തിരുവനന്തപുരം : ലോകം മാറുകയാണ്. പുതിയ സാങ്കേതികവിദ്യ ഓരോ മേഖലയിലും വരുന്നു. ഇതിനനുസരിച്ച് ജോലിയുടെ സ്വഭാവവും മാറി. ഇപ്പോള്‍ ജോലിചെയ്യുന്നവര്‍ക്ക് അവരുടെ കഴിവ്‌ വര്‍ധിപ്പിക്കാനും പഠനത്തിനുശേഷം ജോലി നേടാന്‍ താത്പര്യമുള്ളവര്‍ക്കും നോര്‍ക്ക റൂട്ട്‌സും ഐ.സി.ടി. അക്കാദമിയും ചേര്‍ന്ന് നടത്തുന്ന മൈക്രോ സ്‌കില്‍ ഓണ്‍ലൈന്‍ കോഴ്‌സുകളിലേക്ക് അപേക്ഷിക്കാം. പ്രവേശന പരീക്ഷയില്‍ മികച്ചപ്രകടനം കാഴ്ചവെക്കുന്നവര്‍ക്ക് നോര്‍ക്കയുടെ 75 ശതമാനം സ്‌കോളര്‍ഷിപ്പ് ലഭിക്കും.

സോഷ്യല്‍ മീഡിയ മാര്‍ക്കറ്റിങ് ആന്‍ഡ് എസ്.ഇ.ഒ.

ഡിജിറ്റല്‍ മാര്‍ക്കറ്റിങ്ങിന്റെ പ്രധാനഭാഗമാണ് സോഷ്യല്‍ മീഡിയ മാര്‍ക്കറ്റിങ്. ഫെയ്‌സ്ബുക്ക്, ഇന്‍സ്റ്റഗ്രാം, യുട്യൂബ്, ലിങ്ക്ഡ്ഇന്‍ എന്നിവയെ അടിസ്ഥാനമാക്കിയുള്ള മാര്‍ക്കറ്റിങ് പഠിക്കാം. സെര്‍ച്ച് എന്‍ജിന്‍ ഓപ്റ്റിമൈസേഷന്‍ (എസ്.ഇ.ഒ.) ഉള്‍പ്പെടെയുള്ള കാര്യങ്ങള്‍ കോഴ്‌സിന്റെ ഭാഗമാണ്. ബിരുദക്കാര്‍ക്കും ഫലം കാത്തിരിക്കുന്നവര്‍ക്കും രണ്ടാം വര്‍ഷ വിദ്യാര്‍ഥികള്‍ക്കും അപേക്ഷിക്കാം.

ജാവാ പ്രോഗ്രാമിങ്

എന്‍ജിനിയറിങ്, സയന്‍സ് വിഷയത്തില്‍ ബിരുദം അല്ലെങ്കില്‍ മൂന്നുവര്‍ഷത്തെ ഡിപ്ലോമ പാസായവര്‍ക്കും അവസാനവര്‍ഷ പരീക്ഷയെഴുതി ഫലം കാത്തിരിക്കുന്നവര്‍ക്കും രണ്ടാം വര്‍ഷ ബിരുദക്കാര്‍ക്കും അപേക്ഷിക്കാം.

ബിസിനസ് ഇന്റലിജന്‍സ് യൂസിങ് എക്‌സെല്‍ ആന്‍ഡ് ടാബ്ലോ

എക്‌സല്‍, ടാബ്ലോ ഉപയോഗിച്ച് വിവരങ്ങളെ വിശകലനം ചെയ്യാനും അവതരിപ്പിക്കാനും പഠിക്കാം. ബിരുദക്കാര്‍ക്കും ഫലം കാത്തിരിക്കുന്നവര്‍ക്കും രണ്ടാം വര്‍ഷ വിദ്യാര്‍ഥികള്‍ക്കും അപേക്ഷിക്കാം.

ഒരുമാസത്തെ കോഴ്‌സ്

ഒരുമാസം നീണ്ടുനില്‍ക്കുന്ന കോഴ്‌സില്‍ മൊത്തം 60 മണിക്കൂര്‍. സെല്‍ഫ് ലേണിങ്ങിന് പുറമേ, ഓരോ മേഖലയിലെ വിദഗ്ധരുടെ ലൈവ് സെഷനുമുണ്ട്. അടിസ്ഥാന കംപ്യൂട്ടര്‍ പരിജ്ഞാനം വേണം. മൂന്നുകോഴ്‌സുകള്‍ക്കും ജി.എസ്.ടി. കൂടാതെ 6000 രൂപയാണ് ഫീസ്.

പഠനം ലിങ്ക്ഡ്ഇന്‍ വഴിയും

കോഴ്‌സ് കാലയളവില്‍ പ്രൊഫഷണല്‍ സോഷ്യല്‍ നെറ്റ് വര്‍ക്കായ ലിങ്ക്ഡ്ഇന്‍ ലേണിങ് സംവിധാനം സൗജന്യമായി പ്രയോജനപ്പെടുത്താം. ഇതിലൂടെ 16,000- ത്തോളം തൊഴില്‍ സാധ്യതയേറിയ കോഴ്‌സുകള്‍ പഠിക്കാനും നൈപുണി വര്‍ധിപ്പിക്കാനും സാധിക്കും.

അപേക്ഷ

www.ictkerala.org വഴി ഡിസംബര്‍ 7 വരെ രജിസ്റ്റര്‍ചെയ്യാം. പ്രവേശനപരീക്ഷ 11-ന് നടക്കും. വിവരങ്ങള്‍ക്ക്: 8078102119, 7594051437, നോര്‍ക്ക റൂട്ട് ടോള്‍ഫ്രീ- 1800 425 3939