്മിറ്റിയംഗം കെ.ടി. അരുൺ, സ്‌പെഷ്യൽ സബ്‌ജയിൽ സൂപ്രണ്ട്‌ ടി.കെ. ജനാർദനൻ, വെൽഫെയർ ഓഫീസർ ടി.പി. സൂര്യ എന്നിവർ സംസാരിച്ചു.