എരിപുരം: താഴെത്തട്ടിൽ പ്രവർത്തനം കേന്ദ്രീകരിക്കുന്നതിന്റെ ഭാഗമായി പത്ത് വീടുകൾക്ക് ചുരുങ്ങിയത് രണ്ടുപേരെങ്കിലും അടങ്ങുന്ന ഹൗസ് കമ്മിറ്റി രൂപീകരിക്കാനും ഈ കമ്മിറ്റി വീടുകളുമായി നിരന്തരം സമ്പർക്കം പുലർത്താനും തീരുമാനിച്ചതായി സി.പി.എം. ജില്ലാ സെക്രട്ടറി എം.വി. ജയരാജൻ പറഞ്ഞു. ജില്ലാ സമ്മേളന ചർച്ചയിലെ തീരുമാനങ്ങൾ വിശദീകരിക്കുകയായിരുന്നു അദ്ദേഹം. നിലവിൽ പത്ത്‌ വീടുകൾക്ക് ഒരു പാർട്ടി അംഗം എന്ന നിലയ്ക്ക് പ്രവർത്തനം നടത്തുന്നുണ്ട്. ആ സ്ഥാനത്ത് ഒരു അംഗത്തിന്‌ പുറമേ ഒരാളെങ്കിലും കൂടിയുള്ള കമ്മിറ്റി രൂപവത്കരിച്ച് കുടുംബങ്ങളുമായി നിരന്തരം സമ്പർക്കം നടത്താനാണ്‌ തീരുമാനം. നിലവിൽ 10 ഏരിയാ കമ്മിറ്റിക്ക് കീഴിൽവരുന്ന ബ്രാഞ്ചുകളിൽ പത്തിൽ താഴെ വീടുകൾക്ക് ഒരു അംഗമുണ്ട്. പക്ഷേ, ശേഷിക്കുന്ന എട്ട് ഏരിയാ കമ്മിറ്റികളിൽ 11 മുതൽ 16 വരെ വീടുകൾക്ക് ഒരു അംഗമേ ഉള്ളൂ. 

വനിതകളെ പാർട്ടിയോട് കൂടുതൽ അടുപ്പിക്കാൻ വേണ്ട പ്രവർത്തനം നടത്തണമെന്നും വീട്ടമ്മമാർക്ക് പെൻഷൻ പദ്ധതി നടപ്പാക്കണമെന്നും ചർച്ചയിൽ പങ്കെടുത്തവർ ആവശ്യപ്പെട്ടു. നിലവിൽ 16,664 അംഗങ്ങൾ വനിതകളാണ്. ഇത് ജില്ലയിലെ മൊത്തം അംഗത്വത്തിന്റെ 20 ശതമാനത്തിലേറെ വരും. 167 വനിതകൾ ബ്രാഞ്ച് സെക്രട്ടറിമാരായുണ്ട്. രണ്ട് ലോക്കൽ സെക്രട്ടറിമാരും. ലോക്കൽ, ഏരിയാ കമ്മിറ്റികളിലേക്ക് തിരഞ്ഞെടുക്കപ്പെട്ട വനിതകളുടെ എണ്ണം കൂടിയിട്ടുണ്ട്. പക്ഷേ, 122 ബ്രാഞ്ചുകളിൽ വനിതകളില്ല. ഇവിടത്തെ അനുഭാവി ഗ്രൂപ്പിൽ വനിതകളുണ്ടെങ്കിൽ അവരെ 2022-ലെ സ്‌ക്രൂട്ടിനിയാകുമ്പോഴേക്ക് ഇവരെ അംഗത്വത്തിലേക്ക് കൊണ്ടുവരും.

പാർട്ടിയുടെയും വർഗബഹുജന സംഘടനകളുടെ പ്രവർത്തനം കാര്യക്ഷമമാക്കണമെന്ന് ചർച്ചയിൽ ആവശ്യമുയർന്നു. ലോക്കൽ കമ്മിറ്റി യോഗത്തിൽ ആറുമാസത്തിലൊരിക്കലെങ്കിലും ജില്ലാ കമ്മിറ്റി അംഗം പങ്കെടുക്കണം. ബ്രാഞ്ച് മാസം മൂന്നുതവണയെങ്കിലും ചേരണം. ആദിവാസി മേഖലകളിൽ കോളനികൾ കേന്ദ്രീകരിച്ച് അനുഭാവി ഗ്രൂപ്പുകൾ തുടങ്ങും. പാട്യം സ്മാരക ഗവേഷണസമിതിയുടെ നേതൃത്വത്തിൽ ജില്ലയിലെ പാർട്ടി ചരിത്രത്തിന്റെ മൂന്നാം വോള്യം 2022-ലെ കൃഷ്ണപിള്ള ദിനമായ ഓഗസ്റ്റ്‌ 19-ന് പ്രസിദ്ധീകരിക്കും.