കോളയാട്: തലശ്ശേരി താലൂക്കിലെ കോളയാട് ആലച്ചേരിയിൽ അഴിമതിയാരോപണത്തത്തുടർന്ന് അധികൃതർ റദ്ദാക്കിയ റേഷൻ കടയുടെ ലൈസൻസ് പുന:സ്ഥാപിച്ച് നല്കാൻ ഉദ്യോഗസ്ഥ തലത്തിൽ നീക്കം. ഭരണ കക്ഷിയിലെ ഒരു എം.എൽ.എ ഇടപെട്ടാണ് ലൈസൻസ് പുന:സ്ഥാപിക്കാൻ ശ്രമം നടത്തുന്നതെന്ന് നാട്ടുകാർ ആരോപിക്കുന്നു. ഇതിനെതിരെ നടപടിയാവശ്യപ്പെട്ട് റേഷൻ നിരവധി കാർഡുടമകൾ ചേർന്ന് മുഖ്യമന്ത്രിക്ക് രേഖാ മൂലം പരാതി നല്കി. 

എ.എ.വൈ കാർഡുടമകൾക്ക് റേഷൻ സാധനങ്ങൾ വിതരണം ചെയ്തതിൽ വെട്ടിപ്പ് നടത്തിയതിനും, റേഷനരി കരിഞ്ചന്തയിൽ വിറ്റതിനുമാണ് കെ. പവിത്രൻ ലൈസൻസിയായ മാലൂർ ഫർക്കയിലെ എ.ആർ.ഡി 202-ാം നമ്പർ റേഷൻ കടയുടെ ലൈസൻസ് 2020 ഒക്ടോബറിൽ അധികൃതർ റദ്ദ് ചെയ്തത്. ഇ-പോസ് ബിൽ ചെയ്ത ശേഷം ആദിവാസി കുടുംബങ്ങളുടെ റേഷൻ വിഹിതം നൽകുന്നതിൽ വെട്ടിപ്പ് നടന്നതായാണ് വിജിലൻസ് പരിശോധനയിൽ കണ്ടെത്തിയത്. ഇത്തരത്തിൽ നിരവധി കുടുംബങ്ങളുടെ റേഷൻ തിരിമറി നടത്തിയതായും വിജിലൻസ് കണ്ടെത്തിയിരുന്നു.

എന്നാൽ, അഴിമതിയെത്തുടർന്ന് റദ്ദ് ചെയ്യപ്പെട്ട ലൈസൻസ് പുന:സ്ഥാപിച്ചു നല്കാൻ ഭരണകക്ഷി എം.എൽ.എ യുടെ നേതൃത്വത്തിൽ നീക്കം നടക്കുന്നുവെന്നാണ് നാട്ടുകാർ ആരോപിക്കുന്നത്. ലൈസൻസ് തിരിച്ചു നല്കാനുള്ള ഉദ്യോഗസ്ഥരുടെ നീക്കം തടയണമെന്ന് നാട്ടുകാർ മുഖ്യമന്ത്രിക്ക് നല്കിയ പരാതിയിൽ ആവശ്യപ്പെട്ടു.

അതേസമയം, ലൈസൻസ് നല്കാനുള്ള നീക്കത്തിനെതിരെ വലിയ പ്രതിഷേധമാണ് ആലച്ചേരിയിൽ നടക്കുന്നത്. പോസ്റ്റർ പ്രചരണവും ഒപ്പ് ശേഖരണവും നടത്തുന്ന പ്രദേശവാസികളായ കാർഡുടമകൾ സർക്കാരിൽ നിന്ന് അനുകൂല നടപടിയുണ്ടാകാത്ത പക്ഷം കോടതിയെ സമീപിക്കാനും തീരുമാനിച്ചിട്ടുണ്ട്.