കൊല്ലം: നെല്‍വയല്‍ തണ്ണീര്‍ത്തട സംരക്ഷണ നിയമപ്രകാരം, 2008ന് മുമ്പ് നികത്തപ്പെട്ടതും ഡാറ്റാബാങ്കില്‍ ഉള്‍പ്പെടാത്തതുമായ ഭൂമിയുടെ തരം മാറ്റല്‍ സംബന്ധിച്ച് വ്യക്തതവരുത്തി റവന്യൂവകുപ്പ് ഉത്തരവിറക്കി. 25 സെന്റ് വരെയുള്ള നെല്‍വയല്‍ പുരയിടമാക്കി തരം മാറ്റുന്നത് സൗജന്യമാക്കി. നേരത്തെ ഈ ആനുകൂല്യം 2021 ഫെബ്രവുരി 25 മുതലുള്ള അപേക്ഷകള്‍ക്കായിരുന്നു അനുവദിച്ചിരുന്നത്. ഇത് ഹൈക്കോടതി റദ്ദാക്കിയതിനെ തുടര്‍ന്നാണ് സൗജന്യം അതിനു മുമ്പുള്ള അപേക്ഷകള്‍ക്കും ബാധകമാക്കി പുതിയ ഉത്തരവിറക്കിയത്.

2018 ലെ ഭേദഗതി പ്രകാരം വിജ്ഞാപനം ചെയ്യപ്പെടാത്ത ഭൂമി റവന്യൂ രേഖകളില്‍ തരം മാറ്റാന്‍ 2017 ഡിസംബര്‍ 30വരെ കൈവശമുള്ളവരെയാണ് അനുവദിച്ചിരുന്നത്. ഇതിനുശേഷം ഈ ഭൂമി വാങ്ങിയവര്‍ക്ക് അനുമതി ലഭിച്ചിരുന്നില്ല. ഇതൊഴിവാക്കി, നിയമാനുസൃതം കൈമാറ്റം ചെയ്ത് കിട്ടുന്നവര്‍ക്കും തരം മാറ്റാന്‍ അനുമതി നല്‍കി. അപേക്ഷകന്റെ കൈവശം മറ്റു തരത്തിലുള്ള ഭൂമിയുണ്ടാകാന്‍ പാടില്ലെന്ന് ചട്ടങ്ങളില്‍ വ്യവസ്ഥ ചെയ്തിട്ടില്ലാത്തതിനാല്‍ അത് പരിഗണിക്കേണ്ടതില്ലെന്നും അഡീഷണല്‍ ചീഫ് സെക്രട്ടറി ഡോ. എ. ജയതിലക് പുതിയ ഉത്തരവില്‍ വ്യക്തമാക്കി. നിരവധിപേര്‍ക്ക് ഗുണകരമാകുന്നതാണ് നടപടി.

സര്‍വേ ചെയ്യപ്പെടാത്ത വില്ലേജുകളിലെ ഭൂമികളുടെ സ്വഭാവ വ്യതിയാനത്തിന് അനുമതി നല്‍കുമ്പോള്‍, പ്രസ്തുത ഭൂമിയുടെ സെറ്റില്‍മെന്റ് രജിസ്റ്റര്‍, ബി.ടി.ആര്‍ എന്നിവയും കൈവശവും പരിശോധിച്ചും കൂടാതെ, 2008 കാലഘട്ടത്തിലുള്ള ഭൂമിയുടെ സ്ഥിതിവിവരം സംബന്ധിച്ച കെ.എസ്.ആര്‍.ഇ.സി റിപ്പോര്‍ട്ട് പരിശോധിച്ചും വ്യതിയാനത്തിന് അനുമതി നല്‍കുന്നതില്‍ ആര്‍.ഡി.ഒ മാര്‍ക്ക് തീരുമാനമെടുക്കാം.

50 സെന്റില്‍ കൂടുതലുള്ള ഭൂമിക്ക് സ്വഭാവ വ്യതിയാനം അനുവദിക്കുമ്പോള്‍ 10 ശതമാനം സ്ഥലം ജലസംരക്ഷണത്തിനായി പ്രത്യേകം നീക്കിവയ്ക്കണമെന്ന് വ്യവസ്ഥ ഉടമപാലിക്കണമെങ്കിലും വകുപ്പ് സംരക്ഷണ നടപടി സ്വീകരിക്കേണ്ടതില്ല. 1967ലെ കേരള ഭൂ വിനിയോഗ ഉത്തരവ് വരുന്നതിനുമുമ്പ് നികത്തപ്പെട്ട നിലത്തിന്റെ കാര്യത്തിലാണിത്.