കണ്ണൂർ: കണ്ണൂർ അന്താരാഷ്ട്ര വിമാനത്താവളവുമായി ബന്ധപ്പെടുത്തി നടപ്പാക്കുന്ന വ്യവസായപദ്ധതിക്കായി കൂത്തുപറമ്പ്, പാനൂർ മേഖലയിൽ സ്ഥലമെടുപ്പിന് നടപടി തുടങ്ങി. ചെറുവാഞ്ചേരി, മൊകേരി, പുത്തൂർ വില്ലേജുകളിലായി 506 ഏക്കറോളം സ്ഥലമാണ് ഏറ്റെടുക്കുന്നത്. കെ.കെ. ശൈലജ മന്ത്രിയായിരിക്കെ മെഡിക്കൽ ഉപകരണ നിർമാണശാല, മരുന്ന് നിർമാണശാല എന്നിവ സ്ഥാപിക്കുന്നതിന് ഉദ്ദേശിച്ചാണ് ഈ മേഖലയിൽ കിൻഫ്ര പാർക്ക് വിഭാവനം ചെയ്തത്.

ചെറുവാഞ്ചേരി വില്ലേജിൽ 69 ഹെക്ടർ, പുത്തൂർ വില്ലേജിൽ 70 ഹെക്ടർ, മൊകേരി വില്ലേജിലെ വള്ള്യായിയിൽ 65 ഹെക്ടർ എന്നിങ്ങനെ ഏറ്റെടുക്കാനാണ് നടപടി തുടങ്ങിയത്. സ്ഥലം സംബന്ധിച്ച് ആക്ഷേപങ്ങളുണ്ടെങ്കിൽ 15 ദിവസത്തിനകം അറിയിക്കണമെന്നാവശ്യപ്പെട്ട് സർക്കാർ വിജ്ഞാപനം പുറപ്പെടുവിച്ചു. വീടുകളോ കെട്ടിടങ്ങളോ ഈ സ്ഥലങ്ങളിൽ ഉൾപ്പെടുന്നില്ല.

അതേസമയം കിൻഫ്ര പാർക്കിന് സ്ഥലം ഏറ്റെടുത്തേക്കുമെന്ന് സൂചനയുണ്ടായിരുന്നതിനാൽ ഈ സ്ഥലങ്ങളിൽനിന്ന് വ്യാപകമായി കല്ലവെട്ടുകയും മണ്ണ് ഖനനം ചെയ്തെടുക്കുകയും ചെയ്യുകയാണെന്നും സ്ഥലം ഏറ്റെടുക്കുന്നതിന് ഇത് തടസ്സമാവുമെന്നും കിൻഫ്ര അധികൃതർ കളക്ടറെ അറിയിച്ചിട്ടുണ്ട്. കല്ലുവെട്ടുകുഴികൾ നിറഞ്ഞ സ്ഥലമായാൽ ഏറ്റെടുക്കുന്ന സ്ഥലം വികസിപ്പിക്കുന്നതിന് പ്രയാസമാകും.

അതേസമയം മട്ടന്നൂർ വ്യവസായ പാർക്കിനായി വെള്ളപ്പറമ്പിലും പനയത്താംപറമ്പിലും സ്ഥലം ഏറ്റെടുക്കുന്നതിനുള്ള നടപടികൾ പുരോഗമിക്കുകയാണ്. മട്ടന്നൂരിൽ വെള്ളപ്പറമ്പിൽ 506 ഏക്കറും വിമാനത്താവളത്തോട് ചേർന്ന് പനയത്താംപറമ്പിൽ 500 ഏക്കറുമാണ് ഏറ്റെടുക്കുന്നത്. സ്ഥലവില നിശ്ചയിക്കുന്നതിനുള്ള കമ്മിറ്റിയെ നിയോഗിക്കുന്നതടക്കമുള്ള നടപടികൾ വൈകാതെ ഉണ്ടാകും. പനയത്താംപറമ്പ് ഭാഗത്ത് ഏറ്റെടുക്കുന്ന സ്ഥലത്താണ് ഐ.ടി. പാർക്ക് അടക്കമുള്ള പദ്ധതികൾ വിഭാവനം ചെയ്യുന്നത്.