പയ്യാവൂർ: തീർഥടക കേന്ദ്രമായ കുന്നത്തൂർ പാടിയിലേക്കും വിനോദസഞ്ചാര കേന്ദ്രമായ കാഞ്ഞിരക്കൊല്ലിയിലേക്കും പയ്യാവൂരിൽനിന്നുള്ള പ്രധാന റോഡ് വർഷങ്ങളായി അവഗണനയിൽ. റോഡ് വീതികൂട്ടി മെക്കാഡം ടാറിടണമെന്ന നാട്ടുകാരുടെ ആവശ്യത്തോട് അധികൃതർ മുഖം തിരിക്കുകയാണ്. റോഡ് തകർന്ന് മിക്കയിടത്തും കുഴികൾ രൂപപ്പെട്ടിരിക്കുകയാണ്. പയ്യാവൂർ മുതൽ കുന്നത്തൂർവരെയുള്ള ഭാഗത്ത് കുഴിയടക്കൽ ഉണ്ടാവാറുണ്ടെങ്കിലും പാടാംകവല മുതൽ കാഞ്ഞിരക്കൊല്ലി വരെ 20 വർഷമായി ഒരു പണിയും നടന്നിട്ടില്ല. വാഹനങ്ങൾക്ക് വശംകൊടുക്കാൻ പോലും മിക്കയിടത്തും സൗകര്യമില്ലാത്ത സ്ഥിതിയാണ്.

കുന്നത്തൂർപാടി മുത്തപ്പൻ ദേവസ്ഥാനത്ത് തിരുവപ്പന ഉത്സവകാലത്ത് നൂറുകണക്കിന് ഭക്തരാണ് ദിവസേന എത്താറുള്ളത്. ഈ സമയത്ത് ഇടുങ്ങിയ റോഡുകളിൽ ഗതാഗതതടസ്സം നിത്യസംഭവമാണ്. പാടിക്ക് താഴെയുള്ള മടപ്പുരയിൽ എല്ലാ ദിവസവും ദർശനം നടത്താനുള്ള സൗകര്യമായതോടെ സംക്രമ വെള്ളാട്ടത്തിനും മറ്റ് വിശേഷാൽ ചടങ്ങുകൾക്കുമായി ഭക്തർ വരാറുണ്ട്.

ഭക്തർക്ക് റോഡിന്റെ ശോച്യാവസ്ഥ ഏറെ ബുദ്ധിമുട്ടുണ്ടാക്കുന്നുണ്ട്. മദർ തേരസയുടെ തിരുശേഷിപ്പ് സൂക്ഷിച്ചിട്ടുള്ള പള്ളിയും ഈ റോഡിന് സമീപം പാടാംകവലയിലുണ്ട്. ജില്ലയിലെ പ്രധാന ഹിൽ ടൂറിസം കേന്ദ്രമായ കാഞ്ഞിരക്കൊല്ലിയിലെ ആമിനതോട് വരെയാണ് 20 വർഷം മുമ്പ് വികസിപ്പിച്ചത്. സഞ്ചാരികളെ ആകർഷിക്കുന്ന അളകാപുരി വെള്ളച്ചാട്ടം, ശശിപ്പാറ എന്നിവിടങ്ങളിലേക്ക് പോകേണ്ട റോഡാണിത്. ആമിനത്തോട് മുതൽ ഏലപ്പാറ വരെയുള്ള പഞ്ചായത്ത് റോഡിന്റെ സ്ഥിതിയും ദയനീയമാണ്.

ചിറ്റാരി, തേനങ്കയം, പാടാംകവല, ചീത്തപ്പാറ, പാലയാട്, കുന്നത്തൂർ, ചാമക്കാൽ, മുത്താറിക്കളം ഭാഗങ്ങളിലെ നൂറുകണക്കിന് കുടുംബങ്ങളും ഈ റോഡിനെയാണ് ആശ്രയിക്കുന്നത്. പഞ്ചായത്ത്, വില്ലേജ് ഓഫീസുകളും ബാങ്കുകളും കൃഷിഭവൻ പോലുള്ള സ്ഥാപനങ്ങളും പയ്യാവൂർ ടൗണിലായതിനാൽ ജനം അനുഭവിക്കുന്ന യാത്രാദുരിതം ചെറുതല്ല. യാത്ര ദുർഘടമായ കുന്നത്തൂർപാടി-പാടാംകവല- കാഞ്ഞിരക്കൊല്ലി റോഡ് അടിയന്തരമായി ടാർചെയ്യണമെന്ന് ഐ.എൻ.ടി.യു.സി. പയ്യാവൂർ മണ്ഡലം കമ്മിറ്റി ആവശ്യപ്പെട്ടു. അറ്റകുറ്റപ്പണിക്കുള്ള ഫണ്ട് പാസായെങ്കിലും നാളിതുവരെ പണി തുടങ്ങിയിട്ടില്ലെന്ന് മണ്ഡലം പ്രസിഡൻ്റ് ഷാജി പാട്ടശ്ശേരി പറഞ്ഞു.