കണ്ണൂർ : കേരള ഖാദി വ്യവസായ ബോർഡും പയ്യന്നൂർ ഖാദി കേന്ദ്രവും ഒരുക്കുന്ന ക്രിസ്‌മസ്‌ – ന്യൂഇയർ ഖാദി മേള കണ്ണൂർ ടൗൺസ്‌ക്വയറിന്‌ സമീപം ഖാദി ഗ്രാമോദ്യോഗ്‌ ഭവനിൽ തുടങ്ങി. ഖാദി ബോർഡ്‌ വൈസ്‌ ചെയർമാൻ പി. ജയരാജൻ ഉദ്‌ഘാടനം ചെയ്‌തു. രാമചന്ദ്രൻ കടന്നപ്പള്ളി എം.എൽ.എ അധ്യക്ഷനായി. വൈസ്‌ ചെയർമാന്റെ ക്യാമ്പ്‌ ഓഫീസ്‌ മേയർ ടി.ഒ. മോഹനൻ ഉദ്‌ഘാടനം ചെയ്‌തു. ആദ്യവിൽപന പി. ജയരാജനിൽനിന്ന്‌ മുന്നോക്ക ക്ഷേമസമിതി ഡയറക്ടർ കെ.സി. സോമൻ നമ്പ്യാർ ഏറ്റുവാങ്ങി. പയ്യന്നൂർ ഖാദികേന്ദ്രം ഡയറക്ടർ ടി.സി. മാധവൻ നമ്പൂതിരി, ഐ.കെ. അജിത്‌കുമാർ, കോർപ്പറേഷൻ സ്‌റ്റാൻഡിങ്‌ കമ്മിറ്റി ചെയർമാൻ സുരേഷ്‌ ബാബു എളയാവൂർ എന്നിവർ സംസാരിച്ചു.

മേളയിൽ ഇത്തവണത്തെ തിളക്കം ശ്രീകൃഷ്‌ണപുരം സ്‌പെഷ്യൽ ഖാദി പട്ടുസാരിയുടേതാണ്‌. പാലക്കാട്‌ നിർമിക്കുന്ന സവിശേഷ പട്ടുസാരി ആദ്യമായാണ്‌ ഖാദിബോർഡ്‌ വിപണിലെത്തിക്കുന്നത്‌. കണ്ണഞ്ചിക്കുന്ന നിറങ്ങളിൽ തിളങ്ങുന്ന സാരിക്ക്‌ 6600നും 9500നും ഇടയിലാണ്‌ വില. 30 ശതമാനം റിബേറ്റുമുണ്ട്‌. ശ്രീകൃഷ്‌ണപുരം പട്ടുസാരികൾ ഉപയോഗിക്കുന്നതിനും പ്രത്യേക രീതിയുണ്ട്‌. പട്ടുസാരി ഡ്രൈവാഷിന്‌ നൽകുകയോ വീര്യം കുറഞ്ഞ ഷാംപൂ ഉപയോഗിച്ച്‌ തണുത്ത വെള്ളത്തിൽ കഴുകുകയോ ചെയ്യാം. തണലിലോ ഫാനിന്റെ കാറ്റിലോ മാത്രമേ ഉണക്കാൻ പാടൂള്ളൂ. സൂര്യപ്രകാശം നേരിട്ട്‌ പതിക്കുന്ന രീതിയിൽ ഉണക്കരുത്. ഹാങ്ങറുകളിൽ സൂക്ഷിക്കണം. ഒരേ മടക്കിൽ ദീർഘകാലം സാരി സൂക്ഷിക്കരുത്‌. ഇസ്‌തിരിയിടുമ്പോൾ നിറമില്ലാത്ത പേപ്പർ സാരിയുടെ മുകളിൽ വയ്ക്കണം.