കൂത്തുപറമ്പ് : പാതയോരത്തുള്ള മരങ്ങളുടെ ചില്ലകൾ റോഡിലേക്ക് പടർന്നുകയറിയത് വാഹനയാത്രയ്ക്ക് തടസ്സവും അപകടഭീഷണിയുമാകുന്നു. സബ് ട്രഷറി റോഡിൽ കെ.എസ്.ഇ.ബി. ഓഫീസ് മുതൽ എക്‌സൈസ് ഓഫീസ് വരെ ഇരുവശത്തുള്ള മരങ്ങളാണ് തടസ്സമാകുന്നത്. 

ബുധനാഴ്ച രാവിലെ 8.30-ഓടെ ഇതുവഴി കടന്നുപോകുകയായിരുന്ന ലോറി മരത്തിന്റെ ചില്ലയിൽ തട്ടി ഏറെനേരം റോഡിൽ കുടുങ്ങി. മരക്കൊമ്പ് തട്ടി ലോറിയുടെ മുകൾവശത്ത് സ്ഥാപിച്ച എയർകണ്ടീഷന് കേടുപറ്റി. കൊമ്പ് മുറിച്ചുമാറ്റിയതിനുശേഷമാണ് ലോറിക്ക് കടന്നുപോകാൻ കഴിഞ്ഞത്.

സബ്ട്രഷറി റോഡിന്റെ പിൻവശം ടൂറിസ്റ്റ് ബസുകളുടെ പാർക്കിങ് കേന്ദ്രമാണ്. ബസ് സ്റ്റാൻഡിൽനിന്ന് ഇവിടേക്ക് കടന്നുവരുന്ന ബസുകൾക്ക് മരക്കൊമ്പ് തട്ടി കേടുപാട് പറ്റാറുണ്ടെന്ന് പരാതിയുണ്ട്. വലിയ വാഹനങ്ങൾക്ക് കടന്നുപോകാൻ കഴിയുംവിധം മരക്കൊമ്പുകൾ മുറിച്ച് യാത്രാസൗകര്യം സുഗമമാക്കണമെന്നാണ് ഡ്രൈവർമാരുടെ ആവശ്യം.