പയ്യന്നൂർ : സംസ്ഥാന പരിസ്ഥിതി കാലാവസ്ഥാവ്യതിയാന വകുപ്പിന്റെ മികച്ച ഭൂമിത്രസേന ക്ലബ്ബിനുള്ള സംസ്ഥാന അവാർഡിൽ രണ്ടാം സ്ഥാനം പയ്യന്നൂർ ഗവ. റസിഡൻഷ്യൽ വിമൻസ് പോളിടെക്‌നിക് കോളേജിന്.

പരിസ്ഥിതിഅവബോധ പ്രവർത്തനങ്ങളിലും പരിസ്ഥിതി സംരക്ഷണ പ്രവർത്തനങ്ങളിലും നടത്തിയ മികച്ച ഇടപെടലിന്റെ ഭാഗമായാണ് വിമൻസ് പോളിടെക്‌നിക് കോളേജിലെ ക്ലബ്ബിനെ അവാർഡിനായി തിരഞ്ഞെടുത്തത്.

കാമ്പസിനകത്തും പരിസരങ്ങളിലും നടത്തിയ പരിസ്ഥിതി പഠന ക്യാമ്പുകൾ, സംസ്ഥാനത്തെ വിവിധ വന്യജീവിസങ്കേതങ്ങളിൽ നടത്തിയ പഠനക്യാമ്പുകൾ, കോറോത്തെ കുന്നിടിക്കലുകൾക്കെതിരേ നടത്തിയ പ്രവർത്തനങ്ങൾ, കാനായി കാനത്തെ സംരക്ഷിക്കുന്നതിനായി നടത്തിയ പ്രവർത്തനങ്ങൾ, കാമ്പസിലെ ജൈവവൈവിധ്യങ്ങൾ സംരക്ഷിക്കുന്നതിനും കാമ്പസ് ഹരിതാഭമാക്കുന്നതിനും നടത്തിയ പ്രവർത്തനങ്ങൾ, കാമ്പസ് മാലിന്യവിമുക്തമാക്കുന്നതിന് നടത്തിയ പരിസ്ഥിതിസൗഹൃദ പ്രവർത്തനങ്ങൾ, മാടായിപ്പാറയിൽ സംഘടിപ്പിച്ച മഴ ക്യാമ്പ്, വലിയപറമ്പ കടപ്പുറത്ത് സംഘടിപ്പിച്ച കടലറിവ് ക്യാമ്പ് എന്നിവയെല്ലാം വ്യത്യസ്തങ്ങളായ പരിസ്ഥിതി പഠന ബോധവത്കരണ പ്രവർത്തനങ്ങളായിരുന്നു. ഫാക്കൽറ്റി ഇൻ ചാർജ് എം. അനീഷ് കുമാറാണ് ഭൂമിത്രസേനാ ക്ലബ്ബിന്റെ പ്രവർത്തനങ്ങൾക്ക് നേതൃത്വം നൽകുന്നത്.