കൊച്ചി: വൈദികനായിരിക്കെ കൊട്ടിയൂരിൽ പെൺകുട്ടിയെ പീഡിപ്പിച്ച കേസിൽ പ്രതി റോബിൻ വടക്കുംചേരിക്ക് ശിക്ഷയിൽ ഹൈക്കോടതി ഇളവ് നൽകി. 20 വർഷം തടവും ഒരു ലക്ഷം രൂപ പിഴയും എന്ന ശിക്ഷ 10 വർഷം തടവും ഒരു ലക്ഷം രൂപ പിഴയും എന്ന് കുറച്ചു. പോക്സോ, ബലാൽസംഗ കേസുകളിലെ വകുപ്പുകൾ നിലനിൽക്കും എന്നതിനാലാണ് പത്തു വർഷം തടവ് അനുഭവിക്കാൻ കോടതി ഉത്തരവ്. വിചാരണക്കോടതി ഉത്തരവ് ചോദ്യം ചെയ്ത് റോബിൻ വടക്കുംചേരി നൽകിയ ഹർജിയിലാണ് ശിക്ഷാ ഇളവ് പ്രഖ്യാപിച്ച് ഹൈക്കോടതി സിംഗിൾ ബെഞ്ചിന്റെ ഉത്തരവ്.

സ്ഥാപന അധികാരികളുടെ പദവി ദുരുപയോഗം ചെയ്ത് പെൺകുട്ടിയെ പീഡിപ്പിച്ചു എന്ന വകുപ്പ് ഒഴിവാക്കിയതോടെയാണ് 10 വർഷ തടവുശിക്ഷ ഒഴിവായത്. പെൺകുട്ടിയെ വിവാഹം കഴിക്കാൻ തയാറാണെന്ന് കാണിച്ച് നേരത്തെ റോബിൻ സുപ്രീം കോടതിയെ വരെ സമീപിച്ചെങ്കിലും ഇക്കാര്യത്തിൽ കോടതി ഇടപെടാൻ തയാറായിരുന്നില്ല. റോബിൻ വടക്കുംചേരിയെ വിവാഹം കഴിക്കുന്നതിന് പ്രതിക്കു ജാമ്യം നൽകണം എന്ന ആവശ്യവുമായി പരാതിക്കാരിയും സുപ്രീം കോടതിയെ സമീപിച്ചിരുന്നു.

ഹർജിയിൽ ജാമ്യം അനുവദിക്കാൻ സുപ്രീം കോടതി തയാറായില്ലെന്നു മാത്രമല്ല, വിവാഹം കഴിക്കാത്തതിൽ ഇടപെടുന്നില്ലെന്നും ഹൈക്കോടതിയെ സമീപിക്കാമെന്നും അറിയിച്ചു. ഇതേ ആവശ്യവുമായി റോബിൻ വടക്കുംചേരി ഹൈക്കോടതിയെ നേരത്തെ സമീപിച്ചിരുന്നെങ്കിലും പീഡനക്കേസ് ഇരയെ വിവാഹം കഴിച്ച് ഒത്തുതീർപ്പുകൾ സാധിക്കില്ലെന്നു വ്യക്തമാക്കി ഹൈക്കോടതി ഹർജി തള്ളുകയായിരുന്നു. 

2017 ഫെബ്രുവരി 27 നാണ് കൊട്ടിയൂർ പള്ളി വികാരിയായിരുന്ന റോബിൻ വടക്കുംചേരിയെ പോക്സോ കേസിൽ അറസ്റ്റ് ചെയ്തത്. വിദേശയാത്രയ്ക്കായി കൊച്ചിയിലേക്ക് പോകും വഴി പുതുക്കാട് വച്ചായിരുന്നു അറസ്റ്റ്. പത്തോളം പേരെയും കേസിൽ പ്രതിചേർത്തിരുന്നു. എന്നാൽ റോബിൻ ഒഴികെയുള്ളവരെ കോടതി വിട്ടയച്ചു. കേസിൽ പ്രതി ചേർക്കപ്പെട്ട സ്വകാര്യ ആശുപത്രിയിലെ ഡോക്ടർമാരെ സുപ്രീം കോടതി തന്നെ കേസിൽനിന്ന് ഒഴിവാക്കിയിരുന്നു.  

പോക്സോ നിയമം നടപ്പിലാക്കിയ ശേഷം ദേശീയ ശ്രദ്ധ പിടിച്ചുപറ്റിയ കേസുകളിലൊന്നായിരുന്നു കൊട്ടിയൂരിൽ പ്രായപൂർത്തിയാകാത്ത പെൺകുട്ടിയെ കത്തോലിക്കാ പുരോഹിതൻ പീഡിപ്പിച്ച സംഭവം. 2016ലാണ് പ്ലസ് ടു വിദ്യാർഥിനിയെ പള്ളിമേടയിൽ വിളിച്ചുവരുത്തി പീഡിപ്പിച്ചത്. പെൺകുട്ടി പ്രസവിക്കുകയും ഇക്കാര്യം പുറത്തറിയാതിരിക്കാനായി പെൺകുട്ടിയുടെ കുടുംബത്തിന് പണം നൽകുകയും ചെയ്തു. പെൺകുട്ടിയുടെ അമ്മ പരാതിയുമായി രംഗത്ത് വന്നതോടെയാണ് പ്രതി അറസ്റ്റിലായത്. മൂന്ന് വകുപ്പുകളിലായി 60 വർഷം കഠിന തടവാണ് റോബിനു ലഭിച്ചത്. ഒന്നിച്ച് 20 വർഷം തടവ് അനുഭവിക്കണം എന്നായിരുന്നു തലശ്ശേരി പോക്സോ കോടതിയുടെ വിധി.